އާދީއްތަ ދުވަހު އޮންނަ ރިޔާސީ އިންތިހާބުގެ ވޯޓުލުން ނިންމައި، ވޯޓު ގުނާއިރު، ވޯޓު ކަރުދާސްކޮޅު އޮބްޒާވަރުންނަށް ނުދައްކާ ގުނަން އުޅޭ ކަމަށް އިދިކޮޅު ކޯލިޝަންގެ ރިޔާސީ ކެންޑިޑޭޓު އިބްރާހިމް މުހައްމަދު ސޯލިހް (އިބޫ) މިއަދު ތުހުމަތު ކުރައްވައިފި އެވެ.
މީގެކުރިން، ރާއްޖޭގައި ބޭއްވި ކޮންމެ އިންތިހާބެއްގައި ވެސް ވޯޓު ގުނާއިރު، ވޯޓުލާ މަރުކަޒުތަކުގައި ތިބޭ މޮނިޓަރުންނާއި އޮބްޒާވަރުންނަށް ކަރުދާސްކޮޅު ދައްކަ އެވެ. އަދި ވޯޓު ކަރުދާސްކޮޅު ދައްކާއިރު، އެއީ ބާތިލް ވޯޓެއް ނަމަ ބާތިލްވާ ސަބަބުތައް ވެސް އިންތިހާބުގެ އޮފިޝަލުން ކިޔައިދެ އެވެ.
މ. ދިއްގަރުގައި ތިބި އިދިކޮޅު ސަޕޯޓަރުންނާ ބައްދަލުކުރައްވައި އިބޫ ވިދާޅުވީ ވޯޓުލުމަށް ފަހު ކަންކަން ކުރަންވީ ގޮތް ވަރަށް ސާފުކޮށް ގާނޫނުގައި ބަޔާންކޮށްފައި އޮތްއިރު، ގާނޫނުއަސާސީއާ މުޅިން ހިލާފު ކަންތައްތަކެއް ކުރަން އިލެކްޝަންސް ކޮމިޝަނުން ކުރަން ރާވާފައިވާ ކަމަށެވެ.
"ވޯޓު ގުނާއިރު ބަރިބަރިއަށް ކަރުދާސްތައް އަޅާފައި އިއުލާން ކުރާނީއޭ (އެބަ ބުނޭ) އެއަށްފަހު، ޝަކުވާއެއް އޮވެއްޖެނަމަ އެކަން ބަލާނީއޭ. މިއީ އެކަން އޮންނަ ގޮތެއް ނޫން،" އިބޫ ވިދާޅުވި އެވެ.
އިބޫ ވިދާޅުވީ އޮބްޒާވަރުންނާއި މޮނިޓަރުންނަށް ކޮންމެ ވޯޓު ކަރުދާހެއް ވަކިވަކިން ދައްކަން ޖެހޭނެ ކަމަށެވެ. އެ ނޫން ގޮތަކަށް ކަން ކުރަން ދޫނުކުރާނެ ކަމަށް އިބޫ ވިދާޅުވި އެވެ.
"ވޯޓު ގުނަން ޖެހޭނީ ރައްޔިތުންގެ ކުރިމަތީގައި. އޮބްޒާވަރުންގެ ކުރިމަތީ. މިއީ އަޅުގަނޑުމެން ދޫކުރާނެ ކަންތައްތަކެއް ނޫން. ކޮންމެ ކަރުދާސްކޮޅެއް ނަގައި ދައްކަން ޖެހޭނެ،" އިބޫ ވިދާޅުވި އެވެ.
އިބޫ ވިދާޅުވި ގޮތުގައި އިދިކޮޅު ކޯލިޝަނުން ރިޔާސީ އިންތިހާބަށް ނުކުތީ ކުރިމަތިވި ހުރިހާ ހުރަސްތަކެއް ގިރާ ކުރުމަށް ފަހު އެވެ. އެހެންވެ، ކުރިއަށް އޮތް ތަނުގައި ވެސް ކުރިމަތިވާ ކޮންމެ ހުރަހެއް ގިރާ ކުރައްވަން ކޯލިޝަނުން ތައްޔާރަށް އޮތް ކަމަށް ވެސް އިބޫ ވިދާޅުވި އެވެ.
އިދިކޮޅު ކޯލިޝަނުން ބުނަމުން އަންނަނީ މިހާރު އޮތް އިލެކްޝަންސް ކޮމިޝަނަށް އިތުބާރު ނެތް ކަމަށާއި އިންތިހާބުގައި މަކަރު ހެދުމަށް މަގު ފަހިވާ އެތައް ކަމެއް ކުރަމުން އަންނަ ކަމަށެވެ. އެކަމަކު އެ ތުހުމަތުތައް އިލެކްޝަންސް އިން ދޮގުކުރެ އެވެ.