ރައްޔިތުންގެ މަޖިލީހުގެ ދެބައިކުޅަ އެއްބައި މެމްބަރުން މަޖިލީހުގައި ހާޒިރުވެ ނެތަސް، ގާނޫނުތައް ފާސް ކުރެވޭ ގޮތަށް ހަދަން ސަރުކާރުން ސުޕްރީމް ކޯޓަށް ދާން އުޅޭ ކަމުގެ މައުލޫމާތު ލިބިފައިވާ ކަމަށް އިދިކޮޮޅު ކޯލިޝަނުން މިއަދު ބުނެފި އެވެ.
ގާނޫނު އަސާސީގެ 87 ވަނަ މާއްދާ ބުނާގޮތުން ރައްޔިތުން އަމަލު ކުރުން ލާޒިމްވާ އެއްވެސް ކަމެއް މަޖިލީހުން ފާސްކުރަން ވޯޓަށް އަހަން ޖެހޭނީ މަޖިލީހުގެ ޖުމްލަ މެމްބަރުންގެ ދެ ބައިކުޅަ އެއްބަޔަށް ވުރެ ގިނަ މެމްބަރުން ހާޒިރުވެ ތިބޭ ޖަލްސާއެއްގަ އެވެ. ޖުމްލަ 85 މެމްބަރުން ތިއްބަވާ މަޖިލީހުގެ ދެ ބައި ކުޅަ އެއް ބަޔަކީ 43 މެމްބަރުންނެވެ. އެކަމަކު މަޖިލީހުގެ 12 ދާއިރާއެއްގެ ގޮނޑި ހުސްވެފައިވާ ކަމަށް އިލެކްޝަންސް ކޮމިޝަނުން ނިންމާފައިވާތީ މިވަގުތު މަޖިލީހުގައި ތިއްބެވީ 75 މެމްބަރުންނެވެ.
އިދިކޮޅު ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ވިދާޅުވީ 43 މެމްބަރުން ނެތަސް ގާނޫނުތައް ފާސް ކުރެވޭ ގޮތަށް ގާނޫނު އަސާސީ މާނަ ކުރަން ސަރުކާރުން ސުޕްރީމް ކޯޓަށް ހުށަހަޅަން އުޅޭ ކަމަށް މައުލޫމާތު ލިބިފައިވާ ކަމަށެވެ. އެކަން އެގޮތަށް ކުރަން އުޅެނީ އިދިކޮޅު ކޯލިޝަންގައި މަޖިލީހުގެ އަޣުލަބިއްޔަތު އޮތުމުން، 43 މެމްބަރުން މަޖިލީހުގައި ހަމަ ކުރުމަކީ ސަރުކާރަށް ކުރެވޭނެ ކަމަކަށް ނުވާތީ ކަމަށް އަލީ ހުސައިން ވިދާޅުވި އެވެ.
"މިހާރު ގާނޫނުއަސާސީ އޮތް ގޮތުން ސަރުކާރަކަށް ނެތް ގާނޫނަކަށް އެއްވެސް ބަދަލެއް، އެއްވެސް އިސްލާހެއް ގެނެވޭކަށް. ސަރުކާރުން ބޭނުންވާ ކަހަލަ އިސްލާހެއް ނުވަތަ ބަދަލެއް ނުގެނެވޭތީ މިހާރު އެ މަސައްކަތް ކުރައްވަނީ ސުޕްރީމް ކޯޓަށް ގޮސްގެން 43 މެމްބަރުން ނެތި ވެސް ގާނޫނަށް ބަދަލު ގެނެވޭ ގޮތަށް ސުޕްރީމް ކޯޓުން ހުކުމެއް ހޯދޭތޯ ސަރުކާރުން މަސައްކަތް ކުރާ ކަމަށް އަޅުގަނޑުމެންނަށް މައުލޫމާތު ލިބެނީ،" އަލީ ހުސައިން ވިދާޅުވި އެވެ.
އޭނާ ވިދާޅުވި ގޮތުގައި ގޮނޑި ގެއްލިފައިވާ ކަމަށް ކޮމިޝަނުން ކަނޑައަޅާފައިވާ ދާއިރާތަކުގެ އިންތިޚާބު ގާނޫނު އަސާސީގައި ބުނާ މުއްދަތުގައި ހަމަވިއިރު ވެސް، ނުބާއްވަނީ އެ ގޮނޑިތައް ނުގެއްލޭ ކަމަށް ސަރުކާރަށް ވެސް ގަބޫލު ކުރެވޭތީ އެވެ. އެ ދާއިރާތަކުގެ އިންތިޚާބު ނުބާއްވައި، އަދި މެމްބަރުންނަށް މަޖިލީހުގެ ތަމްސީލުވުމުގެ ފުރުސަތު ނުދިނުމަކީ ރައްޔިތުންގެ ހައްގެއް ނިގުޅައިގަތުން ކަމަށާއި އެއީ ރައްޔިތުންގެ އަޑު ކަނޑުވާލަން ކުރާ ކަމެއް އަލީ ހުސައިން ވިދާޅުވި އެވެ.
"ދިވެހި ރައްޔިތުންގެ 50،000 ނުވަތަ 60،000 މެމްބަރުންގެ ތަމްސީލުވުން ރައްޔިތުންގެ މަޖިލީހުގައި މިހާރަކު ނެތް. އެހެންވީމަ މަޖިލީހުގައި މެމްބަރުން ހިފަހައްޓައިގެން އެތިބޭ ކޮންމެ ދުވަހަކު އެ ގެއްލުވައިލެވެނީ ރައްޔިތުންގެ ހައްގު،" އަލީ ހުސައިން ވިދާޅުވި އެވެ.
އިންތިޚާބުތަކާ ބެހޭ ބައެއް ގާނޫނުތަކަށް ބަދަލު ގެންނަން މަޖިލީހަށް ހުށަހަޅާނެ ކަމަށް ސަރުކާރުން ބުނެފައިވާތީ އެކަމާ ގުޅިގެން އަލީ ހުސައިން ވިދާޅުވީ އިންތިޚާބާ ބެހޭ ގާނޫނަށް ބަދަލު ގެންނަން އުޅެނީ އިލެކްޓްރޯނިކް ވޯޓިންގެ ނިޒާމަކާ ދިމާލަށް ދިއުމަށް ކަމަށެވެ. އެކަމަކު ވޯޓަށް ނުފޫޒު ފޯރުވޭނެ ގޮތަށް މިހާތަނަށް އެކަށީގެންވާ އެއްވެސް ބަދަލެއް އެެފަދަ ގާނޫނުތަކަށް ގެނެސްފައިނުވާ ކަމަށް އޭނާ ވިދާޅުވި އެވެ.
"މިސާލެއްގެ ގޮތުން އަޅުގަނޑު ދަންނަވާން ވޯޓު ކަރުދާހުގައި އިތުރު އެއްޗެހިތަކެއް ކުރަަހައި، ތަރި ކުރަހައި، ހަނދުފަޅި ކުރަހައި، އެހެން އެއްޗެހި ކުރަހައި ހެދީމަ ވެސް އެފަދަ ވޯޓު ކަރުދާސްކޮޅެއް ބާތިލްވާން ޖެހޭނެ ކަމަށް ފުރަތަމަ އިސްލާހު ހުށަހެޅިގެން ދިޔައީ. އެހެން ނަމަވެސް އެ އިސްލާހެއް ފާހެއް ނުވި،" އަލީ ހުސައިން ވިދާޅުވި އެވެ.