ސަރުކާރުން އިބޫ އަށް މަރުހަބާ ކިޔައި، މަޝްވަރާ އަށް އައުމަށް އެމްޑީޕީ އަށް ގޮވާލައިފި

މި އަހަރުގެ ރިޔާސީ އިންތިޚާބަށް އިދިކޮޅު އެމްޑީޕީން ނެރޭ ކެންޑިޑޭޓަކީ، އެ ޕާޓީގެ ޕާލަމެންޓްރީ ގުރޫޕުގެ ލީޑަރު އިބްރާހިމް މުހައްމަދު ސޯލިހް (އިބޫ) ކަމަށް ފާސްކުރުމުން، ސަރުކާރުން އެކަމަށް މަރުހަބާ ކިޔައި މަޝްވަރާ އަށް އައުމަށް އެމްޑީޕީ އަށް މިރޭ ގޮވާލައިފި އެވެ.

ސަރުކާރުން މިކަމަށް ގޮވައިލީ، ސިޔާސީ ޕާޓީތަކުގެ މަޝްވަރާގައި ސަރުކާރު ތަމްސީލް ކުރާ އިސް މަންދޫބު ނުވަތަ އޯލް ޕާޓީ ޓޯކްސްގެ ޗެއާޕާސަން ފިޝަރީޒް މިނިސްޓަރު ޑރ. މުހައްމަދު ޝައިނީ ނެރުއްވި ބަޔާނެއްގަ އެވެ.

ޝައިނީ މި ބަޔާން ނެރުއްވިއިރު، އޭނާ މިއަދު ކުރެއްވި ޓުވީޓެއްގައި ވިދާޅުވެފައި ވަނީ އެމްޑީޕީގެ ރިޔާސީ ކެންޑިޑޭޓަކަށް ހިންނަވަރު ދާއިރާގެ މެމްބަރު އިބޫ ހަމަޖެއްސުމަކީ ރަނގަޅު ނިންމުމެއް ކަމަށާއި އޭގެ ސަބަބުން ސިޔާސީ ހަމަޖެހުން ވެސް އަންނާނެ ކަމަށެވެ.

އެ ޓުވީޓު ކުރެއްވިތާ ހައެއްކަ ގަޑިއިރު ފަހުން، އޯލް ޕާޓީ ޓޯކްސްގެ އެންމެ އިސްވެރިޔާގެ ހައިސިއްޔަތުން ނެރުއްވި ބަޔާނުގައި ޝައިނީ ވިދާޅުވީ، ރިޔާސީ އިންތިޚާބަށް ޝަރުތު ހަމަވާ ބޭފުޅަކު އެމްޑީޕީން ކަނޑައެޅުމަކީ ޑިމޮކްރެސީ ކުރިއެރުވުމަށާއި މިނިވަން، އިންސާފުވެރި އަދި ދެފުށް ފެންނަ އިންތިޚާބަކަށް މަގުފަހިވާނެ ކަމެއް ކަމަށެވެ.

ޔޫރަޕިއަން ޔޫނިއަން (އީޔޫ) އާ އެކު މަތީ ފެންވަރުގެ މަޝްވަރާތަކެއް ކުރުމަށް މިދިޔަ ހަފުތާގައި ބެލްޖިއަމަށް ދިޔަ ދިވެހި ސަރުކާރުގެ އިސްވެރިންގެ ވަފުދުގައި ހިމެނިވަޑައިގަންނަވާ ޝައިނީ ވިދާޅުވީ، އެމްޑީޕީން އެޅި އެ ފިޔަވަޅުގެ ސަބަބުން، މިހާތަނަށް އޮތް އުފެދިފައި އޮތް ސިޔާސީ ހިޔާލު ތަފާތުވުންތައް ހައްލު ކުރުމަށްޓަކައި މަޝްވަރާ ފެށުމުގެ ފުރުސަތު ހުޅުވޭނެ ކަމަށް އުންމީދު ކުރައްވާ ކަމަށެވެ.

