ރިޔާސީ އިންތިޚާބު ބާތިލްކުރަން ހުށަހެޅި މައްސަލާގައި ރައީސް އަބްދުﷲ ޔާމީންގެ ފަރާތްޕުޅުން ހެކިތަކުގެ ގޮތުގައި ބައެއް ލިޔުންތަކަކާއި ސިއްރު ހެކިންތަކެއް ހުށަހަޅަން ނިންމާފައިވާ ކަމަށް އެމަނިކުފާނުގެ ވަކީލުން ސުޕްރީމް ކޯޓުގައި މިއަދު ވިދާޅުވެއްޖެ އެވެ.
މިދިޔަ މަހުގެ 23 ގައި ބޭއްވި ރިޔާސީ އިންތިޚާބުގައި ބޮޑު ތަފާތަކުން ބަލިވި، ޕީޕީއެމްގެ ކެންޑިޑޭޓު ރައީސް ޔާމީންގެ ފަރާތްޕުޅުން، އެ އިންތިޚާބު ބާތިލްކޮށް އަލުން އިންތިޚާބު ބޭއްވުމުގެ އަމުރަކަށް އެދިވަޑައިގެން ސުޕްރީމް ކޯޓަށް ހުށަހެޅުއްވި ދުސްތޫރީ މައްސަލައިގެ އަޑުއެހުންތައް އެ ކޯޓުގައި ވަނީ ފަށައިފަ އެވެ.
މިއަދުގެ އަޑުއެހުމުގައި ވާހަކަ ދައްކަވަމުން ރައީސް ޔާމީންގެ ގާނޫނީ ވަކީލް މުހައްމަދު ސަލީމް (ރޭނިސް) ވިދާޅުވީ ދައުވާގައި ބުނާ ކަންކަން ސާބިތުކުރަން އަށް ލިޔުމެއް ހުށަހަޅާފައިވާނެ ކަމަށެވެ. އެއީ، ވޯޓު ކަރުދާސް ޗާޕް ކުރުމުގެ މަސައްކަތަށް ހުށަހެޅި ބިޑްތަކުގެ މައުލޫމާތު ހިމެނޭ ލިޔުންތަކުގެ އިތުރުން އެ މަސައްކަތް ހަވާލުކުރި އެމް7 ކުންފުންޏާ ބެހޭ މައުލޫމާތު ހިމެނޭ ލިޔުމެވެ. އެމް7 ކުންފުނީގެ މައުލޫމާތު ހިމެނޭ ލިޔުން ހުށަހެޅީ އެއީ އިދިކޮޅު ކޯލިޝަންގައި ހިމެނޭ ޖުމްހޫރީ ޕާޓީގެ ފައުންޑަރު ގާސިމް އިބްރާހިމްގެ ދެ ދަރިކަލެއްގެ މަސްލަހަތު ހިމެނޭ ކުންފުންޏެއް ކަން ސާބިތުކޮށް ދިނުމަށް ކަމަށް އޭނާ ވިދާޅުވި އެވެ.
އެ ލިޔުންތަކުގެ ތެރޭގައި، އިލެކްޝަންސް ކޮމިޝަންގެ ބައެއް މުވައްޒަފުންނާއި ނޭޝަނަލް ކޮމްލެއިންޓްސް ބިއުރޯގެ ބައެއް މުވައްޒަފުންގެ ބަޔާންތަކެއް ވެސް ހިމެނެ އެވެ. އަދި ވޯޓު ކަރުދާހުގައި ފާހަގަ ޖެހަން ބޭނުންކުރި ކަމަށް ބުނާ އަނގޮޓީގެ ފޮޓޯއަކާއި އެފަދަ އަނގޮޓިއަކުން ކަރުދާހެއްގައި ފާހަގަ ޖެހުމަށް ތައްޔާރު ވެފައިވާ ފޮޓޯއެއް ވެސް ހުށަހަޅާފައިވާނެ ކަމަށް ސަލީމް ވިދާޅުވި އެވެ.
ރައީސް ޔާމީންގެ ވަކީލުންގެ ޓީމުގައި ހިމެނިވަޑައިގަންނަވާ އަދި ހައި ކޯޓުގެ ކުރީގެ ފަނޑިޔާރެއް ކަމަށް ވާ އައްބާސް ޝަރީފް ވިދާޅުވީ ސިއްރު ހެކިވެރިންތަކެއް ވެސް ހުށަހަޅަން ނިންމާފައިވާ ކަމަށެވެ. އެކަމަކު ސިއްރު ހެކިވެރިންގެ ގޮތުގައި ހުށަހަޅަނީ ކިތައް މީހުން ކަމެއް އޭނާ ވިދާޅެއް ނުވެ އެވެ.
ސިއްރު ހެކިވެރިން ހުށަހަޅާ ކަން ރައީސް ޔާމީންގެ ވަކީލުން ހާމަކުރެއްވުމުން، އެ މައްސަލައިގެ ތެރެއަށް ތަދައްޚުލްވި އިދިކޮޅު ކޯލިޝަންގެ ވަކީލުން ކަންބޮޑުވުން ފާޅުކުރެއްވި އެވެ. އިދިކޮޅު ކޯލިޝަންގެ ވަކީލުންގެ ޓީމުގައި ހިމެނޭ ވަކީލް ނޫރުއްސަލާމް އަބޫބަކުރު ވިދާޅުވީ ހެކިވެރިންގެ ހެކިބަސް ސިއްރުން ނަގަން ޖެހޭ ގާނޫނީ ސަބަބެއް ދެއްކިފައި ނުވާ ކަމަށާއި ޖިނާއީ ބޮޑެތި މައްސަލަތައް ފަދަ މައްސަލަތައް ފިޔަވައި ސިއްރުން ހެކިބަސް ނެގުމަކީ ކުރެވޭނެ ކަމެއް ނޫން ކަމަށެވެ.
ވަކީލް ނޫރު އެގޮތަށް ވާހަކަ ދައްކަވަން ފެއްޓެވުމުން، އެ މައްސަލަ ބައްލަވާ ބެންޗުގެ ރިޔާސަތު ބަލަހައްޓަވާ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ވިދާޅުވީ ސިއްރު ހެކިވެރިންނާ މެދު ގޮތެއް ނިންމަވާނީ އެކަމާ މެދު ބަހުސް ކުރުމަށް ފަހު ކަމަށެވެ.
ސަލީމް ވިދާޅުވީ ރިