މި އަހަރުގެ ރިޔާސީ އިންތިހާބުގައި ރައީސް އަބްދުﷲ ޔާމީން ބަލި ކުރަން އިދިކޮޅު އިއްތިހާދުން އެއް ކެންޑިޑޭޓަކު ނެރޭނެ ކަމަށް ބުންޏަސް އެއީ އެ މީހުންނަށް ކުރެވޭނެ ކަމެއް ނޫން ކަމަށާއި ކޯލިޝަންގައި މިހާރު ވެސް އެއަށް ވުރެ ބޮޑަށް ކޯޅުންތައް ބޮޑުވެފައިވާ ކަމަށް އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކު މިރޭ ވިދާޅުވެއްޖެ އެވެ.
ޓީވީއެމްގެ "އުންމީދާއި ކުރިއެރުން" ޕްރޮގްރާމްގައި، ރައްޔިތުންގެ މަޖިލީހުގެ ނައިބް ރައީސްކަން ވެސް ކުރައްވާ މޫސަ ވިދާޅުވީ އިދިކޮޅު އިއްތިހާދަށް އެއް ކެންޑިޑޭޓަކު ނުނެރޭވެ ކަމުގެ އަލާމާތްތައް މިހާރު ވެސް ފެންނަން ފަށައިފި ކަމަށެވެ. އެހެންވެ ސަރުކާރާއި ރައީސް ޔާމީނު އިންތިހާބުން ފެއިލްވުމުގެ އެއްވެސް ބިރެއް، ޖެހިލުމެއް ނެތް ކަމަށް ވިދާޅުވި އެވެ.
އޭނާ ވިދާޅުވި ގޮތުގައި މިހާރު ކަންކަން ދާ ގޮތަށް ބަލާ އިރު، އިއްތިހާދުން ދެތިން ކެންޑިޑޭޓަކު ނުކުންނާނެ އެވެ. އެކަމަކު އެމްޑީޕީގެ ކެންޑިޑޭޓެއްގެ ގޮތުގައި ކުރީގެ ރައީސް މުހައްމަދު ނަޝީދަށް ވާދަ ކުރެއްވޭނެ އެއްވެސް ހައިސިއްޔަތެއް ނެތް ކަމަށް ވިދާޅުވި އެވެ. އަދި ޖުމްހޫރީ ޕާޓީ އާއި އަދާލަތުން ވެސް ކެންޑިޑޭޓަކު ނެރޭ ތަން ފެންނާނެ ކަމަށް މޫސަ ވިދާޅުވި އެވެ.
އޭނާ ވިދާޅުވީ އެމްޑީޕީ އަށް އޮތް ދަންތުރައަކީ ރައީސް ނަޝީދެވެ. ނަމަވެސް އެ ޕާޓީ ތެރޭގައި ވެސް ނަޝީދަށް ތާއީދެއް ނެތްކަން، އެމްޑީޕީ އަށް ވާގިވެރިވާ ރާއްޖެ ޓީވީން ނެގި ޕޯލުން ވެސް ސާބިތުވެއްޖެ ކަމަށް ވިދާޅުވި އެވެ. އެކަމަކު ނަޝީދު އުޅުއްވަނީ "ތިމާވަރުގެ މީހަކު ނެތިގެން" ކަމަށް މޫސަ ވިދާޅުވި އެވެ. އަދި އެ ޕޯލްގެ ނަޖީތާއާ ހިސާބުން އެމްޑީޕީ އާއި ޖުމްހޫރީ ޕާޓީ ތަޅާފޮޅަން ފަށައިފައިވާ ކަމަށް ވިދާޅުވި އެވެ.
"ސިޔާސީ ދާއިރާގައި ކަންކަން ކުރާ ގޮތަށް ބަލާ އިރު ރައީސް ނަޝީދަކާއި ކުރީގެ ރައީސް މައުމޫން އަބްދުލް ގައްޔޫމަކާ އެއްވެސް ތަފާތެއް ނެތް މިހާރަކު. އަދި ރައީސް މައުމޫނަށް ވުރެ ވެސް އިތުރުފުޅު ހެއްދެވުމުގައި ރައީސް ނަޝީދު މި ހުންނަވަނީ ތަންކޮޅެއް ކުރީގައި،" މޫސަ ވިދާޅުވި އެވެ.
