އުއްތަމަ ފަނޑިޔާރު އަބްދުﷲ ސައީދު ވެސް ޖުޑީޝަލް ސާވިސް ކޮމިޝަން (ޖޭއެސްސީ) އިން ދެންމެ ސަސްޕެންޑްކޮށްފި އެވެ.
އެ ކޯޓުގެ ފަނޑިޔާރު އަލީ ހަމީދު ވެސް އިއްޔެ ސަސްޕެންޑް ކޮށްފައިވާއިރު، ޖޭއެސްސީން މިއަދު ބުނީ، އުއްތަމަ ފަނޑިޔާރާ މެދު ވެސް އެ ފިޔަވަޅު އެޅީ، އެމަނިކުފާނު ފުލުހުންގެ ބަންދުގައި ހުންނެވުމުން ކަމަށެވެ.
އަދި އުއްތަމަ ފަނޑިޔާރާ ގުޅޭ ގޮތުން މިހާތަނަށް ފުލުހުންނަށް ލިބިފައިވާ ހެކިތަކަށް ބަލައި، ދައުލަތުގެ ތަހުގީގީ އިދާރާތަކުން އެ މައްސަލާގައި ގޮތެއް ކަނޑައަޅައި ޖޭއެސްސީ އަށް އަންގައި، އެ ކޮމިޝަނުން ގޮތެއް ކަނޑައަޅަންދެން އެމަނިކުފާނު ސަސްޕެންޑް ކުރީ ކަމަށް ޖޭއެސްސީން ނެރުނު ބަޔާނުގައިވެ އެވެ.
އުއްތަމަ ފަނޑިޔާރާއި އަލީ ހަމީދު މިދިޔަ ހޯމަ ދުވަހުގެ ރޭ ދަންވަރުގެ ވަގުތެއްގައި ހައްޔަރުކޮށްފައި ވަނީ ރިޝްވަތު ހިފުމުގެ ތުހުމަތުގަ އެވެ. އެ ދެބޭފުޅުންގެ މައްޗަށް ވެސް ފުލުހުން ކުރަނީ ރިޝްވަތުގެ ގޮތުގައި ފައިސާ ހިފުމަށް ފަހު، ޝަރުއީ ހުކުމްތައް ވަކި ގޮތަކަށް ކުރުމާއި ގާނޫނާ ޚިލާފަށް ސަރުކާރު ބަދަލު ކުރުމަށް މަގާމުގެ ނުފޫޒު ބޭނުން ކުރައްވައިގެން މަސައްކަތް ކުރެއްވުން އަދި ދައުލަތާއި ޖިނާއީ އަދުލުގެ ނިޒާމް ހިންގުމަށް ގަސްދުގައި ހުރަސްއެޅުމުގެ ތުހުމަތެވެ. އެކްޓިން ޕޮލިސް ކޮމިޝަނަރު އަބްދުﷲ ނަވާޒް އިއްޔެ ވިދާޅުވީ، އެ މައްސަލައާ ގުޅޭ ހެކި ބަހާއި އިތުރު ހެކިތައް ވެސް ލިބިފައިވާ ކަމަށެވެ.
އުއްތަމަ ފަނޑިޔާރާއި އަލީ ހަމީދުގެ އިތުރުން ކުރީގެ ރައީސް މައުމޫން އަބްދުލް ގައްޔޫމާއި ޖުޑީޝަލް އެޑްމިނިސްޓްރޭޓަރު ހަސަން ސައީދު ވެސް ވަނީ ރިޝްވަތުގެ މައްސަލާގައި ހައްޔަރުކޮށްފަ އެވެ.
