ރާއްޖެ އާއި ޒެމްބިއާއާ ދެމެދު ސިޔާސީ ގުޅުން މިއަދު ގާއިމްކޮށްފި އެވެ.
މިއީ ރާއްޖެ އިން ސިޔާސީ ގުޅުން ގާއިމްކުރި 166 ވަނަ ގައުމެވެ.
ބަނޑޮސް އައިލެންޑް ރިސޯޓުގައި ބޭއްވި ރަސްމިއްޔާތެއްގައި، ސިޔާސީ ގޮތުން ދެ ގައުމު ގުޅުނު ލިއުމުގައި ދިވެހި ސަރުކާރުގެ ފަރާތުން ސޮއި ކުރެއްވީ ރާއްޖެ އިން އދ. އަށް ކަނޑައަޅާފައި ހުންނަވާ ދާއިމީ މަންދޫބު ޑރ. އަލީ ނަސީރު މުހައްމަދެވެ. ޒެމްބިއާ ސަރުކާރުގެ ފަރާތުން ސޮއިކުރެއްވީ އެ ގައުމުން އދ. އަށް ކަނޑައަޅާފައި ހުންނަވާ ދާއިމީ މަންދޫބު ލަޒަރޫޒް ކަޕަމްވޭ އެވެ. ރާއްޖޭގެ ފޮރިން މިނިސްޓްރީން ބުނީ ދެ ގައުމުގެ ދެމެދު ސިޔާސީ ގުޅުން ގާއިމް ކުރުމަކީ އެކި ދާއިރާތަކުން ގުޅުން ބަދަހި ކުރަން ހުޅުވުނު ފުރުސަތެއް ކަމަށެވެ. ޚާއްސަކޮށް، މިއީ އެފްރިކާ ބައްރުގެ ގައުމުތަކާ އެކު ގުޅުން ބަދަހިކުރަން ރާއްޖެ އަށް ހުޅުވިގެން ދިޔަ ދޮރެއް ކަމަށް ވެސް ފޮރިން މިނިސްޓްރީން ވަނީ ބުނެފަ އެވެ.
ޒެމްބިއާ އެކު ރާއްޖެ އިން ސިޔާސީ ގުޅުން ގާއިމްކުރި އިރު، އދ. ގެ އެންމެ ބާރު ގަދަ އަދި އެންމެ ވާދަވެެރި ކައުންސިލް ކަމަށްވާ ސެކިއުރިޓީ ކައުންސިލްގެ މެމްބަރު ކަމަށް ރާއްޖެ އިން ވާދަ ކުރުމަށް ވޯޓު ހޯދުމުގެ ކެމްޕޭން ކުރި ގައުމުތަކުގެ ތެރޭގައި އެ ގައުމު ހިމެނެ އެވެ. ސެކިއުރިޓީ ކައުންސިލްގެ ގޮނޑި އަށް ޒެމްބިއާގެ ތާއީދު ހޯދުމުގެ ގޮތުން އެ ގައުމާ އެކު ދިވެހި ސަރުކާރުން ވަނީ ވާހަކަ ދައްކައިފަ އެވެ.
އާބާދީގައި ގާތްގަނޑަކަށް 16 މިލިއަން މީހުން ހިމެނޭ ޒެމްބިއާ އަކީ އެފްރިކާ ބައްރުގައި އޮންނަ ހަތް ގައުމުގެ ތެރެއިން އެއް ގައުމެވެ.
