ގައިދީންގެ ފަރާތުން ނެރޭ ބަޔާންތައް ޝާއިއުކުރާ މީޑިއާތަކާ މެދު ފިޔަވަޅު އަޅަން ފަށާފައިވާ ކަމަށް މޯލްޑިވްސް ކަރެކްޝަނަލް ސާވިސްއިން މިރޭ ބުނެފި އެވެ.
އެ އިދާރާއިން ނެރުނު ބަޔާނެއްގައި ބުނީ، ހުކުމް ތަންފީޒު ކުރަމުންދާ މީހުންގެ ނަމުގައި މިހާރަކަށް އައިސް ޝާއިއު ކުރާ ޚަބަރުތަކަކީ ގަވާއިދާ ޚިލާފަށް ޖަހާ ޚަބަރުތަކެއް ކަމަށެވެ.
ނަމަވެސް އެފަދަ ބަޔާންތައް ޝާއިއުކުރާ މީޑިއާތަކާއި އެ ބަޔާންތައް ނެރޭ މީހުންނާ މެދު އަޅާ ފިޔަވަޅެއް ކަރެކްޝަނަލް ސާވިސްގެ ބަޔާނުގައި ނެތެވެ.
"އެފަދަ ތަކެތި އާންމުކުރާ ފަރާތްތަކާއި، މީޑިއާތަކުން ޝާއިއު ކުރުމުގައި ޒިންމާވާން ޖެހޭ ފަރާތްތަކާ މެދު ގާނޫނީ ފިޔަވަޅު އަޅަން ފަށައިފީމެވެ،" ގައިދީން ބަލަހައްޓާ އިދާރާގެ ބަޔާނުގައިވެ އެވެ.
ކަރެކްޝަނަލް ސާވިސްއިން ބުނާ ގޮތުގައި، ޝަރުއީ ހުކުމެއް ތަންފީޒު ކުރަމުންދާ މީހުންނާ ބައްދަލުކޮށް، އެއްވެސް މައުލޫމާތެއް ހޯދައި، އެ މައުލޫމާތެއް ބޭނުން ކުރެވޭނީ ޖަލުތަކާއި ޕެރޯލްގެ ގާނޫނުގެ ދަށުން ހަދާފައިވާ ޚާއްސަ ގަވައިދުގެ ދަށުންނެވެ.
އެއީ "ގައިދީންނާއި ކުށުގެ ތުހުމަތުގައި ހައްޔަރުގައި ތިބޭ މީހުންނާއި، ކޯޓު އަމުރުގެ ދަށުން ބަންދުގައި ބައިތިއްބަން ޖެހޭ މީހުންނަށް ލިބިދޭން ޖެހޭ އަސާސީ ހިދުމަތްތަކާއި އިނާޔަތްތަކާ ބެހޭ ގަވާއިދު" އަދި "ގައިދީންނާއި ކުށުގެ ތުހުމަތުގައި ހައްޔަރުގައި ތިބޭ މީހުންނާއި، ކޯޓު އަމުރުގެ ދަށުން ބަންދުގައި ބައިތިއްބަން ޖެހޭ މީހުން ބައްދަލު ކުރުމާއި ފޯނު ކުރުމާއި ސިޓީ ފަދަ ތަކެތި ފޮނުވުމާއި ލިބިގަތުމުގެ ގަވާއިދު" އެވެ.
ގައިދީންގެ ބަޔާންތައް ޝާއިއުކުރާ މީޑިއާތަކާ މެދު ފިޔަވަޅު އަޅަން ފަށާފައިވާ ކަމަށް ކަރެކްޝަނަލް ސާވިސްއިން ބުނިއިރު، ތަފާތު މައްސަލަތަކުގައި ހުކުމް ތަންފީޒު ކުރައްވަމުން ގެންދަވާ ސިޔާސީ ބޭފުޅުން ގެންދަވަނީ އެކި ކަންކަމާ ގުޅުވައިގެން ބަޔާންތައް ނެރުއްވަމުންނެވެ.