ހުޅުލޭ އައިލެންޑް ހޮޓެލް (އެޗްއައިއެޗް)ގެ މެނޭޖްމަންޓުން މުވައްޒަފުންގެ މެދުގައި ތަފާތުކުރުން ގެންގުޅޭ ކަމަށް ބުނެ މެނޭޖްމަންޓް އިސްތިއުފާ ދިނުމަށް ގޮވާލައި ދިވެހި މުވައްޒަފުން މަސައްކަތް ހުއްޓާލައި މިރޭ އިހުތިޖާޖްކުރަން ފަށައިފި އެވެ.
ސިންގަޕޫރުގެ އެސްއޭޓީއެސް އާއި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގުޅިގެން ހިންގާ ފަސް ތަރީގެ ހޮޓަލުގައި މަސައްކަތްކުރާ ދިވެހި މުވައްޒަފަކު މިރޭ ބުނީ މެނޭޖްމަންޓް އިސްތިއުފާ ދިނުމަށް ގޮވާލައި އިހުތިޖާޖްކުރަން ޖެހުނީ އެތަނުގައި މަސައްކަތްކުރާ މުވައްޒަފުންގެ އެއްވެސް ޝަކުވާއެއް ހައްލުނުކޮށް ބިދޭސީންނާ ތަފާތުކުރުންތައް ގެންގުޅޭތީ ކަމަށެވެ.
"އަޅުގަނޑުމެން ވަރަށް ކުރިން ވެސް އެދުނިން މުސާރައިގެ އެއްބައި ނަމަވެސް ޑޮލަރުން ދިނުމަށް. މިއަދާ ހަމަޔަށް އެކަމެއް ވެސް ނުވި. އޭގެ އިތުރުން ބިދޭސީންނަށް ރެމިޓެންސް ހޮޓަލުން ދައްކައިދޭތީ އަޅުގަނޑުމެން ވެސް އެދުނިން އަޅުގަނޑުމެންނަށް ވެސް މުސާރަ ބޮޑުކޮށްދޭން. އެއިން ވެސް އެއްވެސް ކަމެއް ނުކޮށްދިން،" އޭނާ ބުންޏެވެ.
އެޗްއައިއެޗްގައި މަސައްކަތްކުރާ ދިވެހިންގެ ތެރެއިން 70 ވަރަކަށް މުވައްޒަފުން މިރޭ އިރުއޮއްސި ހައެއްޖެހިއިރު އިހުތިޖާޖް ފެށީ އެތަނުގެ ފައިނޭންސް ޑިޕާޓްމަންޓްގައި އުޅޭ ކުއްޖަކު ޑިއުޓީ ގަޑި ހަމަނުކޮށް ހޮޓަލުން ނުކުމެގެން ދިޔަކަމަށް ބުނެ އިންޒާރުގެ ލިޔުމެއްގައި ސޮއިކުރުވަން ހިއުމަން ރިސޯސަސް ޑިޕާޓްމަންޓުން އުޅޭތީ ކަމަށް އިހުތިޖާޖުގައި ހުރި މުވައްޒަފަކު ބުންޏެވެ.
އެ މުވައްޒަފު ބުނީ މުވައްޒަފުން އިހުތިޖާޖްކުރަމުންދާތީ އެ ހޮޓަލުގައި ފުލުހުން ވެސް ހަރަކާތްތެރިވަމުން އަންނަ ކަމަށެވެ.
"އަޅުގަނޑުމެން ފައިނޭންސް ޑިޕާޓްމަންޓަށް ދިޔައިމަ ބުނީ ކްލަބް ހޯލަށްދާން. އަޅުގަނޑުމެން މިތިބީ މެނޭޖްމަންޓް އެއްކޮށް އިސްތިއުފާ ނުދެނީސް އިހުތިޖާޖް ނުހުއްޓާ ގޮތަށް. އަޅުގަނޑުމެން އިހުތިޖާޖްކުރި ނަމަވެސް ހޮޓަލުގެ ގެސްޓުންނަށް ވެސް ނޭނގޭނެ އަދި ބޭރުގެ އެއްވެސް ބަޔަކަށް ނޭނގޭނެ. ވަރަށް ހިމެނޭނުން މިތިބީ،" އޭނާ ބުންޏެވެ.
މިކަމާ ގުޅޭ ގޮތުން އެ ހޮޓަލުގެ މެނޭޖްމަންޓްގެ ބަހެއް ލިބޭ ގޮތެއްނުވި އެވެ.