ރައީސް އަބްދުﷲ ޔާމީން ސަރުކާރުގެ އިގްތިސާދީ އެޖެންޑާ އަށް ޗައިނާގެ އެގްޒިމް ބޭންކްގެ ފުރިހަމަ އިތުބާރު އެބައޮތް ކަމަށް އެ ބޭންކުން މިއަދު ބުނެފި އެވެ.
ޗައިނާގައި ހުންނަވާ ދިވެހި ސަފީރު މުހައްމަދު ފައިސަލް ވަނީ އެގްޒިމް ބޭންކްގެ އޮފިޝަލުންނާ ބައްދަލު ކުރައްވައި، ރާއްޖޭގައި މިވަގުތު އޮތް ހާލަތު އޮޅުން ފިލުވަދެއްވައިފަ އެވެ. އަދި އެގްޒިމް ބޭންކްގެ ލޯނު އެހީގައި ރާއްޖޭގައި ހިންގަމުން އަންނަ މަޝްރޫއުތަކުގެ މައުލޫމާތު އޭނާ ހިއްސާ ކުރެއްވި އެވެ.
މި ބައްދަލުވުމުގައި އެގްޒިމް ބޭންކްގެ ޑެޕިއުޓީ ޖެނެރަލް މެނޭޖަރު ލީ ޑަން ވިދާޅުވީ ރާއްޖޭގެ އިގްތިސާދީ ދުވެލި ހުއްޓުމެއް ނެތި ކުރިއަށްދާ ކަމާ މެދު ޝައްކު ނުކުރައްވާ ކަމަށެވެ. އަދި ކުރިމަގުގައި ރާއްޖޭގެ ތަރައްގީގެ ގާތް އެކުވެރިއެއްގެ ގޮތުގައި އެގްޒިމް ބޭންކް ދެމިއޮންނާނެ ކަމަށް އޭނާ ވިދާޅުވި އެވެ.
ޗައިނާގައި ހުންނަ ދިވެހި އެމްބަސީން ބުނީ އެގްޒިމް ބޭންކްގެ އޮފިޝަލުންނާ އެކު ބޭއްވި ބައްދަލުވުމުގައި ފައިސަލް ދެއްކެވި ވާހަކައިގައި، މި ވަގުތު ހިންގާ ބޮޑު ދެ މަޝްރޫއު ކަމަށްވާ މާލެ އާއި ހުޅުލެއާ ދެމެދު އަޅަމުން އަންނަ ބްރިޖާއި ވެލާނާ އިންޓަނޭޝަނަލް އެއާޕޯޓުގެ ރަންވޭ މަޝްރޫއު ވަރަށް ބާރަށް ކުރިއަށްދާ ކަމަށް ވިދާޅުވި ކަމަށެވެ. އަދި މި ދެ މަޝްރޫއު ހުއްޓުމެއް ނެތި ކުރިއަށް ގެންދިއުމުގައި ޗައިނާގެ ކަމާ ބެހޭ ފަރާތްތަކުން ދެމުން އަންނަ އެއްބާރުލުމަށް ފައިސަލް ވަނީ ޝުކުރު އަދާކުރައްވައިފަ އެވެ.
ސަފީރު ވިދާޅުވި ގޮތުގައި އިދިކޮޅު ސިޔާސީ ބޭފުޅުން ހިމެނޭ ގޮތަށް ނުވަ ގައިދީއަކު ދޫކޮށްލުމަށް ސުޕްރީމް ކޯޓުން މިދިޔަ ފެބްރުއަރީ 1 ގައި ނެރުނު އަމުރާ ގުޅިގެން ގޮންޖެހުންތަކެއް ކުރިމަތިވި ކަމަށެވެ. އެ ގޮންޖެހުން ކުރިމަތިވީ އިގްތިސާދީ އެޖެންޑާ ކުރިއަރުވައި، ދިވެހިންގެ ދިރިއުޅުމުގެ ހާލަތު ރަނގަޅު ކުރުމަށް ގިނަ މަސައްކަތްތަކެއް ކުރަމުން ދިޔަ ދަނޑިވަޅެއްގައި ކަމަށް އޭނާ ވިދާޅުވި އެވެ.
ފާއިތުވެދިޔަ ހަތަރު އަހަރު ރާއްޖެ އަށް ލިބުނު ކުރިއެރުންތައް ފާހަގަ ކުރައްވައި، ސަފީރު ވިދާޅުވީ މިދިޔަ އަހަރަކީ ބޭރުގެ ގިނަ އިންވެސްޓްމަންޓުތަކެއް ރަޖިސްޓްރީ ކުރެވުނު އަހަރެއް ކަމަށެވެ. އަދި ރާއްޖެއާ މެދު ބޭރުގެ އިންވެސްޓަރުންގެ އިތުބާރު އިތުރުވެފައިވާ ކަން އޭނާ ފާހަގަކުރެއްވި އެވެ.
ރާއްޖޭގެ ހާލަތު ގޯސް ނުވި ނަމަވެސް، ކުއްލި ހާލަތު އިއުލާން ކުރުމުން، ބައެއް ނޭދެވޭ އަސަރު ކުރިކަން އޭނާ ފާހަގަކުރެއްވި އެވެ. ނަމަވެސް ފާއިތުވެދިޔަ ދެ މަހު ވެސް ޓޫރިޒަމް އަދި ސިނާއަތްތަކަށް ކުރިއެރުން ލިބިފައިވާ ކަން ސަފީރު ފާހަގަކުރެއްވި އެވެ. އަދި ސަރުކާރުން ރާއްޖޭގެ އެކިއެކި ކަންކޮޅުތަކުގައި ހިންގަމުންދާ ތަރައްގީގެ ހުރިހާ މަޝްރޫއެއް ހުއްޓުމެއް ނެތި ކުރިއަށްދާކަން އޭނާ ފާހަގަކުރެއްވި އެވެ.
މި ބައްލުވުމުގައި ދެއްވި މައުލޫމާތަށް އެގްޒިމް ބޭންކްގެ ޑެޕިއުޓީ ޖެނެރަލް މެނޭޖަރު ޝުކުރު އަދާކުރެއްވި ކަމަށް ދިވެހި އެމްބަސީން ބުންޏެވެ. ރާއްޖޭގެ ހާލަތު ގާތުން ބަލަމުން ގެންދާ ކަމަށާއި މިއަދު ލިބުނު މައުލޫމާތަކީ ވަރަށް މުހިންމު މައުލޫމާތުތަކެއްކަން އޭނާ ފާހަގަކުރެއްވި ކަމަށް އެމްބަސީން ބުންޏެވެ.