އަދި މިނިވަން، އިންސާފުވެރި، ދެފުށް ފެންނަ، ކާމިޔާބު ރިޔާސީ އިންތިޚާބެއް މި އަހަރު ބޭއްވުމަށްޓަކައި ސިޔާސީ ޕާޓީތަކުގެ މަޝްވަރާ އަށް އައުމަށް އަނެއްކާ ވެސް ގޮވައިލައްވާ ކަމަށް ޝައިނީ ވިދާޅުވި އެވެ.

"ރިޔާސީ އިންތިޚާބާ ގުޅޭ ގޮތުން ހުރި ކަންބޮޑުވުންތަކަށް ހައްލު ހޯދައި، ކުރިއަށް ގެންދާނެ މަގެއް ހޯދުމަށްޓަކައި މަޝްވަރާ އަށް އައުމަށް އެދެން،" ޝައިނީ ވިދާޅުވި އެވެ.

އިބޫ އަކީ، ސިޔާސީ ޕާޓީތަކުގެ މަޝްވަރާގައި އެމްޑީޕީ ތަމްސީލް ކުރައްވާ އެންމެ އިސް ބޭފުޅާ ވެސް މެ އެވެ.

ރިޔާސީ އިންތިޚާބާ ގުޅޭ ގޮތުން އިލެކްޝަންސް ކޮމިޝަނަށް ލަފާދިނުމަށްޓަކައި އުފައްދާފައިވާ ކޮމެޓީ އެމްޑީޕީން ބޮއިކޮޓް ކޮށްފައި އޮތް އޮތުން އަނބުރާ ގެންގޮސް އޮމާން އިންތިޚާބެއް ބޭއްވުމަށް އެ ކޮމިޝަނަށް އެއްބާރުލުން ދިނުމަށް ވެސް ޝައިނީ ވަނީ ގޮވާލައްވައިފަ އެވެ.

ބަޔާން ނިންމަވައިލައްވަމުން ޝައިނީ ވިދާޅުވީ ސިޔާސީ ގޮތުން ހުރި ހިޔާލު ތަފާތުވުންތައް ނައްތާލައި، އޮމާން، މިނިވަން، އިންސާފުވެރި އަދި ދެފުށް ފެންނަ އިންތިޚާބެއް ބޭއްވުމަށްޓަކައި ހުރިހާ ސިޔާސީ ޕާޓީތަކުން މަޝްވަރާ ކުރާނެ ކަމަށް އުންމީދު ކުރައްވާ ކަމަށެވެ.

އެމްޑީޕީގެ ރިޔާސީ ކެންޑިޑޭޓަކަށް އިބޫ ހަމަޖެއްސި ދަނޑިވަޅާ ދިމާކޮށް، އަނެއްކާ ވެސް ސިޔާސީ ޕާޓީތަކުގެ މަޝްވަރާ އަށް ސަރުކާރުން ގޮވާލިއިރު، ސަރުކާރާއި އިދިކޮޅު ފަރާތްތަކުގެ ހިޔާލު ތަފާތުވުން ބޮޑުވެ، އެއީ މިހާތަނަށް ކާމިޔާބުކަމާ އެކު ކުރިއަށް ގެންދެވިފައިވާ މަޝްވަރާ އެއް ނޫނެވެ. އެގޮތުން، ރާއްޖޭގެ ސިޔާސީ މަސްރަހު ފިނިކުރުމަށްޓަކައި އދ. ގެ މަންދޫބެއް ވެސް ސަރުކާރުން ކަނޑައެޅި އެވެ. އެކަމަކު، އޭނާ މެދުވެރިއަކަށް ވެގެން ވެސް ސަރުކާރާއި އިދިކޮޅު ފަރާތްތަކުގެ މަޝްވަރާ ކުރިއަށް ގެންދެވޭ ގޮތެއް ނުވި އެވެ.