ސިޔާސީ ވަކި މީހަކު ބަންދުގައި ހުރި ވާހަކަ ދައްކާ ނަމަ، "އަޅުގަނޑުގެ ކަންފަތުން ވަރަށް ފުނަށް ދަން ދެން ވެސް ޖެހޭނީ މަޑުނަގަން" ކަމަށް ވިދާޅުވެ އިދިކޮޅު ފަރާތްތަކަށް ރައީސް އަބްދުﷲ ޔާމީން އިއްޔެ އަމާޒުކުރެއްވި ފާޑުވިދާޅުވުންތަކަށް ޖުމްހޫރީ ޕާޓީގެ ޑެޕިއުޓީ ލީޑަރު އަދި ކިނބިދޫ ދާއިރާގެ މެމްބަރު އަބްދުﷲ ރިޔާޒް މިއަދު ރައްދު ދެއްވައިފި އެވެ.
އުތުރުގެ ތިން އަތޮޅަކަށް ރައީސް ޔާމީން ފެއްޓެވި ދަތުރުފުޅުގައި ނ. ހެނބަދޫގައި ވާހަކަފުޅު ދައްކަވަމުން ރައީސް ވިދާޅުވީ ގައުމީ އެޖެންޑާއެއްގައި އިދިކޮޅު ފަރާތްތަކުން ވާހަކަ ދައްކާ ނަމަ، އެމަނިކުފާނުގެ ކަންފަތްޕުޅު ވަރަށް ތޫނުވާނެ ކަމަށެވެ. އެކަމަކު ވަކި މީހަކު ބަންދުގައި ހުރެގެން، އެ މީހަކާ މެދު ލުއި ގޮތެއް ނުވާ ކަމުގެ ވާހަކަ ދައްކާ ނަމަ ކަންފަތްޕުޅުގެ ވަރަށް ފުނުން ވެސް ޖެހޭނީ މަޑު ނަގަން ކަމަށް ވިދާޅުވި އެވެ.
ރައީސްގެ ވާހަކަފުޅަށް ފާޑުވިދާޅުވެ ރިޔާޒް ކުރެއްވި ޓުވީޓެއްގައި ވިދާޅުވީ ގާނޫނުތަކާ ޚިލާފަށް، ފަނޑިޔާރުގެ އަށް ނުފޫޒު ފޯރުވައިގެން ސިޔާސީ ވާދަވެރިން ބަންދުކުރުމުން އެ ވާހަކަ ދައްކާނެ ކަމަށެވެ. ލޯކަލް ކައުންސިލް އިންތިހާބަށް އިޝާރާތް ކުރައްވައި ވިދާޅުވީ، ރައްޔިތުންގެ ވާހަކަތައް އަޑުނޭހުމުގެ އަދަބު ރައްޔިތުންގެ މަންދޫބުން މިހާރު ވެސް މަނިކުފާނަށް ދީފައިވާ ކަމަށް ރިޔާޒު ވިދާޅުވި އެވެ.
"އަދި 2018 ގެ އިންތިހާބުގައި ވެސް ރައްޔިތުން އަދަބު ދޭނެ، ކަންފަތުން މަޑު ނަންގަވާ ސާފުކުރައްވާ،" ރިޔާޒް ވިދާޅުވި އެވެ.
އިދިކޮޅު ސިޔާސީ ލީޑަރުން ފެންނަނީ "ކޮކްޓެއިލް ދަޅެއްގެ" ގޮތުގައި ކަމަށް ރައީސް ވިދާޅުވިއިރު، އޭގެ ރައްދުގައި ރިޔާޒު ވިދާޅުވީ ގުޅިފައިވާ ޕާޓީތަކަކީ ރައްޔިތުންގެ ފިކުރު ކަމަށެވެ.
އޭނާ ވިދާޅުވި ގޮތުގައި އިދިކޮޅު ލީޑަރުންގެ ފިކުރަކީ ކޮރަޕްޝަނާއި އަނިޔާވެރިކަމާ ދެކޮޅު ފިކުރެވެ. ރައްޔިތުން ބޭނުން ވަނީ އަދުލުވެރި ވެރިކަމެއް ކުރާނެ ވެރިއަކާއި އިންސާފުވެރި ފަނޑިޔާރުގެއެއްގެ އިތުރުން ރައްޔިތުންގެ ހައްގުގައި ވަކާލާތު ކުރާނެ ރައްޔިތުންގެ މަޖިލީހެއް ކަމަށް އޭނާ ވިދާޅުވި އެވެ.
"މަނިކުފާނުގެ ވެރިކަމުގައި ހިނގާފައިވާ ޖަރީމާތައް ބެލުމަށް ދިވެހި ރައްޔިތުން ތިބީ ކެތްމަދުވެފައި. ބޭރުގެ ގައުމުތަކުގައި ފޮރުވާފައި ހުރި ދައުލަތުގެ ފައިސާތައް ބޭރުގެ ފަރާތްތަކުގެ އެހީގައި ދައުލަތަށް އަނބުރާ ގެންނާނެ ދުވަހެއް ދެކެން ގިނަ ރައްޔިތުން ބޭނުންވޭ،" ރިޔާޒް ވިދާޅުވި އެވެ.
ނ. ހޮޅުދޫ ބަނދަރު ހުޅުއްވައި ދެއްވުމަށް އެ ރަށަށް ވަޑައިގެން، ރައްޔިތުންނާ ވާހަކަފުޅު ދައްކަވަމުން ރައީސް ޔާމީން ވިދާޅުވެފައި ވަނީ، މިއީ ސިޔާސީ ތަރިތައް އަރާ އޮއްސޭ މޫސުން ކަމަށާއި މި މޫސުމުގައި ސިޔާސީ ބޭފުޅުންނާ ކޮށްލަން އެންމެ ރަނގަޅު ސުވާލަކީ އެ ބޭފުޅެއްގެ އަސްލު ފިކުރަކީ ކޮބައިތޯ ކަމަށެވެ. އެއީ "ލިބަރަލް" ވިސްނުންތޯ "ސެންޓާ ރައިޓް" ތޯ ނުވަތަ ފެށުނީއްސުރެ "ކޮންޒަވޭޓިވް" ވިސްނުމުގައި ހުރި މީހެއްތޯ ސުވާލު ކުރުން ރަނގަޅު ކަމަށާއި އެކަމަކު އޭގެ ޖަވާބު އެއްވެސް ބޭފުޅަކަށް ނުދެއްވޭނެ ކަމަށް ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ރައްޔިތުންނާ މެދު ކުރާ އުއްމީދާއި މަސްލަހަތާއި ތަރައްގީއަށް ވިސްނާއިރު ފިކުރުގައި އެއްވެސް "ބްލާ"ކަމެއް، އޮޅުމެއް، އަނދިރިކަމެއް އަދި އުނދަގޫ ކަމެއް އޮވެގެން ނުވާނެ އެވެ. އެކަމަކު އެހެން ސިޔާސީ ލީޑަރުންނާ ދޭތެރޭ "ކޮކްޓެއިލް ދަޅެއް" ނޫން ކަމަށް ދެންނެވެން ނެތް ކަމަށާއި އެއީ ރައްޔިތުން ސަމާލުވާން ޖެހޭ ކަމެއް ކަމަށް ރައީސް ވިދާޅުވި އެވެ.