ޖަލު ހުކުމް އިއްވާފައިވާ އިދިކޮޅު ތިން ލީޑަރުން ކަމަށްވާ ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އަދާލަތު ޕާޓީގެ ރައީސް ޝައިހް އިމްރާން އަބްދުﷲ އާއި ޖަލުގައި ތިބި އެހެން ބައެއް ސިޔާސީ ބޭފުޅުން ވެސް ވަގުތުން މިނިވަންކުރަން ސުޕްރީމް ކޯޓުން މިރޭ އަމުރުކޮށްފި އެވެ.
ސުޕްރީމް ކޯޓުން ނެރުނު އަމުރުގައިވާ ގޮތުން ވަގުތުން މިނިވަން ކުރަން ޖެހޭނީ ނަޝީދާއި ގާސިމާއި އިމްރާންގެ އިތުރުން ކުރީގެ ޑިފެންސް މިނިސްޓަރު މުހައްމަދު ނާޒިމާއި ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ކުރީގެ ނައިބު ރައީސް އަހުމަދު އަދީބާއި ކުރީގެ ޕީޖީ މުހުތާޒް މުހުސިނާއި ގއ. މާމިގިލީ ކޯޓުގެ އިސް މެޖިސްޓްރޭޓް އަހުމަދު ނިހާންގެ އިތުރުން ވިޔަފާރިވެރިޔާ ހާމިދު އިސްމާއިލެވެ.
އެ ބޭފުޅުން މިނިވަންކުރަން އަމުރުކުރީ އެ ބޭފުޅުންގެ މައްޗަށް ހިންގާފައިވާ ޝަރީއަތްތަކާ ގުޅޭ ގޮތުން ސުޕްރީމް ކޯޓަށް ހުށަހަޅާފައިވާ ޝަކުވާތަކަށް ބަލާއިރު، އެއީ އަލުން ގޮތެއް ނިންމަން ޖެހޭ ކަންތައްތަކަށް ވާތީ އެވެ. އެ ބޭފުޅުން މިނިވަންކުރީ އެ މައްސަލަތަކާ މެދު އަލުން ގޮތެއް ނިންމަންދެނެވެ.
އެ އަމުރާ އެއްގޮތަށް ދައުލަތުގެ ހުރިހާ ފަރާތްތަކުން އަމަލު ކުރުމަށާއި އެކަމަށް ހުރަސް އަޅައި ނުވަތަ ފަރުވާ ކުޑަކޮށްފި ނަމަ ކޮންމެ މައްސަލައެއް ވަކިވަކިން ބަލައި، ޝަރީއަތަށް ހުށަހަޅަން ވެސް އެ އަމުރުގައި ޕްރޮސެކިއުޓާ ޖެނެރަލަށް އަންގާފައިވެ އެވެ.
ޖަލު ހުކުމް އައި ސިޔާސީ ބޭފުޅުންގެ ތެރެއިން ނަޝީދާއި ގާސިމް މިވަގުތު ތިއްބެވީ ރާއްޖެއިން ބޭރުގަ އެވެ. ދެން ތިއްބެވި ބޭފުޅުން ތިއްބެވީ އެކި މައްސަލަތަކާ ގުޅިގެން ދިގު ޖަލު ހުކުމްތައް ތަންފީޒު ކުރަން ޖަލުގަ އެވެ.
