ނަތީޖާ ގަބޫލުނުކުރަނީ އަމިއްލަ އެދުމުން ފޯވެފައި ތިބި މަދު ބައެއް: ގާސިމް

ރައީސް އަބްދުﷲ ޔާމީނަށް ބޮޑު ތަފާތަކުން ނާކާމިޔާބުވެވަޑައިގެންނެވި ރިޔާސީ އިންތިޚާބުގެ ނަތީޖާ ގަބޫލުނުކުރަނީ، އަމިއްލަ އެދުމުން ފޯވެފައި ތިބި މަދު ބައެއް ކަމަށް ޖުމްހޫރީ ޕާޓީގެ ފައުންޑަރު ގާސިމް އިބްރާހިމް މިއަދު ވިދާޅުވެއްޖެ އެވެ.

ސިޔާސީ ކަންކަމާ ގުޅޭ ގޮތުން މަޝްވަރާ ކުރައްވަން، ކުރީގެ ރައީސް މައުމޫންއާ އެކު ބޭއްވެވި ބައްދަލުވުމަކަށް ފަހު، ނޫސްވެރިންނާ ވާހަކަ ދައްކަވަމުން ގާސިމް ވިދާޅުވީ، މި ފަސް އަހަރު ރައްޔިތުންނަށް ބިރުދައްކައި އަނިޔާވެރިވި ގޮތަށް، އިންތިޚާބުގެ ނަތީޖާ ވެސް ގަބޫލުނުކޮށް، އޮޅުވާލުންގަނޑެއްގެ ތެރޭގައި ރައްޔިތުން ބައިތިއްބަން ބަޔަކު މަސައްކަތް ކުރަމުންދާ ކަމަށެވެ. ރައީސް ޔާމީންގެ ވެރިކަމާ ދެކޮޅަށް ރައްޔިތުން ސާފުކޮށް ބަސް ބުނުމުން އެކަމާ ދެކޮޅު ވެވޭނީ ކޮން މުއައްސަސާއަކަށްތޯ ގާސިމް ސުވާލު އުފެއްދެވި އެވެ.

އޭނާ މިހެން ވިދާޅުވީ، ވޯޓުގައި އޮޅުވާލުންތަކެއް ހިމެނޭ ކަމަށް ތުހުމަތުކޮށް، އިންތިހާބު ބާތިލްކުރަން ޕީޕީއެމުން ސުޕްރީމް ކޯޓަށް ހުށަހަޅަން އުޅޭ ކަމަށް ދައްކާ ވާހަކަތަކަށް ރައްދު ދެއްވަމުންނެވެ. އިންތިޚާބުގެ ނަތީޖާ ގަބޫލުނުކޮށް، މަދު ބަޔަކާ އެކު ކޮންމެ ރެއަކު އެ ޕާޓީން ދަނީ އަޑުއުފުލަމުންނެވެ.

ގާސިމް ވިދާޅުވި ގޮތުގައި މުޅި ދުނިޔެވެސް ވަނީ އިންތިޚާބުގައި ދިވެހިންގެ ނިންމުން ބަލައިގެންފަ އެވެ.

"އަމިއްލަ އެދުމުން ފޯވެފައިވާ މަދު ބަޔަކު ފިޔަވައި އެހެން އެންމެން ނަތީޖާ ގަބޫލުކޮށްފި ހެޔޮ ހިތުން. އެމަނިކުފާނު [ރައީސް ޔާމީންގެ] ރަނިން މޭޓު، ޑރ. ޝަހީމް ވެސް ގަބޫލުފުޅު ކުރައްވައިފި. ދެން ކާކުތޯ ނުކުރަން ހުރީ. އެހެންވީމާ ތިމަންނައަކީ އެހާ އަވަހަށް ބަލި ގަބޫލުކުރާނެ މީހެއް ނޫނޭ ވިދާޅުވިޔަސް ބަލިވީމާ ދެން ޖެހޭނީ ބަލި ގަބޫލުކުރަން،" ގާސިމް ވިދާޅުވި އެވެ.

"ނަސޭހަތާ އެކު އަޅުގަނޑު ދަންނަވާނީ، މަނިކުފާނުއޭ ތިއީ ވަރަށް ބޮޑު ގޯހެކޭ. ގޮތްދޫނުކުރައްވައި ތިހެން ހުއްޓަސް މުޅި ރައްޔިތުންގެ ނިންމުން އަނބުރައި ބޮލާލައި ޖެހޭނެވަރުގެ އެއްވެސް ބާރެއް އިންސާނެއް ލިބިގެން ނުވޭ."

އޭނާ ވިދާޅުވީ ސެޕްޓެމްބަރު، 23 ގައި ބޭއްވި ރިޔާސީ އިންތިޚާބުގެ ވޯޓުލުމާއި ވޯޓު ގުނުން ދިޔައީ، މިނިވަންކަމާ އެކުގައިކަން ބައިނަލްއަގުވާމީ އޮބްޒާވަރުންގެ ރިޕޯޓުތަކުން ވެސް ފެންނަން އެބަހުރި ކަމަށެވެ. މިހާލަތުގައި، އިންތިޚާބު ބާތިލްކުރަން ކޮންމެ ކޯޓަކަށް ދިޔަ ކަމުގައި ވިޔަސް އެއްވެސް ހުކުމެއް ނާންނާނެ ކަމަށް ވިދާޅުވި އެވެ.

