އިބޫ އެދިވަޑައިގަންނަވަނީ "ލީޑަރުންގެ ހިދުމަތަށް"، އެ ބޭފުޅުން ކޮބާ؟

އިންތިހާބު ކާމިޔާބު ކުރެއްވުމަށް ސިޔާސީ ޕާޓީތަކުގެ ލީޑަރުންގެ އެހީތެރިކަމަށް އިދިކޮޅު ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އިއްޔެ އެދިވަޑައިގަތުމުން، އެ ވިދާޅުވާ ލީޑަރުން ކޮބައިތޯ ސުވާލު އުފެދިއްޖެ އެވެ.

ކުރިއަށް އޮތް ރިޔާސީ އިންތިހާބަށް ވޯޓު ލައްވަން ރީ-ރެޖިސްޓްރީ ކުރުމަށް މޯލްޑިވިއަން ޑިމޮކްރެޓިކް ޕާޓީގެ ހަރުގެއަށް ވަޑައިގެން އިބޫ ވިދާޅުވީ "ޕާޓީގެ ލީޑަރުން އިންތިހާބަށް ހިދުމަތް ކުރެއްވުމަށް ތަކުރާރުކޮށް ދަންނަވާ" ކަމަށެވެ.

"ހަމައެއާ އެކުގައި އަދިވެސް ތަކުރާރުކޮށް މި ދަންނަވަނީ މިނިވަން، އިންސާފުވެރި އިންތިހާބަކަށް މި އިންތިހާބު ހެދުމަށް ޕާޓީގެ ލީޑަރުން ހިދުމަތްކޮށްދެއްވާށޭ. އެހެންނޫނީ އަޅުގަނޑުމެން ގަބޫލުކުރާ އިންތިހާބަކަށް މި އިންތިހާބުވެގެން ނުދާނެ،" އޭނާ ވިދާޅުވި އެވެ.

އިބޫގެ ވާހަކާގައި ލީޑަރުންގެ ނަމެއް ވިދާޅެއް ނުވެ އެވެ. އެކަމަކު ކެންޑިޑޭޓެއްގެ ގޮތުގައި އޭނާ ނެގި ފަހުން، އިންތިހާބުގެ ކެމްޕޭންގެ ބައެއްގެ ގޮތުގައި ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހިމް މަސައްކަތެއް އަދި ނުފައްޓަވަ އެވެ. މިހާރުގެ ހާލަތާ މެދު ދޭތެރެ ދޭތެރެއިން ޓްވީޓް ކުރެއްވުން ފިޔަވައި، އެ ބޭފުޅުންގެ ފަރާތުން އާންމުންނަށް އެއްވެސް ވާހަކައެއް އަދި ނީވެ އެވެ.

ބައެއް މީހުން ތުހުމަތުކުރާ ގޮތުގައި ނަޝީދާއި ގާސިމް އަދިވެސް ތިއްބެވީ އިންތިހާބުގައި ވާދަކުރައްވާނެ ފުރުސަތު ލިބިވަޑައިގެންފާނެކަމުގެ އުއްމީދުގަ އެވެ. އެހެންކަމުން އެ ބޭފުޅުން ބޭރުގައި ތިއްބަވައިގެން ކުރެއްވޭނެ އެންމެ ބޮޑަކަށް މަސައްކަތް ފައްޓަވާނީ ރިޔާސީ އިންތިހާބަށް ކުރިމަތިލާން އިލެކްޝަންސް ކޮމިޝަނުން މިހާރު ހުޅުވާލާފައިވާ ފުރުސަތު ހަމަވުމުން ކަމަށް، އެގޮތަށް ތުހުމަތުކުރާ މީހުން ދެކެ އެވެ.