އޭނާ ވިދާޅުވި ގޮތުގައި އިދިކޮޅު އިއްތިހާދުން އެއް ކެންޑިޑޭޓަކު ނެރުމާ ބެހޭ ގޮތުން މަޝްވަރާ ކުރަން ކޮންމެ ޕާޓީއަކުން ދެ މެމްބަރަކު ހިމެނޭ ކޮމިޓީއެއް ނެގި ތަނާހެން ދެން ފެނުނީ އެމްޑީޕީން ވަކިން ނޫސް ކޮންފަރެންސެއް ބާއްވައި އެ ޕާޓީގެ ކެންޑިޑޭޓަކީ ނަޝީދު ކަމަށް އިއުލާން ކުރެއްވި ތަން ކަމަށެވެ. އެހެންވެ އެ ހިސާބުން ވެސް އެއް ކެންޑިޑޭޓަކު ނެރުމުގެ މަޝްވަރާ ކުރުމުގެ ބޭނުން ކެނޑިފައިވާ ކަމަށް މޫސަ ވިދާޅުވި އެވެ.
"ކޮބައިތޯ ދެން މަޝްވަރާ ކުރުމުގެ ބޭނުމަކީ؟ ސިޔާސީ ބައެއްގެ ތެރޭގައި މަޝްވަރާ ކުރުމަށްޓަކައި ބަޔަކު މި ނެގީ. އޭގެ މާނައަކީ ކޮންމެ ޕާޓީއަކަށް ވެސް އެއްބަސްވެވޭ ގޮތަކަށް ހުރިހާ ޕާޓީތަކުން ނެރެނީ އެއް ކެންޑިޑޭޓެއްތޯ ނޫނީ ކޮންމެ ޕާޓީއަކުން ވަކި ކެންޑިޑޭޓެއް ނެރެގެން އެ ބޭފުޅުންގެ މެދުގައި ބާއްވާ ޕްރައިމަރީއަކުން ހޮވާ ކެންޑިޑޭޓަކު ވާދަ ކުރައްވަނީތޯ އެ ވެސް ކަނޑައަޅަން ޖެހޭނީ އެ ބޭފުޅުންގެ މަޝްވަރާގެ މޭޒުން ނިމޭ ގޮތެއްގެ މަތިން،" އޭނާ ވިދާޅުވި އެވެ.
މޫސަ ވިދާޅުވި ގޮތުގައި ނަޝީދަކީ ޝަރުއީ ހުކުމެއް އިއްވާފައިވާ ބޭފުޅަކަށްވާތީ، އެ މަނިކުފާނަށް އިންތިހާބުގައި ވާދަ ނުކުރެއްވޭނެކަން ގަބޫލުކޮށް، އެމްޑީޕީން އެހެން ބޭފުޅަކާ ދޭތެރޭ ވިސްނަން ޖެހެ އެވެ. އެކަމަކު އެ ޕާޓީ ވަކި ބައެއް ކޮންޓްރޯލްކޮށް، ނަޝީދާ ވާދަ ކުރަން އެއްވެސް އެހެން ބޭފުޅަކަށް ފުރުސަތު ދޭން ބޭނުން ނުވާ ގޮތަށް ކަންކަން ކުރުމަކީ ވަރަށް ދެރަވަރު ކަމެއް ކަމަށް ވިދާޅުވި އެވެ.
"މިއަދު އިރު އޮއްސުނުތަނާ ފެނިގެން ދިޔައީ އަބްދުﷲ ޝާހިދު ލައްވައި ރައީސް ނަޝީދު ފައިބުޑަށް ވެއްޓި ސަޖިދަ ޖައްސުވަން އުޅޭ ގޮތަށް ސިޔާސީ ގޮތުން މަސައްކަތް ކުރި ތަން،" ނަޝީދު ނޫން މީހަކަށް ޕާޓީ ތެރެއިން ފުރުސަތު ދޭން ބޭނުން ނުވާކަން ފާހަގަކޮށް މޫސަ ވިދާޅުވި އެވެ.
އޭނާ ވިދާޅުވި ގޮތުގައި މި އަހަރުގެ ރިޔާސީ އިންތިހާބު އެއްބުރުން ވަރަށް ފަސޭހަކަމާ އެކު ރައީސް ޔާމީން ކާމިޔާބު ކުރައްވާނެ އެވެ. އަދި ރައްޔިތުން އެ މަނިކުފާނަށް ވޯޓް ދެއްވާނީ ގައުމުގެ ތަރައްގީ އާއި ކުރިއެރުމަށް ކުރައްވަމުން ގެންދަވާ ކަންކަމަށް ބަލައިފައި ކަމަށް ވިދާޅުވި އެވެ.
"ރައްޔިތުން ބޭނުން ވަނީ ބޭނުންވާ ކަންކަން ކޮށް ދޭން. އެ މީހުންނަށް ކަންތައްތައް ފުދޭ ކަމަށް ވަންޏާ އިންތިހާބުގެ ނަތީޖާ އިން އެކަން ފެނިގެން ދާނެ،" މޫސަ ވިދާޅުވި އެވެ.