ދައުލަތުގެ ހުރިހާ ބާރުތަކެއް މުށު ތެރެ އަށް ލައިގެން ރައީސް އަބްދުﷲ ޔާމީން އުޅުއްވީ، 134،000 ރައްޔިތުން ޖަލަށް ލާން ކަމަށް ވިދާޅުވެ، ރައްޔިތުންގެ މަޖިލީހުގެ ދިއްދޫ ދާއިރާގެ މެމްބަރު އަބްދުއްލަތީފް، އިނގުރައިދޫ ދާއިރާގެ މެމްބަރު އަހްމަދު ފަލާހަށް، ފާޑުވިދާޅުވެއްޖެ އެވެ.
ރައީސް ޔާމީނަށް ތުހުމަތުކުރާ ގާނޫނާ ޚިލާފު އަމަލުތަކާއި ޚިޔާނާތުގެ މައްސަލަތަކުގައި، އެ މަނިކުފާނު ޖަލަށް ލާން ޖެހޭ ކަމަށް އިދިކޮޅު ޕާޓީތަކުގެ ބައެއް ބޭފުޅުން ގެންދަވަނީ ވިދާޅުވަމުންނެވެ.
ޕީޕީއެމުން އިއްޔެ ބޭއްވި ނޫސްވެރިންގެ ބައްދަލުވުމުގައި، އެ ވާހަކަތަކަށް ރައްދު ދެއްވައި ފަލާހު ވިދާޅުވެފައި ވަނީ، ފަސް އަހަރުގެ ދައުރުގައި ރައީސް ޔާމީން ގާނޫނާ ޚިލާފު އެއްވެސް އަމަލެއް އަދި ޖިނާއީ އެއްވެސް ކުށެއް ކުރައްވާފައި ނުވާ ކަމަށެވެ. އެ މަނިކުފާނު ޖަލަށް ލާ ނަމަ، ރިޔާސީ އިންތިޚާބުގައި ރައީސް ޔާމީނަށް ވޯޓު ދިން 96،000 މީހުން ލެވޭ ވަރުގެ ޖަލެއް ހަދަން ޖެހޭނެ ކަމަށް ވެސް ފަލާހު ވިދާޅުވި އެވެ.
ފަލާހުގެ ވާހަކަތަކަށް ފާޑުވިދާޅުވެ، ލަތީފް ކުރެއްވި ޓުވީޓެއްގައި ވިދާޅުވީ ރައީސް ޔާމީން މަސައްކަތްޕުޅު ކުރެއްވީ 134،000 މީހުން ޖަލަށްލާން ކަމަށެވެ. މުޅި ދައުލަތް މުށު ތެރެ އަށް ލައިގެން ވެސް އެކަން ނުކުރެއްވި އުޅެނިކޮށް ރިޔާސީ އިންތިޚާބުގައި ރައްޔިތުން ނުކުމެ އެ މަނިކުފާނުގެ އަނިޔާވެރިކަމާ ދެކޮޅަށް އޮތް އާބާދީގެ ސައިޒު ދައްކާލީ ކަމަށް ވެސް ވިދާޅުވި އެވެ. އަދިވެސް ފަލާހުމެން މަސައްކަތް ކުރައްވަނީ ރައްޔިތުންނަށް ބިރުދައްކަވަންތޯ ވެސް ލަތީފް ސުވާލު ކުރެއްވި އެވެ.
ރައީސް ޔާމީނާ އެކު 96،000 މީހުން ލެވޭ ޖަލެއް ހަދާ ވާހަކަ ދައްކަވާ އިރު، ގިނައީ އެ އަދަދުތޯ ނުވަތަ 134،000 މީހުންތޯ ސާފު ކޮށްދެއްވަން ލަތީފް އެދިވަޑައިގަތެވެ. ޕީޕީއެމްގެ ނައިބު ރައީސް އަބްދުއްރަހީމަށް އެކަން ސާފުކޮށްދެއްވޭނެ ކަމަށް ވެސް ވިދާޅުވި އެވެ.
ރައީސް ޔާމީން ދިފާއު ކުރައްވައި، ފަލާހު ވިދާޅުވެފައި ވަނީ ރައީސް ޔާމީނަކީ ރާއްޖޭގައި ތިއްބެވި ސިޔާސީ ލީޑަރުންގެ ތެރެއިން ދިވެހިންގެ އެންމެ ތާއީދު ބޮޑު ސިޔާސީ ލީޑަރު ކަމަށެވެ. އަދި ރައީސް ޔާމީން ޖަލަށް ލާނެ ވާހަކަ ވިދާޅުވުމަކީ އިދިކޮޅު ފަރާތްތަކުން ކުރި ހުވަޔާ ހިލާފުވުން ކަމަށް ވެސް އޭނާ ވިދާޅުވެފައިވެ އެވެ.
"ރައީސް ޔާމީން ޖަލަށް ގެންދާ ކަމަށްވާ ނަމަ، އިދިކޮޅު ފަރާތްތަކަށް ދަންނަވާލަން އޮތީ އެންމެ ފުރަތަމަ ވެސް 96،000 މީހުން ލެވޭ ވަރުގެ ޖަލެއް އެ ބޭފުޅުން އަޅާށޭ،" ފަލާހު ވިދާޅުވި އެވެ.
ފަލާހުގެ ވާހަކަތަކަށް ރައްދު ދެެއްވައި ލަތީފް ވިދާޅުވީ އިދިކޮޅު ކޯލިޝަނަށް ރައްޔިތުން ކުރި ބޮޑު ތާއީދާ އެކު، އިންތިހާބީ ރައީސް އިބޫ، ރައްޔިތުންނަށްޓަކައި ކޮށްދެއްވާނީ އޯގާތެރި ވެރިކަމެއް ކަމަށެވެ. އަދި އިބޫގެ ވެރިކަމުގައި ރައްޔިތުންގެ މެދުގައި ތަފާތުކުރުމެއް ނުގެންގުޅުއްވާނެ ކަމަށް ވެސް އޭނާ ވިދާޅުވި އެވެ.
"އިބޫއަކީ އިދިކޮޅަށް ބަހެއް ބުނާ ކޮންމެ މީހަކު ހިފައި ހައްޔަރުކޮށް ޝަރީއަތް ނިމެންދެން ޖަލުގައި ބަހައްޓައިގެން ޓެރަރިޒަމްގެ ދައުވާ އުފުލާނެ ބޭފުޅެއް ނޫން. ތިމާއާ ޚިޔާލު ތަފާތުވާ ކޮންމެ މެމްބަރެއްގެ ގޮނޑި ގެއްލުވައިލާކަށް އިބޫ ނޫޅުއްވާނެ. އިދިކޮޅު ފިކުރުގެ ސިޔާސީ މީހުންނާ ވެސް ގުޅިގެން މަސައްކަތް ކުރެއްވުމުގެ ގާބިލުކަން އިބޫގެ ހުންނާނެ. އިބޫ ނުކުންނަވަނީ ރައްޔިތުންނާ ދެކޮޅަށް ވެރިކަން ކުރައްވާކަށް ނޫން. ރައީސް ޔާމީނަށް ވޯޓު ދިން މީހުންނަށް ވެސް އިބޫ ޚިދުމަތް ކޮށްދެއްވާނީ ޑިމޮކްރެސިގެ ފުރިހަމަ އުސޫލުން އަދުލު އިންސާފާ އެކުގައި،" ލަތީފް ވިދާޅުވި އެވެ.
