ރާއްޖޭގެ އިތުރުން އެހެން ގައުމެއްގެ ރަށްވެހިކަން ހޯދާފައިވާ މީހަކު ބޭރުގެ ރަށްވެހިކަން ދޫކޮށްލާތާ 10 އަހަރު ފަހުން ނޫނީ ރިޔާސީ އިންތިހާބަށް ކުރިމަތިނުލެވޭ ގޮތަށް، ރިއާސީ އިންތިހާބުގެ ގާނޫނު އިސްލާހު ކުރަން ޕީޕީއެމުން މަޖިލީހަށް މިއަދު ހުށަހަޅައިފި އެވެ.
ވިލިމާލެ ދާއިރާގެ މެމްބަރު، އަދި ޕީޕީއެމް ޕާލަމެންޓްރީ ގުރޫޕްގެ ލީޑަރު އަހުމަދު ނިހާން ހުށަހެޅުއްވި އިސްލާހުގައި ބުނެފައިވަނީ އެއްވެސް އިރެއްގައި ބޭރު ގައުމެއްގެ ރައްޔިތަކަށް ވެފައި ވާ ނަމަ އެފަދަ މީހަކަށް ރިޔާސީ އިންތިހާބަށް ކުރިމަތިލެވޭނީ އެމީހަކު ބޭރުގެ ރައްޔިތުކަން ދޫކޮށްލިތާ 10 އަހަރު ފަހުން ކަމަށެވެ.
ރާއްޖޭގެ ގާނޫނުއަސާސީގެ 109 ވަނަ މާއްދާގައިވާ ގޮތުން ބޭރު ގައުމެއްގެ ރައްޔިތަކަށް ރާއްޖޭގެ ރައީސްކަމުގެ މަގާމަށް ކުރިމައްޗެއް ނުލެވޭނެ އެވެ. އެކަމަކު ބޭރުގެ ރައްޔިތުކަން ދޫކޮށްލައިފި ނަމަ ރިޔާސީ އިންތިހާބުގައި ބައިވެރިވެވޭނީ ވަކި މުއްދަތެއްގެ ފަހުން ކަމަކަށް ކަނޑައަޅާފައެއް ވެސް ނުވެ އެވެ.
ނިހާން ވިދާޅުވީ އެ އިސްލާހު ގެންނަން ނިންމީ ބޭރުގެ ގައުމެއްގެ ނުފޫޒުން ރާއްޖެ އެއްކިބާ ކުރުމަށް ކަމަށެވެ. އަދި އެއީ ރާއްޖޭގެ މިނިވަންކަން ދަމަހައްޓަން ގެންނަ އިސްލާހެއް ކަމަށް ވެސް އޭނާ ވިދާޅުވި އެވެ.
ނިހާންގެ އެ އިސްލާހުގެ އިތުރުން ސަރުކާރުގެ ފަރާތުން ވަނީ އިންތިހާބުތަކާ ބެހޭ ގާނޫނަށް ވެސް ބޮޑެތި އިސްލާހުތަކެއް ހުށަހަޅާފަ އެވެ.
އޭގެ ތެރޭގައި ވޯޓު ކަރުދާހުގައި ޖަހަން ޖެހޭ ފާހަގަ ނޫން އެހެން އެއްޗެއް ކުރަހައިފި ނަމަ ނުވަތަ އެއްޗެއް ލިޔެފި ނަމަ އެ ވޯޓެއް ބާތިލްވުމާއި ރިޔާސީ އިންތިހާބުގައި ވާދަކުރާ ކެންޑިޑޭޓުންނަށް ރާއްޖޭގެ ހުރިހާ ޓީވީ ޗެނަލްތަކަކުން އެއް ހަމައެއްގައި ފުރުސަތު ދިނުން ލާޒިމްކޮށް، އަދި ވަކި ކެންޑިޑޭޓަކަށް އިތުރަށް ވަގުތު ނުވިއްކޭ ގޮތަށް ހެދުން ވެސް ހިމެނެ އެވެ.