އެމްޑީޕީގެ ރިޔާސީ ޓިކެޓް ހޯއްދަވަން އެ ޕާޓީގެ ޕްރައިމަރީ އޮތް ދުވަސްވަރު ނަޝީދު ވަނީ ސްކައިޕް އާއި ފޭސްބުކް މެދުވެރިކުރައްވާ ވަރަށް ބޮޑު ކެމްޕޭނެއް ކުރައްވައިފަ އެވެ. އެކަމަކު އިބޫއާ ގުޅޭ އެފަދަ ކެމްޕޭނެއް ނަޝީދު އަދި ނުފައްޓަވަ އެވެ.

"ލީޑަރުން ހިދުމަތްކޮށްދޭން" އިބޫ ގޮވާލެއްވުމުން އެފަދަ ކަމެއްގައި މިވަގުތު ކިރިޔާ ވެސް އެހީތެރިކަމެއް ވެދެއްވޭނެ ހާލަތެއްގައި ތިއްބެވީ ވެސް ނަޝީދާއި ގާސިމެވެ. އިދިކޮޅު ހަރަކާތުގެ އަނެއް ދެ ލީޑަރުން ކަމަށްވާ ކުރީގެ ރައީސް މައުމޫން އަބްދުލްގައްޔޫމް ވަނީ ޖަލަށް ލާފަ އެވެ. އަދި އަދާލަތު ޕާޓީގެ ރައީސް އިމްރާން އަބްދުﷲ ވެސް ހުންނެވީ ބަންދުގަ އެވެ. އެހެންކަމުން މި ކެމްޕޭންގައި އެ ބޭފުޅުންގެ އަޑު އިއްވޭނެ ފުރުސަތެއް ނެތެވެ.

އެކަމަކު އިބޫގެ ވާހަކަ އަމާޒުވަނީ ހަމައެކަނި އިދިކޮޅު ލީޑަރުންނަށް ނޫން ކަމަށް އޭނާގެ ތަރުޖަމާން މާރިޔާ އަހުމަދު ދީދީ ވިދާޅުވި އެވެ. ހާއްސަކޮށް ރައީސް އަބްދުﷲ ޔާމީންގެ ޒިންމާ، އިންތިހާބުގެ މިނިވަންކަމާއި އިންސާފުވެރިކަން ދަމަހައްޓަން ވަރަށް މުހިންމު ކަމަށް ވެސް އޭނާ ވިދާޅުވި އެވެ.

"ވަކި ބަޔަކު އިސްތިސްނާވާ ގޮތަކަށް ނޫން އެ ވާހަކަތައް ދެއްކެވީ،" މާރިޔާ ވިދާޅުވި އެވެ.

"ހުރިހާ ބޭފުޅުން ވެސް އެބަ މަސައްކަތް ކުރައްވަން ޖެހޭ މިނިވަން، އިންސާފުވެރި އިންތިހާބަކަށް. ރައީސް ޔާމީން އެބަ ޖެހޭ އަދި ވަކިން ހާއްސަކޮށް މިއީ އިންސާފުވެރި އިންތިހާބަކަށް ހެދުމަށް ފުރުސަތު ހުޅުވާލަން."

ޕީޕީއެމްގެ މަޖިލިސް މެމްބަރެއް ކަމަށްވާ އަދި އެ ޕާޓީގެ ތަރުޖަމާން އަލީ އާރިފް ވިދާޅުވީ އިބޫގެ ވާހަކަތަކުން އިދިކޮޅު އިއްތިހާދު ތެރޭގައި އޮތް ބައިބައިވުން ހާމަވާ ކަމަށެވެ.

"އަޅުގަނޑުމެންނަށް އެނގޭ އިއްތިހާދޭ ކިޔައިގެން އުޅުނު ނަމަވެސް ހަގީގަތުގައި ބައިބައިވުން އުފެދިފައިވާކަން. ނަޝީދު ބޭނުންފުޅުވޭ އަމިއްލަފުޅަށް ވެރިކަން ކުރައްވަން. ގާސިމް ވެސް ހަމަ އެގޮތަށް،" އާރިފް ވިދާޅުވި އެވެ.