ސަރުކާރުން ކިތަންމެ ބިރެއް ދެއްކިއަސް ގދ. ތިނަދޫގެ ރައްޔިތުން ތިބީ ފަހަތަށް ޖެހެން ތައްޔާރަށް ނޫން ކަން އެ ރަށުގެ ރައްޔިތުން މިރޭ ސާބިތުކޮށްދީފައިވާ ކަމަށް ޖުމްހޫރީ ޕާޓީގެ ޑެޕިއުޓީ ލީޑަރު އަބްދުﷲ ރިޔާޒް ވިދާޅުވެއްޖެ އެވެ.
ގުޅިފައިވާ އިދިކޮޅު ޕާޓީތަކުން ތިނަދޫގައި ބޭއްވި ޖަލްސާގައި ކިނބިދޫ ދާއިރާގެ މެމްބަރު، ރިޔާޒް ވިދާޅުވީ ޕާޓީތަކުގެ ޖަލްސާ އިއުލާން ކުރުމާއެކު އެކަމާ ދެކޮޅަށް ރައީސް އަބްދުﷲ ޔާމީނަށް ކުރެއްވެން ހުރި މަސައްކަތްތަކެއް ކުރެއްވި ކަމަށެވެ. އެގޮތުން، އެމަނިކުފާނުގެ ކެބިނެޓުގެ ޑިފެންސް މިނިސްޓަރު އާދަމް ޝަރީފާއި ޓޫރިޒަމް މިނިސްޓަރު މޫސާ ޒަމީރާއި ހެލްތު މިނިސްޓަރު އަބްދުﷲ ނާޒިމް ތިނަދު އަށް ފޮނުއްވި ކަމަށް ވިދާޅުވި އެވެ.
އެއީ، ބިރުދައްކައި ޖަލްސާ އަށް ހުރަސްއަޅަން ކަމަށް ރިޔާޒް ތުހުމަތު ކުރެއްވި އެވެ. އެކަމަކު ސަރުކާރުން ދެއްކި ބިރަށް ބެލުމެއް ނެތި، ގިނަ އަދަދެއްގެ ބަޔަކު ޖަލްސާގައި ބައިވެރިވުމުން، ރައީސް ޔާމީނަށް ތާއީދެއް ނެތް ކަން ސާފުވާކަމަށް ވެސް އޭނާ ވިދާޅުވި އެވެ.
"ހުވަދު އަތޮޅުގެ ރައްޔިތުން، ހާއްސަކޮށް ތިނަދޫ ރައްޔިތުން އަދި މި ޖަލްސާއަށް ވަޑައިގެންނެވި އެންމެހާ ބޭފުޅުން އަޅުގަނޑު ހައިރާންކޮށްލައިފި. އެހެން މި ދެންނެވީ ތިނަދޫގައި އަޅުގަނޑުމެން މި ޖަލްސާ ބާއްވަން އިއުލާންކުރި ހިސާބުން ރާއްޖޭގެ ރައީސުލްޖުމްހޫރިއްޔާއަަށް އެއްގޮތަކަށް ހަމަނިންޖެއް ނާދޭ،" ރިޔާޒް ވިދާޅުވި އެވެ.
"އަޅުގަނޑު ހައިރާންވީ، ތިނަދޫގައި މި ޖަލްސާ ބޭއްވިޔަ ނުދޭން ސަރުކާރުގެ އިސްވެރިންތަކެއް ވަޑައިގެން މިހާ މަސައްކަތް ކުރައްވަމުން ދަނިކޮށް، ތިނަދޫ ރައްޔިތުންނާ، މި ރަށާ ކައިރީގައި އޮތް މި އަތޮޅުގެ ރައްޔިތުން ވެސް އެ ބިރަށް ފަސްޖެހުމެއް ނެތި މި ގައުމުގައި މި ހިނގާ ކޮރަޕްޝަނާ ދެކޮޅަށް ނޫނެކޭ ބުނީމާ."
އޭނާ ވިދާޅުވި ގޮތުގައި ގުޅިފައިވާ އިއްތިހާދަކުން ނުކުމެ ރައީސް ޔާމީން ވެރިކަމަށް ގެންނެވީ ވައްކަމާއި ކޮރަޕްޝަން ގައުމުގައި އާއްމުކުރާކަށް ނޫނެވެ. އެކަމަކު މި ސަރުކާރުން އެ މަގަށް މިސްރާބު ޖެހުމުން، ރައީސް ޔާމީނާ އެންމެން ފެއަށް ޖެހިވަޑައިގެންފައިވާ ކަމަށް ރިޔާޒް ވިދާޅުވި އެވެ.
ސަރުކާރަށް މިރޭ ވެސް ވަރަށް ބޮޑަށް ފާޑުވިދާޅުވަމުން ރިޔާޒް ވިދާޅުވީ މެމްބަރުންތަކެއްގެ ގޮނޑި ގެއްލިއްޖެ ކަމަށް ކަނޑައަޅާފައި ވަނީ ސީދާ ގާނޫނުތަކާ ޚިލާފަށް ކަމަށެވެ. އެއީ، ސަރުކާރުގެ ޖަރީމާތައް ފޮރުވަން ކަމަށް ރިޔާޒް ވިދާޅުވި އެވެ.
ރިޔާޒް ވިދާޅުވި ގޮތުގައި ހުރިހާ މުއައްސަސާތަކަށް ނުފޫޒު ފޯރުވައި ޖަރީމާ ހިންގި ނަމަވެސް އެކަންކަން ބަލާނެ ދުވަހެއް އަންނާނެ އެވެ. ރާއްޖޭގެ ހާލަތު ބަދަލުކުރަން އިދިކޮޅު ފަރާތްތަކުން ކުރާ މަސައްކަތް ކާމިޔާބުވާނެ ކަމަށް ވެސް އޭނާ ވިދާޅުވި އެވެ.
