ސިޔާސީ ލީޑަރުންތަކެއް ދޫކޮށްލަން ސުޕްރީމް ކޯޓުން ކުރި ހުކުމް ތަންފީޒުކޮށްފި ނަމަ ދައުލަތުގެ ހިންގުމުގެ ބާރުތައް އޮޅުންބޮޅުންވެ ގާނޫނުއަސާސީގެ ތަރުތީބު ގެއްލިދާނެ ކަމަށް ރައީސް އަބްދުﷲ ޔާމީން އެ ކޯޓަށް މިއަދު އަންގަވައިފި އެވެ.
ސުޕްރީމް ކޯޓުން މިދިޔަ ބުރާސްފަތި ދުވަހު ނެރުނު އަމުރުގައި، ސިޔާސީ ނުވަ ބޭފުޅަކު މިނިވަންކުރަން އަންގާފައިވެ އެވެ. އޭގެ ތެރޭގައި ކުރީގެ ރައީސް މުހައްމަދު ނަޝީދާއި ކުރީގެ ނައިބު ރައީސް އަހްމަދު އަދީބާއި ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ އިތުރުން އަދާލަތު ޕާޓީގެ ރައީސް އިމްރާން އަބްދުﷲ ހިމެނިވަޑައިގަންނަވަ އެވެ.
ސުޕްރީމް ކޯޓުގެ އަމުރުގައި، މި ބޭފުޅުން ވަގުތުން ދޫކޮށްލަން އަންގާފައިވީ ނަމަވެސް ސަރުކާރުން އެއިން އެއްވެސް ބޭފުޅަކު އަދި މިނިވަނެއް ނުކުރެ އެވެ.
އެންމެ މަތީ މަރުހަލާގެ ކޯޓު ހުކުމް ތަންފީޒުނުކޮށްގެން ސަރުކާރަށް ޕްރެޝަރު ބޮޑުވެފައި ވަނިކޮށް، ރައީސް ޔާމީން މިއަދު ވަނީ ސުޕްރީމް ކޯޓަށް ސަރުކާރުގެ ތިން ކަންބޮޑުވުމެއް ހުށަހަޅުއްވައިފަ އެވެ. އެއީ، ސިޔާސީ ލީޑަރުން ދޫކޮށްލުމުގައި ހުރި ކަންބޮޑުވުންތަކާއި ޖުޑީޝަލް ސާވިސް ކޮމިޝަންގެ ބާރު ގެއްލޭ ކަމަށް ވިދާޅުވުމުގެ އިތުރުން ޖުޑީޝަލް އެޑްމިނިސްޓްރޭޓަރު ހަސަން ސައީދު ދޫކޮށްލަން އަމުރުކުރި މައްސަލަ އެވެ.
އުއްތަމަ ފަނޑިޔާރު އަބްދުﷲ ސައީދަށް ރައީސް ފޮނުއްވި ސިޓީގައި ވިދާޅުވީ ގާނޫނުއަސާސީން ދައުލަތް ހިންގުމުގެ ވަކިވަކި ބާރުތައް ލިބިދީ އުފައްދާފައިވާ މުއައްްސަސާތަކުގެ ހިންގުމުގެ ނިޒާމްތަކަށް ސުޕްރީމް ކޯޓުގެ އަމުރުން ބުރޫއަރާ ކަމަށެވެ. އަދި އެ އަމުރުން، ގައުމީ ސަލާމަތާއި ރައްޔިތުންގެ ރައްކާތެރިކަމާ ގުޅިފައިވާ އެތައް މަސްލަހަތުތަކެއް ގެއްލޭ ހިސާބަށް ހިނގައިދާނެ ކަމަށް ވެސް ރައީސް ވިދާޅުވި އެވެ.
