ރަސްދޫން ހަތަރު ފުލުހަކު ހައްޔަރުކޮށްފި

އއ. ރަސްދޫން ހަތަރު ފުލުހަކު މިއަދު ހައްޔަރުކޮށްފައިވާ ކަން "މިހާރު" އަށް އެނގިއްޖެ އެވެ.


ފުލުހުން ގޮސް ފުލުހުންތަކެއް ހައްޔަރު ކުރިކަން އެ ރަށު ކައުންސިލުން ވެސް ވަނީ ޔަގީންކޮށްދީފަ އެވެ.

ކައުންސިލްގެ މެމްބަރު އަބްދުﷲ އަނިލް ވިދާޅުވީ މީގެ ހަފުތާއެއްހާ ކުރިން އެ ރަށަށް ފޮނުވާލި ހަތަރު ފުލުހަކު ހައްޔަރުކޮށްގެން މިއަދު އަނބުރާ މާލެ އަށް ގެންގޮސްފައިވާ ކަމަށެވެ. އެކަމަކު މިކަން ފުލުހުން އަދި ޔަގީނެއް ނުކޮށްދެ އެވެ.

އެނގިފައިވާ ގޮތުގައި އެ ފުލުހުން ފޮނުވާލީ، މި މަހު ފުރަތަމަ ދުވަހު ސުޕްރީމް ކޯޓުން ނެރުނު އަމުރު ތަންފީޒު ކުރުމަށް ގޮވާލައި ކުރި މުޒާހަރާގައި ބައިވެރިވުމުންނެވެ. ރަސްދޫ ޕޮލިސް ސްޓޭޝަނުގައި އެ ފުލުހުން ތިބި އިރު، އެ މީހުންގެ އަތުގައި އޮތް ފޯނު ވެސް އަތުލާފައިވާ ކަމަށް އެނގިފައި ވެ އެވެ.

މިދިޔަ ބުރާސްފަތި ދުވަހުގެ ރޭ ވަނީ އެސްއޯގެ ޔުނިޓެއްގެ ކުރީގެ ކޮމާންޑަރު ހުސައިން ސައިފް އާއި އިތުރު ފުލުހަކު ހައްޔަރުކޮށްފަ އެވެ.

އެ ދެ މީހުން ވެސް ހައްޔަރު ކުރީ ސުޕްރީމު ކޯޓުގެ އަމުރާ ގުޅިގެން ފުލުހުންގެ ތެރޭގައި ހަމަނުޖެހުން އުފައްދަން އުޅުނު ކަމުގެ ތުހުމަތުގަ އެވެ. ޖަލު ހުކުމް އިއްވާފައިވާ ސިޔާސީ ލީޑަރުންތަކަކާ އެކު ނުވަ މީހަކު ދޫކޮށްލުމަށް މިމަހު އެއް ވަނަ ދުވަހު ސުޕްރީމް ކޯޓުން ކުރި އަމުރާއެކު ރާއްޖޭގެ ސިޔާސީ މަސްރަހު ވަނީ ހަލަބޮލިވެފަ އެވެ. އެ އަމުރު ތަންފީޒު ކުރާނެ ކަމަށް ބުނިތާ މާގިނައިރުތަކެއް ނުވެ އޭރުގެ ޕޮލިސް ކޮމިޝަނާ އަހުމަދު އަރީފް ވަނީ މަގާމުން ދުރުކޮށްފަ އެވެ.