އުއްތަމަ ފަނޑިޔާރު އަބްދުﷲ ސައީދުގެ މައްޗަށް ކުރާ ދައުވާގެ ޝަރީއަތް މިހާރު ކުރިއަށް ގެންދަނީ ޖިނާއީ އިޖްރާއާތުގެ ގާނޫނުގެ ދަށުން ނޫން ކަމަށް އެ މައްސަލަ ބައްލަވާ ގާޒީ މިއަދު ވިދާޅުވެއްޖެ އެވެ.
ކުއްލި ނުރައްކަލުގެ ހާލަތު އިއުލާންކޮށް، މިދިޔަ މަހު ހައްޔަރުކުރި އުއްތަމަ ފަނޑިޔާރު އަބްދުﷲ ސައީދުގެ މައްޗަށް ދައުލަތުން ކުރަނީ މިދިޔަ މަހުގެ ފުރަތަމަ ދުވަހު ސުޕްރީމް ކޯޓުން އަމުރު ނެރުނު ފަހުން، ދައުލަތުގެ އިދާރާތަކުގެ މެދުގައި ލިޔުންތައް ބަދަލުކުރަން ގާއިމް ކޮށްފައިވާ ނެޓްވޯކް ކަމަށްވާ ގަވަމެންޓް އީ ލެޓާ މެނޭޖްމަންޓް ސިސްޓަމް (ޖެމްސް) ސިސްޓަމް ސުޕްރީމް ކޯޓުގައި ޑައުން ކުރަން އުއްތަމަ ފަނޑިޔާރު އެންގެވި ކަމަށް ބުނެ އެވެ. އެ މައްސަލާގައި ދައުލަތުން ކުރަނީ ދައުލަތުގެ މަސައްކަތަށް ހުރަސް އެޅުމުގެ ދައުވާ އެވެ.
އެ މައްސަލާގެ މިއަދު ބޭއްވި ފުރަތަމަ އަޑުއެހުން ފެށުމާ އެކު، އުއްތަމަ ފަނޑިޔާރުގެ ވަކީލުން ވަނީ އެ މައްސަލަ ކުރިއަށް ގެންދަނީ ކޮން އިޖްރާއާތެއްގެ ދަށުންތޯ ސުވާލުކުރައްވައިފަ އެވެ.
ޖަވާބުގައި މައްސަލަ ބައްލަވާ ގާޒީ އަހުމަދު ހައިލަމް ވިދާޅުވީ އެ މައްސަލަ މިހާރު ކުރިއަށް ގެންދަނީ ޖިނާއީ އިޖްރާއާތުގެ ގާނޫނުގެ ދަށުން ނޫން ކަމަށާއި ސަބަބަކީ އެ މައްސަލާގައި ދައުލަތުން ތުހުމަތު ކުރާ އަމަލަކީ ކުއްލި ނުރައްކަލުގެ ހާލަތު އިއުލާން ކުރުމުގައި ފާހަގަކޮށްފައިވާ ސަބަބެއް ކަމަށްވާތީ ކަމަށެވެ.
އެކަމަކު ގާނޫނު އަސާސީން ލިބިދޭ ހައްގުތައް އުއްތަމަ ފަނޑިޔާރަށް ލިބޭނެ ކަމަށާއި ޝަރީއަތް ކުރިއަށް ދާނީ އެ ފުރުސަތު ދެވޭނެ ގޮތަކަށް ކަމަށް ގާޒީ ހައިލަމް ވިދާޅުވި އެވެ. އަދި ކުއްލި ނުރައްްކަލުގެ ހާލަތު ނިމުމަކަށް އައިސް، ޖިނާއީ އިޖްރާއާތުގެ ގާނޫނަށް އަމަލުކުރަން ފެށުމުން އެ ޝަރީއަތް ކުރިއަށް ގެންދާނީ އެ ގާނޫނާ އެއްގޮތަށް ކަމަށް ގާޒީ ވިދާޅުވި އެވެ.
ގާޒީ އެގޮތަށް ވިދާޅުވުމުން، އުއްތަމަ ފަނޑިޔާރުގެ ވަކީލުންގެ ޓީމުގައި ހިމެނޭ ކުރީގެ ބަންޑާރަ ނައިބު ހުސްނުއްސުއޫދު ވިދާޅުވީ ލިޔެފައިވާ އިޖްރާއާތެއް ނެތް ނަމަ ޝަރީއަތް ނުކުރެވޭނެ ކަމަށާއި އެހެންވެ، ޖިނާއީ އިޖްރާއާތުގެ ގާނޫނަށް އަމަލުކުރަން ފަށަންދެން އެ ޝަރީއަތް މަޑުޖައްސާލަން އެދިވަޑައިގަންނަވާ ކަމަށް ސުއޫދު ވިދާޅުވި އެވެ. އަދި އެ ގާނޫނަށް މިދިޔަ ޖުލައި މަހު އަމަލުކުރަން ފެށުމުގެ ކުރިން ވެސް ޝަރީއަތް ކުރަމުން ދިޔައީ ޝަރީއަތް ކުރުމާ ބެހޭ ގަވާއިދުގެ ދަށުން ކަމަށް ސުއޫދު ވިދާޅުވި އެވެ. އޭނާ ވިދާޅުވި ގޮތުގައި އިޖްރާއާތެއް ނެތް ނަމަ އުއްތަމަ ފަނޑިޔާރުގެ ދިފާއު ބިނާކުރާނެ ގޮތެއް ވަކީލުންނަށް އެނގިވަޑައިނުގަންނަވާނެ އެވެ.