އެ އަމުރާ އެއްގޮތަށް ދައުލަތް ހިންގަން ފަށައިފި ނަމަ، ރައީސް ވިދާޅުވި ގޮތުގައި، ގާނޫނުއަސާސީގެ ބޭނުން ކެނޑިދާ ހިސާބަށް ކަންކަން ހިނގައިދާނެ އެވެ. މީގެއިތުރުން، ޖިނާއީ އަދުލުގެ ނިޒާމްގެ ވެސް ތަރުތީބު ގެއްލިގެން ހިނގައިދާނެ ކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވީ އެ މައްސަލަތަކަށް ރިއާޔަތްކުރާއިރު، ގާނޫނުއަސާސީ އާއި ގާނޫނުގެ ހަމަތަކުގެ ތެރެއިން، ސުޕްރީމް ކޯޓުގެ އަމުރު ތަންފީޒުކުރެވިދާނެ ކަމަށް ގަބޫލުނުކުރެއްވޭ ކަމަށެވެ. އެހެންވެ ރައީސް އެދިވަޑައިގަތީ، ޕްރޮސިކިއުޓާ ޖެނެރަލް ސުޕްރީމް ކޯޓަށް ހުށަހަޅާފައިވާ ވަކިވަކި މައްސަލަތަކަށް ގާނޫނުއަސާސީ އާއި ގާނޫނުތަކުގެ ތެރެއިން ކަންކަން ކުރެއްވޭނެ ގޮތްތައް ކަނޑައަޅުއްވައި ދެއްވުމަށެވެ.
ޖޭއެސްސީއާ ގުޅޭގޮތުން ފޮނުއްވި ސިޓީގައި ރައީސް ޔާމީން ވިދާޅުވީ ސުޕްރީމް ކޯޓުގެ ފަނޑިޔާރުންގެ މައްސަލައެއް ބެލުމުގެ ބާރު އެ ކޮމިޝަނަށް ލިބިދީފައި ނުވާ ކަމަށް ކަނޑައަޅާފައި ވުމަކީ ގާނޫނުއަސާސީގެ 157 ވަނަ މާއްދާގެ (ށ) ގެ ބާރު ކަނޑުވާލައި ޖޭއެސްސީގެ މަސައްކަތަށް ހުރަސްއެޅޭ ކަމެއް ކަމަށެވެ. އެހެންވެ ރައީސް އެދިވަޑައިގަތީ ޖޭއެސްސީގެ މަސައްކަތް ކުރިއަށް ގެންދެވޭނެ ގޮތެއްގެ މަތިން ކޯޓު އަމުރު ބަދަލުކޮށްދޭށެވެ.
ޖުޑީޝަލް އެޑްމިނިސްޓްރޭޓަރު ހަސަން ސައީދާ ގުޅޭގޮތުން ފޮނުއްވި ސިޓީގައި ރައީސް ވިދާޅުވީ އޭނާ ހައްޔަރުކުރަން ކްރިމިނަލް ކޯޓުން ނެރުނު އަމުރު ސުޕްރީމް ކޯޓުން ބާތިލްކުރުމަކީ، އޭނާ އަށް ތުހުމަތުކޮށް ފުލުހުންގެ މުއައްސަސާ އިން ދިޔަ ރިޝްވަތުގެ މައްސަލައެއްގެ ތަހުގީގު ހުއްޓިދާނެ ކަމެއް ކަމަށެވެ. އަދި އެ ހުކުމުގެ ސަބަބުން ފުލުހުންނާއި ޕްރޮސިކިއުޓަ ޖެނެރަލްގެ ގާނޫނީ ޒިންމާ އަދާކުރުމަށް ވެސް ހުރަސްއެޅިފައިވާ ކަމަށް ރައީސް ވިދާޅުވި އެވެ.
ދައުލަތުގެ މުއައްސަސާތައް ހިނގާނެ ކަން ކަށަވަރުކުރުމަކީ އެމަނިކުފާނުގެ ޒިންމާއެއް ކަމަށް ވިދާޅުވެ، ރައީސް އެދިވަޑައިގަތީ ސުޕްރީމް ކޯޓުގެ އެ އަމުރު ބާތިލްކޮށްދެއްވުމަށެވެ.
