އިހްތިޖާޖް ކުރި މައްސަލާގައި ހުޅުލޭ އައިލެންޑް ހޮޓެލް (އެޗްއައިއެޗް) ގެ ވަޒީފާއިން ވަކިކުރި ފަސް މީހަކަށް ބަދަލު ދޭން ވަޒީފާއާ ބެހޭ ޓްރައިބިއުނަލުން އިއްޔެ އަމުރުކޮށްފި އެވެ.
މުވައްޒަފުންގެ މެދުގައި ތަފާތު ކުރުން ގެންގުޅޭ ކަމަށް ބުނެ މިދިޔަ ފެބްރުއަރީ މަހު އެޗްއައިއެޗްގެ މުވައްޒަފުންތަކެއް ކުރި އިހްތިޖާޖާ ގުޅިގެން ވަކިކުރި ފަސް މުވައްޒަފަކު ވަޒީފާ އަނބުރާ ހޯދަން ޓްރައިބިއުނަލަށް މައްސަލަ ހުށަހެޅުމުން އެތަނުން ނިންމީ އެ މީހުން ވަޒީފާއިން ވަކިކުރީ އެކަށީގެންވާ ސަބަބެއް ނެތި ކަމަށެވެ.
އެކަމަކު އެ މީހުންނަށް އެ ވަޒީފާ އަނބުރާ ދިނުމަކީ މަސްލަހަތު ހުރި ގޮތެއް ކަމަށް ނުވާތީ ޓްރައިބިއުނަލުން ނިންމީ ބަދަލެއްގެ ގޮތުން، އެ މީހުން ވަކިކުރި ދުވަހުން ފެށިގެން އިއްޔެއާ ހަމައަށް މުސާރަ އާއި ސާވިސް ޗާޖަށްވާ ފައިސާ ދިނުމަށެވެ. އެ ފައިސާ 20 ދުވަހުގެ ތެރޭގައި އެ މީހުންނަށް ދެއްކުމަށް ޓްރައިބިއުނަލުން ވަނީ އަންގައިފަ އެވެ.
ޓްރައިބިއުނަލްގެ ނިންމުމުގައި ވަނީ އެޗްއައިއެޗުގެ މުވައްޒަފުން އިހްތިޖާޖްގައި އަމަލު ކޮށްފައިވަނީ ދެބަސްވުންތައް ހައްލު ކުރުމަށް މުއާމަލާތް ކުރުމުގެ ގަވާއިދާ އެއްގޮތަށް، ވާހަކަ ދައްކައިގެން ހައްލެއް ހޯދުމަށް ކަމަށެވެ. އެހެންވެ، އެ މީހުން ވަކިކުރީ ވަޒީފާއާ ބެހޭ ގާނޫނުގައި ބުނާ ފަދަ އެކަށީގެންވާ ސަބަބެއް އޮވެގެން ނޫން ކަމަށް ތިން މެމްބަރުންގެ އިއްތިފާގުން ނިންމި ނިންމުމުގައިވެ އެވެ.
