ސިޔާސީ ސަބަބުތަކަށްޓަކައި ހައްޔަރުކޮށްފައިވާ މީހުން ދޫކޮށްލަން ސުޕްރީމް ކޯޓުން މިރޭ ކުރި ހުކުމް ތަންފީޒުކުރަން ބަންޑާރަ ނައިބު މުހައްމަދު އަނިލް ހުރަސްއަޅުއްވާފައިވާ ކަމަށް ބުނެ ފިޔަވަޅު އަޅައިދޭން އެ ކޯޓަށް މައްސަލައެއް ހުށަހަޅައިފި އެވެ.
ސުޕްރީމް ކޯޓުން މިރޭ ކުރި ހުކުމްގައި ވަނީ، ސިޔާސީ އެކި މައްސަލަތަކުގައި ހައްޔަރުކޮށްފައިވާ މީހުންނާއި ހުކުމް އިއްވާފައިވާ މީހުން ވަގުތުން މިނިވަންކުރަން ދައުލަތުގެ އެންމެހާ މުއައްސަސާތަކަށް އަމުރުކޮށްފަ އެވެ. އެ އަމުރާ ޚިލާފުވާ ކޮންމެ މައްސަލައެއް ބަލައި ފިޔަވަޅު އަޅަން ވެސް ޕްރޮސިކިއުޓާ ޖެނެރަލްގެ މައްޗަށް އަމުރުކޮށްފައިވެ އެވެ.
ޖުމްހޫރީ ޕާޓީން ސުޕްރީމް ކޯޓަށް ފޮނުވި ސިޓީއެއްގައި ބުނީ ސިޔާސީ ސަބަބުތަކަކަށްޓަކައި ހައްޔަރުކޮށްފައިވާ 9 ބޭފުޅަކު ދޫކޮށްލަން ސުޕްރީމް ކޯޓުން އަމުރުކޮށްފައިވާ ކަމަށެވެ. އެކަމަކު، އެ އަމުރު ތަންފީޒުކުރުމުގެ ކުރިން ދިރާސާކުރަމުން އަންނަ ކަމަށް ބަންޑާރަ ނައިބު މީޑިއާގައި ވިދާޅުވެފައިވާ ކަމަށް އެ ސިޓީގައިވެ އެވެ.
ސުޕްރީމް ކޯޓުގެ އަމުރާ އެއްގޮތަށް އަމަލުކުރަން ދައުލަތުގެ ހުރިހާ މުއައްސަސާއަކަށް އަމުރުކޮށްފައި ވަނިކޮށް، އެކަން ތަންފީޒުނުކުރުމަކީ، އަމުރަށް ތަބާނުވުން ކަމަށް ވެސް ސިޓީގައިވެ އެވެ. އެހެންވެ، ޖުމްހޫރީ ޕާޓީން އެދުނީ، ބަންޑާރަ ނައިބާ މެދު ފިޔަވަޅު އަޅައިދޭށެވެ.
ސުޕްރީމް ކޯޓުން މިރޭ ވަނީ ތިން މައްސަލައެއްގައި މުހިންމު ތިން ނިންމުމެއް ނިންމައިފަ އެވެ. އޭގެ ތެރެއިން އެންމެ ބޮޑު އެއް ކަމަކީ ސިޔާސީ އެކި ކުށްތަކުގައި ޖަލު ހުކުމާއި ހައްޔަރުކޮށްފައި ތިބި ސިޔާސީ ލީޑަރުން ދޫކޮށްލަން ކުރި އަމުރެވެ. އަނެއް އަމުރަކީ ގޮނޑި ގެއްލިއްޖެ ކަމަށް އިލެކްޝަންސް ކޮމިޝަނުން ނިންމާފައިވާ 13 މެމްބަރުންގެ ގޮނޑި ނުގެއްލޭ ކަމަށް ކުރި ހުކުމެވެ. އަދި އަނެއް ނިންމުމަކީ ޕާޓީ ބަދަލު ކުރިޔަސް ގޮނޑި ނުގެއްލޭނެ ކަމަށް ނިންމި ނިންމުމެވެ.