ހުޅުލޭ އައިލެންޑް ހޮޓެލް (އެޗްއައިއެޗް)ގެ މެނޭޖްމަންޓުގެ މުވައްޒަފުންގެ މެދުގައި ތަފާތުކުރުން ގެންގުޅޭ ކަމަށް ބުނެ މެނޭޖްމަންޓް އިސްތިއުފާ ދިނުމަށް ގޮވާލައި މި މަހުގެ ކުރީކޮޅު އިހުތިޖާޖުކުރި ދިވެހި މުވައްޒަފުންގެ ތެރެއިން ހަ މީހަކު ސަސްޕެންޑްކޮށްފައިވާ ކަމަށް އެ ހޮޓަލުން މިއަދު ބުނެފި އެވެ.
ސިންގަޕޫރުގެ އެސްއޭޓީއެސް އާއި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގުޅިގެން ހިންގާ ފަސް ތަރީގެ ހޮޓަލުގެ އިސް އޮފިޝަލަކު ވިދާޅުވީ ސަސްޕެންޑްކުރި ހަ މުވައްޒަފުންނަކީ އިހުތިޖާޖުކުރުން ހުއްޓާލަން ތަކުރާރުކޮށް އެންގުމުން ވެސް އެއަށް ތަބާނުވި މީހުން ކަމަށެވެ.
"އެ މުވައްޒަފުން ސަސްޕެންޑްކުރީ އަޅުގަނޑުމެންގެ ލީގަލް ޓީމްގެ ލަފާގެ މަތިން. އަދި އެ މުވައްޒަފުންނާ މެދު އަޅާނެ ފިޔަވަޅުތައް ލީގަލް ޓީމުން ދަނީ ބަލަމުން،" އޮފިޝަލް ވިދާޅުވި އެވެ.
އޭނާ ވިދާޅުވި ގޮތުގައި، އެ މުވައްޒަފުން ސަސްޕެންޑްކުރި ނަމަވެސް ހުރިހާ އެލަވަންސެއް ދީފައިވާ ކަމަށެވެ. އެގޮތުން އެކޮމޮޑޭޝަނާއި ކެއުން ހަމަޖައްސައިދީފައިވާނެ ކަމަށް ވެސް އޮފިޝަލް ވިދާޅުވި އެވެ.
"އެ މައްސަލައަށް ފަހު މިހާރު ހޮޓެލްގެ އޮޕަރޭޝަން ކުރިއެކޭ އެއްގޮތަށް ކުރިޔަށް އެބަދޭ. އަޅުގަނޑުމެން އަބަދުވެސް މުވައްޒަފުން ގާތު ބުނަމުން ދިޔައީ މައްސަލަތައް ވާހަކަދައިގެން ހައްލުކުރަން ހިނގާށޭ. އެހެން ނަމަވެސް އެ އަޑު ނާހާ އިހުތިޖާޖުކުރުމަށް ބަޔަކު ނުކުތީ،" އޭނާ ވިދާޅުވި އެވެ.
އެޗްއައިއެޗުން ކުރިން ބުނެފައި ވަނީ މުވައްޒަފުން އެދުނު ގިނަ ކަންތައްތައް ހައްލުކޮށްދީފައިވާނެ ކަމަށެވެ. އެ ގޮތުން ބޭންކު ރޭޓުން އަހަރަކު 5،000 ޑޮލަރު ގަންނަން ލިބޭނެ ސްކީމެއް ތައާރަފް ކުރުމުގެ އިތުރުން މުސާރަ ލަސްވެގެން ކޮންމެ މަހެއްގެ 29 ވަނަ ދުވަހު ޖަމާކޮށް، ޓްރެވަލް އެލަވަންސް ވެސް ދޭން ނިންމާފައިވާ ކަމަށް އޮފިޝަލް ވިދާޅުވި އެވެ.
ހުޅުލޭގައި ހިންގާ ހަމައެކަނި ހޮޓަލުގައި މަސައްކަތްކުރާ 80 ވަރަކަށް ދިވެހިން މިމަހުގެ ހަ ވަނަ ދުވަހުގެ ރޭ އިހުތިޖާޖު ކުރީ އެ ހޮޓަލުގެ ރެކްރިއޭޝަން ކްލަބްގެ ހޯލުގަ އެވެ. އިހުތިޖާޖް ފެށީ މުވައްޒަފުންގެ މައްސަލަތައް ހައްލުކޮށް ނުވަތަ މެނޭޖްމަންޓް އިސްތިއުފާ ނުދެނީސް އިހުތިޖާޖް ހުއްޓާނުލާނެ ކަމަށް ބުނެ އެވެ. އެ މުވައްޒަފުންތައް އެ ރޭ ދަންވަރު 12 ޖަހަންދެން އިހުތިޖާޖް ކުރި އެވެ.
ހުޅުލޭ އައިލެންޑް ހޮޓަލުގައި ދިވެހިންނާ އެކު ގާތްގަނޑަކަށް 180 މުވައްޒަފުން މަސައްކަތް ކުރެ އެވެ.