ލިޔުމެއްގެ މައްސަލާގައި ހއ. ދިއްދޫގެ ތިން ކައުންސިލަރަކަށް ޕްރޮސެކިއުޓާ ޖެނެރަލް (ޕީޖީ) އޮފީހުން ދައުވާކޮށްފި އެވެ.
އެމްޑީޕީގެ ތިން މެމްބަރުން ކަމަށްވާ ދިއްދޫ ކައުންސިލްގެ ރައީސް އަލީ ހާޝިމާއި ނައިބު ރައީސް މުހައްމަދު ހާޝިމްގެ އިތުރުން ކައުންސިލް މެމްބަރު ޒުހުރާ އަށް ދައުވާކޮށްފައި ވާއިރު ކައުންސިލްގެ އިދާރީ މުވައްޒަފެއް ކަމަށްވާ އަބްދުލް މަތީނަށް ވެސް ވަނީ ދައުވާކޮށްފަ އެވެ.
ދައުވާއާ ގުޅިގެން މި އެންމެން މިއަދު މެންދުރު ފަހު 2:00 އަށް ދިއްދޫ މެޖިސްޓްރޭޓް ކޯޓަށް ހާޒިރުވާން ވަނީ އަންގައިފަ އެވެ.
ކައުންސިލް ރައީސް ހާޝިމަށް ތިން ދައުވާއެއް ކުރެ އެވެ. އެއީ އެނގިހުރެ ސައްހަ ނޫން ގޮތުގައި ލިޔުމެއް އުފެއްދުމުގައި ބައިވެރިވުމާއި ސައްހަ ނޫން ލިޔުންގެ ތެދުކަން ދެއްކުމާއި އަދުލް އިންސާފު ގާއިމްކުރަން ހުރަސްއެޅުމެވެ. ދެން ބާކީ ތިބި ދެ ކައުންސިލަރުންނަށް ކުރަނީ އެނގިހުރެ ސައްހަ ނޫން ގޮތުގައި ލިޔުމެއް އުފެއްދުމުގައި ބައިވެރިވުމުގެ ދައުވާ އެވެ.
ލިޔެކިޔުމުގެ މައްސަލައެއްގައި ހާޝިމް ވަނީ މިދިޔަ މެއި މަހު ހައްޔަރު ވެސް ކޮށްފަ އެވެ.
ލޯކަލް ގަވަމެންޓް އޮތޯރިޓީ (އެލްޖީއޭ) އިން މީގެ ކުރިން ވަނީ އެ ރަށު ކައުންސިލަރުން ދެ ފަހަރަށް ސަސްޕެންޑް ކޮށްފަ އެވެ. ދެން ސަސްޕެންޑް ކުރަން ޖެހިއްޖެނަމަ ދިއްދޫ ކައުންސިލް އުވާލާނެ ކަމުގެ އިންޒާރު އެލްޖީއޭ އިން ވަނީ ދީފަ އެވެ.