އެކަމާ ގުޅިގެން ގާޒީ ހައިލަމް ވިދާޅުވީ ޖިނާއީ އިޖްރާއާތުގެ ގާނޫނު ނެތްއިރު ވެސް ޝަރީއަތްތައް ކުރިއަށް ގެންދިޔަ ކަމަށާއި އެހެންވެ، އިޖްރާއާތެއް މިވަގުތު ނެތުމަކީ ޝަރީއަތް ނުކުރެވޭނެ ސަބަބެއް ނޫން ކަމަށެވެ. އަދި އެ ގާނޫނު މިވަގުތު ނެތަސް، ގާނޫނު އަސާސީން ލިބިދޭ ހައްގުތައް ލިބިދެވޭނެ ކަމަށް ވިދާޅުވެ، އެ މައްސަލަ ކުރިއަށް ގެންދެވޭނެ ކަމަށް ގާޒީ ވިދާޅުވި އެވެ.
ދައުލަތުން ދައުވާ އިއްވުމުން، ޖަވާބުދާރީވުމަށް އުއްތަމަ ފަނޑިޔާރަށް ގާޒީ ހައިލަމް ދެއްވީ ފަސް ދުވަހުގެ މުއްދަތަކެވެ. އެކަށީގެންވާ މުއްދަތެއް ދެއްވުމަށް ދިފާއީ ވަކީލުން އެދިވަޑައިގަތަސް، އެ މުއްދަތު ގާޒީ އިތުރުކޮށެއް ނުދެއްވަ އެވެ.
ހުދު ގަމީހަކާއި ނޫ ޓައީއެއް ތުރު ކުރައްވައިގެން ޝަރީއަތުގައި އިންނެވި އުއްތަމަ ފަނޑިޔާރު އަބްދުﷲ ސައީދު މައްސަލައާ ގުޅޭގޮތުން މިއަދު އެއްވެސް ވާހަކަފުޅެއް ނުދައްކަވަ އެވެ. އެމަނިކުފާނުގެ ހަމައެކަނި ވާހަކަ ދެއްކެވީ އެމަނިކުފާނުގެ ނަމާއި އެޑްރެސް ގާޒީ އެއްސެވުމުން އޭގެ ޖަވާބު ޖަވާބު ދެއްވުމަށެވެ.
ޝަރީއަތުގައި އޮންނަ އާންމު އުސޫލުގެ ދަށުން، ގާޒީ ކޯޓު ރޫމަށް ވަދެވަޑައިގަތުމުން އިހްތިރާމް އަދާ ކުރެއްވުމުގެ ގޮތުން އުއްތަމަ ފަނޑިޔާރު ވެސް ކޮޅަށް ތެދުވެ ވަޑައިގަތެވެ. ޝަރީއަތް ފެށުމުގެ ކުރިން، އެމަނިކުފާނުގެ ނަމާއި އެޑްރެސް ގާޒީ އެއްސެވުމުން އެމަނިކުފާނު ފުރަތަމަ ޖަވާބު ދެއްވީ ކޯޓުގެ އާންމު އުސޫލާ ޚިލާފަށް، އިށީނދެ އިންނަވައިގެންނެވެ. ކޮޅަށް ތެދުވެ ހުންނަވައިގެން ވާހަކަ ދައްކަވަން ކޯޓު އޮފިސަރު އެންގެވުމުން ދެން އެމަނިކުފާނު ވާހަކަ ދެއްކެވީ ކޮޅަށް ހުންނަވައިގެންނެވެ.
މިއީ އުއްތަމަ ފަނޑިޔާރުގެ މަގާމުގައި ހުންނެވި ބޭފުޅެއްގެ މައްޗަށް ޖިނާއީ ދައުވާއެއް އުފުލައި، ޝަރީއަތް ހިންގާ ފުރަތަމަ ފަހަރެވެ.
އުއްތަމަ ފަނޑިޔާރުގެ އިތުރުން ސުޕްރީމް ކޯޓުގެ ފަނޑިޔާރު އަލީ ހަމީދާއި ޖުޑިޝަލް އެޑްމިނިސްޓްރޭޓާ ހަސަން ސައީދު އަދި ކުރީގެ ރައީސް މައުމޫން އަބްދުލްގައްޔޫމްގެ މައްޗަށް ވެސް ދައުލަތުން ވަނީ ދައުވާ އުފުލައިފަ އެވެ. އެ ބޭފުޅުންނަށް ކުރަނީ ކޮން ދައުވާތަކެއް ކަމެއް އަދި ސާފެއް ނުވެ އެވެ.
