ގދ. އަތޮޅުގެ ރަށެއްގައި އެއްބަނޑުއެއްބަފާ ހަތަރު އަންހެން ކުދިންނާ ގަދަކަމުން ބަދުއަޚުލާގީ އަމަލު ހިންގި ކަމުގެ ތުހުމަތުގައި ހައްޔަރު ކުރި އުމުރުން 75 އަހަރުގެ ފިރިހެންމީހާ ކްރިމިނަލް ކޯޓުން އިއްޔެ ދޫކޮށްލައިފި އެވެ.
އޭނާ ދޫކޮށްލީ 25 ދުވަހު ގޭގައި ބަންދުކޮށްފައި ބެހެއްޓުމަށް ފަހު އެވެ. މީގެ ކުރިން އޭނާގެ ބަންދުގެ މުއްދަތަށް 15 ދުވަސް އަދި އޭގެ ފަހުން 10 ދުވަސް ޖަހާފައި ވެ އެވެ.
އެނގިފައިވާ ގޮތުގައި އެ މީހާ ދޫކޮށްލީ މާލޭން ބޭރަށް ނުދިއުމަށް ޝަރުތުކޮށްފަ އެވެ.
ހަތަރު ކުދިންނާ ބެހުނު ކަމުގެ ތުހުމަތުގައި، 75 އަހަރުގެ މީހާގެ އިތުރުން އޭނާ ގެންގުޅޭ ބިދޭސީއަކު ވެސް ވަނީ ހައްޔަރުކޮށްފަ އެވެ. ބިދޭސީމީހާ އަދިވެސް ހުރީ ހައްޔަރުކޮށްފަ އެވެ. މިހާރު މާލޭގައި އުޅެމުން އަންނަ އަދި ރަށުގައި ނުފޫޒު ގަދަ ކަމަށް ބުނާ 75 އަހަރުގެ މީހާ މާލެ އައީ، ހަތަރު ކުދިންނާ ގަދަކަމުން ގުޅުން ހިންގި ކަމަށް ބުނާ މައްސަލަ ބެލުމަށް ފުލުހުންނާއި ޖެންޑާ މިނިސްޓްރީގެ ޓީމެއް އެ ރަށަށް ދިޔުމުންނެވެ.
އެ ހަތަރު ކުދިންގެ ތެރެއިން އެންމެ ދޮށީ ކުއްޖާ ފިލައިގެން މާލެ އައުމުން ދެން އެ ފިރިހެން މީހާގެ ޖިންސީ ޝިކާރައަކަށް ވީ ދޮށީ ކުއްޖާގެ ހަގަށް ތިބި ތިން ކޮއްކޮ އެވެ.
މީގެ 12 އަހަރު ކުރިއްސުރެ އޭނާ އަންނަނީ އެކި ކުދިންނަށް ޖިންސީ ގޯނާ ކުރަމުން ކަމަށް އޭގެ ތެރެއިން ބައެއް ކުދިން ބުނެ އެވެ. އޭނާ ވަނީ އެ ކުދިން އުޅޭ ގެ މަރާމާތުކޮށް، ދިރިއުޅެވޭނެ ގޮތް ހަދައިދީފަ އެވެ. އަދި އެ މީހުން ކައިބޮއި ހެދުމަށް، ދަރަންޏަށް އެއްޗެހި ނަގަނީ އެ މީހާގެ ފިހާރައިންނެވެ. ކުދިންނާ ގުޅުން ހިންގީ އެއީ ސަބަބެއް ކަމަށް ބަލައިގެން ކަމަށް އެ ކުދިން ބުނެ އެވެ.