"ކިހިނެއްތޯ އެކަން ކުރާނީ؟ އަޅުގަނޑަކަށް ނޭނގެ އެކަން ކުރާނެ ގޮތެއް. ރައްޔިތުންގެ ނިންމުމާ ދެކޮޅަށް ނިންމައިފި ނަމަ ދެން އޮތީ ހުރިހާ ރައްޔިތުން ބަނޑަށް ޖެހުން. ބައިނަލްއަގުވާމީ ގައުމުތަކުން ވަގުތުން ދަތިކުރުމުގެ ފިޔަވަޅުއަޅާނެ. އެއީތޯ ބޭނުންވާ ގޮތަކީ؟" ގާސިމް ވިދާޅުވި އެވެ.

ވަކި ބޭފުޅަކު ވެރިކަމުގައި ބެހެއްޓެވުމަށް ރައްޔިތުންނަށް އެ ހާލު ޖައްސަން ތަރުހީބުދޭނީ ކޮން މުއައްސަސާއަކުންތޯ ގާސިމް އެއްސެވި އެވެ.

"ބަޔަކު ރާވައިގެން ގޮސް އެއްޗެއް ހުށަހެޅިއަސް ކޯޓުތަކުގައި ތިއްބެވި ފަނޑިޔާރުން ވެސް ބައްލަވާނެ ދެއްތޯ؟" ގާސިމް ވިދާޅުވި އެވެ.

އޭނާ ވިދާޅުވި ގޮތުގައި ޝަރުއީ ދާއިރާ އަށް ނުފޫޒު ފޯރުވަމުންދިޔަ މިންވަރު އެނގި ހާމަވީ އިންތިޚާބުން ރައީސް އަބްދުﷲ ޔާމީން ބަލިވުމުންނެވެ. ނުހައްގުން ބަންދުކޮށް، އަނިޔާދެމުން ދިޔަ ގިނަ ބަޔަކު ވަގުތުން ކޯޓުތަކުން ދޫކޮށްލީ ކަމަށް ވިދާޅުވި އެވެ.

"ޖުޑިޝަރީ އަށް ބާރުފޯރުވަނީ ކޮން ފަރާތެއް ކަން ރައްޔިތުން ނިންމަވާށޭ. ކާކުކަން، ކޮން ފަރާތަކުން ކަން ނުފޫޒު ފޯރުވަމުން ދިޔައީ،" ގާސިމް ވިދާޅުވި އެވެ.

އިންތިޚާބުގައި އޮޅުވާލުމެއް ނުހިމެނޭ ކަމަށް ގާސިމް ދެއްކެވި ވާހަކަ އަށް ތާއީދު ކުރައްވައި މައުމޫން މިއަދު ވެސް ފާހަގަކުރެއްވި ކުރެއްވި ގޮތުގައި ވޯޓު ލުމާއި ގުނުން ވެސް ދިޔައީ އެންމެންގެ ކުރިމަތީގަ އެވެ. އެއްވެސް ގޯހެއް ނުހިނގާ ކަމަށާއި އެފަދަ ކަމެއް ހިނގި ކަމުގެ ޝަކުވާއެއް ވެސް ނެތް ކަމަށް ވިދާޅުވި އެވެ.

އިންތިޚާބުގެ ދާއިމީ ނަތީޖާ ވެސް އިއުލާންކުރި ފަހުން، ބޮޑެތި އޮޅުވާލުންތަކެއް ފެނުނު ކަމަށް ބުނުމުން އެކަން ގަބޫލުކުރާނީ ކިހިނެއްތޯ މައުމޫން ސުވާލު އުފެއްދެވި އެވެ.

"އޮނަރަބަލް ގާސިމް އެ ވިދާޅުވި ގޮތަށް އެއީ، ދުނިޔޭގެ އެއްވެސް ގައުމަކުން ވެސް، އެއްވެސް މުއައްސަސާއަކުން ވެސް ބަލައިގަންނާނެ ކަމެއް ނޫން. އެކަން އޮތީ ނިމިފައި. ވަގުތީ ނަތީޖާ ވެސް އިއުލާންކޮށްފި، ދާއިމީ ނަތީޖާ ވެސް އިއުލާންކޮށްފި. އެހެންވީމަ އެއާދޭތެރޭގައި މީހަކު ކުރާނެ ކަމެއް ނޯންނާނެ، އެއީ ރަނގަޅަށް ހިނގާފައި އޮތް ކަމެއް ވީމަ،" މައުމޫން ވިދާޅުވި އެވެ.

އެމަނިކުފާނު ވިދާޅުވި ގޮތުގައި އިންތިޚާބުގައި އޮޅުވާލުން ހިމެނޭ ކަމަށް ފަތުރަނީ ދެކޮޅުޖެހޭ ވާހަކަތަކެއް ނޫނެވެ. އެހެންވީމަ، ކޯޓަކަށް މައްސަލަ ހުށަހެޅިއަސް، މިހާރު އޮތް ނަތީޖާއާ ފުށުއަރާނެ ގޮތަކަށް ނިންމާނެ ކަމަކަށް ގަބޫލުނުކުރައްވާ ކަމަށް މައުމޫން ވިދާޅުވި އެވެ.