ފުލުހުންނާ ބެހޭ ގޮތުން އިބޫ ދެއްކެވި ވާހަަކަތަކެއް ތަހުގީގު ކުރަނީ

މި މަހު 23ގައި ބާއްވާ ރިޔާސީ އިންތިހާބަށް ކެމްޕޭން ކުރެއްވުމަށް، އިދިކޮޅު ކޯލިޝަން ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ނ. އަތޮޅަށް ކުރެއްވި ދަތުރުގައި، އެ އަތޮޅު މާޅެންދު އަށް ވަޑައިގެން އެ ރަށު ރައްޔިތުންނާ ބައްދަލު ކުރައްވައި ދެއްކެވި ބައެއް ވާހަކަތައް ތަހުގީގު ކުރަމުން އަންނަ ކަމަށް ފުލުހުން މިއަދު ބުނެފި އެވެ.

ސުވާލު ކުރުމުގެ ފުރުސަތު ނޫސްވެރިންނަށް ނުދީ، ފުލުހުންގެ ތަރުޖަމާން އަހުމަދު ޝިފާން މިއަދު އިއްވި ބަޔާނުގައި ވިދާޅުވީ މާޅެންދޫގައި ވާހަކަ ދައްކަވަމުން، ފުލުހުންނާ ގުޅޭ ގޮތުން ދޮގު ވާހަކަތަކެއް އިބޫ ދެއްކެވި ކަމަށާއި ހަގީގަތާ ހިލާފު ވާހަކަ ދެއްކުމަކީ ކުށަކަށް ވުމުން، ފުލުހުން އެކަން ތަހުގީގު ކުރަމުން އަންނަ ކަމަށެވެ. އަދި އެކަން އިތުރަށް ބެލުމަށް، ކަމާ ބެހޭ އެހެން އިދާރާތަކަށް ވެސް އެ މައްސަލަ މިހާރު ހުށަހަޅާފައިވާ ކަމަށް އޭނާ ވިދާޅުވި އެވެ.

އިބޫ އެ ވާހަކަ ދެއްކެވީ މަސްވެރިއަކާ ހަވާލާދީ އެވެ. އޭނާ ވިދާޅުވީ ހއ. އަތޮޅުގެ ފަޅު ރަށެއް ކަމުގައިވާ ގައްލަންދޫ ކަނޑުގައި ދޯންޏެއް އަޑި އަށް ދާތީ އެކަން ދޯނީގެ ވެރި ފަރާތުން ފުލުހުންނަށް އެންގި ކަމަށާއި އެކަމަކު ފުލުހުން އެންމެ ފުރަތަމަ ސުވާލު ކުރީ އެއީ ކާކަށް ތާއީދު ކުރާ ބައެއްތޯ ކަމަށް، މަސްވެރިޔާ ބުނި ކަމަށެވެ. އަދި ވޯޓުލާނީ އިންސާފަށް ކަމަށް ބުނުމުން، ލޯންޗެއް ނެތް ކަމަށް ފުލުހުން ބުނި ކަމަށާއި އެންމެ ފަހުން ދޯނި އަޑި އަށް ދިޔައީ ކަމަށް، އެ މަސްވެރިޔާ ބުނެފައިވާ ކަމަށް އިބޫ ވިދާޅުވި އެވެ.

އިބޫ ވެލިދުއަށް ވަޑައިގަތުމުން އެ ރަށުން އޭނާއަށް މަރުހަބާ ކިޔަނީ --.ފޮޓޯ: އެމްޑީޕީ

އިބޫގެ އެ ވާހަކަތައް ކުށްވެރި ކުރައްވައި ޝިފާން ވިދާޅުވީ ފުލުހުން ބަދުނާމުކޮށް، ފުލުހުންނާއި ސަރުކާރާ މެދު ރައްޔިތުންގެ ވިސްނުން ބަދަލު ކުރުމަށް ދޮގު ވާހަކަ ދެއްކުމަކީ ހިތާމަކުރާ ކަމެއް ކަމަށާއި އެކަން ބަލައި ނުގަންނަ ކަމަށެވެ.

އިބޫ ދެއްކެވި އެ ވާހަކަތަކުގެ ތަފްސީލު ދެއްވަމުން ޝިފާން ވިދާޅުވީ މިދިޔަ މަހު 14 ވަނަ ދުވަހު، ދޯންޏެއް ހާލުގައި ޖެހިގެން އެ އަތޮޅު އިހަވަންދޫ ޕޮލިސް ސްޓޭޝަނަށް ގުޅި ކަމަށާއި އެ ދޯންޏަށް އެހީވުމަށް، އިހަވަންދޫގައި އޮތް ލޯންޗަކާއި ދޯންޏެއް ފޮނުވި ކަމަށެވެ. އަދި އެ ދޯނި އަނބުރާ އިހަވަންދު އަށް ގެންގޮސް، ދިޔަ ހިއްކުމުގައި ފުލުހުން އަމަލީ ގޮތުން ބައިވެރިވި ކަމަށް އޭނާ ވިދާޅުވި އެވެ.

"މިއީ މި ކަން ހިނގިގޮތުގެ އަސްލާއި އަސާސް އޮޅުވާލުމުގެ ނިޔަތުގައި، އިބްރާހިމް މުހައްމަދު ސޯލިހު ގަސްދުގައި ދެއްކި ވާހަކައެއްކަން ފުލުހުން ގަބޫލު ކުރަން. ރައްޔިތަކު މި ފަދަ އެހީއެއް ބޭނުންވުމުން ފުލުހުން އެ ކަމަށް ފަހެއް ނުޖެހޭނެ. އެކަން ދިވެހި ރައްޔިތުން ގަބޫލު ކުރާނެ،" ޝިފާން ވިދާޅުވި އެވެ.

އޭނާ ވިދާޅުވީ ޒާތީ މަންފާއެއް ހޯދުމަށް ފުލުހުންގެ ނަމުގައި، ފުލުހުން ބަދުނާމުވާ ގޮތަށް އެ ފަދަ އެއްވެސް ވާހަކައެއް ނުދެއްކުމަށް އިލްތިމާސް ކުރާ ކަމަށެވެ. އަދި ފުލުހުންނަކީ ދިވެހިން ވަރަށް އިތުބާރުކުރާ މުއައްސަސާއެއް ކަމަށާއި ރައްޔިތުންނަށްޓަކައި ބޮޑެތި ޒިންމާތަކެއް އަދާކުރަމުން އަންނަ ބައެއް ކަމަށް އޭނާ ވިދާޅުވި އެވެ.

"އަޅުގަނޑުމެން އެދެން، ކަމަކާ ގުޅޭ ގޮތުން މައުލޫމާތެއް ލިބިއްޖެ ނަމަ، އޭގެ އަސްލު އޮޅުން ފިލުވާފައި ނޫނީ އެއްވެސް ރައްޔިތަކު އެކަން ގަބޫލު ނުކުރުމަށް،" ޝިފާން ވިދާޅުވި އެވެ.