މި އަހަރުގެ ރިޔާސީ އިންތިހާބުގެ ކުރިން ވެސް ރާއްޖޭގައި ގާނޫނުގެ ބާރު ފުރިހަމަ އަށް ހިނގާ ގޮތް ހެދުމަކީ މުހިއްމު ކަމެއް ކަމަށް އިންޑިޔާ އިން މިއަދު ބުނެފި އެވެ.
މިދިޔަ މަހުގެ 5 ވަނަ ދުވަހު ރައީސް ޔާމީން އިއުލާން ކުރެއްވި ކުއްލި ނުރައްކަލުގެ ހާލަތު، 45 ދުވަހަށް ފަހު އުވައިލުމުން އެކަމަށް މަރުހަބާ ކިޔައި އިންޑިޔާގެ ފޮރިން މިނިސްޓްރީން ނެރުނު ބަޔާނުގައި ބުނީ ރާއްޖޭގެ ގާނޫނުއަސާސީގެ ހުރިހާ މާއްދާތަކެއް އަލުން އިއާދަކޮށް ސުޕްރީމް ކޯޓާއި ޝަރުއީ ނިޒާމު ފުރިހަމަކަމާ އެކު ހިންގުމުގެ ފުރުސަތު ދޭން ޖެހޭ ކަމަށެވެ.
ނުފޫޒުތަކުން އެއްކިބާވެފައިވާ މަޖިލީހެއް ހިންގުމުގެ ފުރުސަތު ދިނުމަށް ވެސް އިންޑިޔާ އިން ދިވެހި ސަރުކާރަށް ގޮވާލާފައިވެ އެވެ. މީގެ އިތުރުން ސުޕްރީމް ކޯޓުން މިދިޔަ މަހުގެ ފުރަތަމަ ދުވަހު ނެރުނު އަމުރު ތަންފީޒުކޮށް ސިޔާސީ ޕާޓީތަކުގެ މެދުގައި މަޝްވަރާތައް ބޭއްވުމަށް ވެސް އެ ގައުމުން ގޮވާލައިފައި ވެ އެވެ.
"ރާއްޖޭގެ ގާނޫނުއަސާސީގެ ހުރިހާ މާއްދާތަކެއް އަލުން އިއާދަކޮށް ސުޕްރީމް ކޯޓާއި ޝަރުއީ ނިޒާމު އިންސާފުވެރިކަމާ އެކު ފުރިހަމަ އަށް ހިންގުމުގެ ފުރުސަތު ދިނުމަށާއި ނުފޫޒުތަކުން އެއްކިބާވެފައިވާ މަޖިލީހެއް ހިންގުމުގެ ފުރުސަތު ދިނުމަށް ދިވެހި ސަރުކާރަށް ގޮވާލަމެވެ. އަދި އެއާ އެކު ސުޕްރީމް ކޯޓުގެ ހުރިހާ ފަނޑިޔާރުންގެ އިއްތިފާގުން ފެބްރުއަރީ 1ވަނަ ދުވަހު ނެރުނު އަމުރު ތަންފީޒުކޮށް ސިޔާސީ ޕާޓީތަކުގެ މެދުގައި މަޝްވަރާތައް ބޭއްވުމަށް ވެސް ގޮވާލަމެވެ. ދިވެހި ސަރުކާރުން ސިޔާސީ ހަރަކާތްތައް ފުރިހަމަ އަށް ހިންގުމުގެ ފުރުސަތު ދީ ގާނޫނުގެ ބާރު ފުރިހަމަ އަށް ހިނގާ ގޮތް މި އަހަރުގެ ރިޔާސީ އިންތިހާބުގެ ކުރިން ހެދުމަކީ މުހިއްމު ކަމެއް ގޮތުގައި ދެކެމެވެ،" އިންޑިޔާގެ ބަޔާނުގައިވެ އެވެ.
އިންޑިޔާ އިން ބުނީ ކުއްލި ނުރައްކަލުގެ ހާލަތު އުވައިލުމަކީ ރާއްޖޭގެ ސިޔާސީ މަސްރަހަށް ދިމާވެފައިވާ މައްސަލަތައް ހައްލުކުރަން އެޅިދާނެ ފިޔަވަޅެއް ކަމަށެވެ. ނަމަވެސް ބައިނަލްއަގުވާމީ މުޖުތަމައުން ފާޅުކުރި ގިނަ ކަންބޮޑުވުންތަކަށް އަދި ވެސް ހައްލެއް ނުލިބޭ ކަން ބަޔާނުގައި ފާހަގަކުރި އެވެ.
ސަލާމަތީ ކަންކަން ގުޅިލާމެހިފައިވާ އަވަށްޓެރި ގައުމެއްގެ ހައިސިއްޔަތުން ރާއްޖެއަށް އެދެނީ އަމާންކަމާއި އޮމާންކަމަށް ކަމަށް ވެސް އިންޑިޔާ އިން ބުންޏެވެ.
