ކުއްލި ނުރައްކަލުގެ ހާލަތު އިއުލާންކޮށްފައި އޮތަސް، ރައްޔިތުންގެ މަޖިލީހުގެ ބާރާއި އަދުލު އިންސާފުގެ ދާއިރާ އަށް ލިބޭ ބާރުތައް ހިފެހެއްޓިދާނެ ކަމަށް ގަބޫލު ނުކުރައްވާ ކަމަށް ރައްޔިތުންގެ މަޖިލީހުގެ ކުޅުދުއްފުށީ ދެކުނު ދާއިރާގެ ޕީޕީއެމް މެމްބަރު މުހައްމަދު ނަޝީދު މިއަދު ވިދާޅުވެއްޖެ އެވެ.
މަޖިލީހުގެ މިއަދުގެ ޖަލްސާގައި ނަޝީދު ވިދާޅުވީ ރައީސުލްޖުމްހޫރިއްޔާ އަށް ކުއްލި ނުރައްކަލުގެ ހާލަތު އިއުލާންކޮށް، ބައެއް އަސާސީ ހައްގުތައް ހިފެހެއްޓުމާއި ބައެއް ގާނޫނުތައް ހިފެހެއްޓުމުގެ ބާރު ލިބިވަޑައިގަންނަވާ ކަމަށެވެ. އެކަމަށް ގާނޫނީ ގޮތުން ދެންނެވޭނެ އެއްޗެއް ނެތް ކަމަށް އޭނާ ވިދާޅުވި އެވެ.
ނަމަވެސް، މި މަހު 5 ގައި ރައީސް އަބްދުﷲ ޔާމީން އިއުލާން ކުރެއްވި ކުއްލި ނުރައްކަލުގެ ހާލަތުގެ ގަރާރުގައި އަދުލު އިންސާފުގެ ބާރާއި މަޖިލީހުގެ ބާރާ ގުޅުން ހުރި ބައެއް މާއްދާތައް ހިފަހައްޓާފައިވާ ކަން އޭނާ ފާހަގަކުރެއްވި އެވެ.
"ކުއްލި ނުރައްކަލުގެ ހާލަތުގެ ގަރާރުގެ ދަށުން މަޖިލީހަށް ލިބިގެންވާ ބާރުތައް، އަދުލު އިންސާފުގެ ދާއިރާ އަށް ލިބިގެންވާ ބާރުތައް މި ގޮތަށް ހިފެހެއްޓިދާނެ ކަމަކަށް އެހާ ފަސޭހަ އިން ގާނޫނީ ގޮތުން ދެންނެވިދާނެ ވާހަކަތަކެއް ނޫން،" ނަޝީދު ވިދާޅުވި އެވެ.
އެހެންވެ، ނަޝީދު ވަނީ ކުއްލި ނުރައްކަލުގެ ހާލަތުގެ ގަރާރުގައި ހިފަހައްޓާފައިވާ ގާނޫނުއަސާސީގެ 99، 101، 113، އަދި 228 ވަނަ މާއްދާ ފާހަގަ ކުރައްވައި، ކޮމެޓީ މަރުހަލާގައި އެ މާއްދާތަކާ މެދު ވިސްނެވުމަށް އެދިވަޑައިގެންފަ އެވެ. އަދި އެ މާއްދާތަކާ ނުލައި ފާސް ކުރެވޭނެ ގޮތެއް ވެއްޖެ ނަމަ، އެއީ ގާނޫނީ ގޮތުން މުހިންމު ސުވާލަކަށް ޖަވާބު ލިބުން ކަމަށް ވެސް ނަޝީދު ވިދާޅުވި އެވެ.
ނަޝީދު ވިދާޅުވީ މަޖިލީހަށް ހުށަހަޅާ ގާރެއް އޮތް ގޮތަށް ފާސް ކުރުން ނުވަތަ އެ ގަރާރުގެ ބައެއް ފާސް ކުރުމުގެ ފުރުސަތު އެބައޮތް ކަމަށެވެ. މަޖިލީހުން ފާސް ކުރަން ޖެހޭ ކޮންމެ އެއްޗެއް އެ އޮތް ގޮތަށް ފާސް ކުރުން ނުވަތަ އެއަށް ބަދަލު ގެނެސްގެން ފާސް ކުރުން ނުވަތަ އެ ބާތިލު ކުރަން ވެސް މަޖިލީހަށް ބާރު ލިބޭ ކަން ވެސް ނަޝީދު ފާހަގަކުރެއްވި އެވެ.
ސަރުކާރުން މި މަހުގެ 5 ގައި އިއުލާން ކުރި ކުއްލި ނުރައްކަލުގެ ހާލަތުގެ މުއްދަތު އިތުރު ކުރަން ރައްޔިތުންގެ މަޖިލީހަށް ހުށަހެޅި ގަރާރު ދިރާސާ ކުރަން ގައުމީ ސަލާމަތުގެ ކޮމެޓީ އަށް ވަނީ ފޮނުވައިފަ އެވެ.
ރައީސް އަބްދުﷲ ޔާމީން، މަޖިލީހަށް ފޮނުއްވި ސިޓީގައި ވަނީ ކުއްލި ނުރައްކަލުގެ ހާލަތު އިތުރު 15 ދުވަހާއެކު، ޖުމްލަ 30 ދުވަހަށް އިތުރު ކުރަން ހުށަހަޅުއްވައިފަ އެވެ. މި މަހުގެ 7 ވަނަ ދުވަހު މި މައްސަލަ މަޖިލީހަށް ފޮނުވިއިރު، ކުއްލި ނުރައްކަލުގެ ހާލަތު އިއުލާން ކުރި މުއްދަތު މާދަމާ އަށް ހަމަވާނެ އެވެ.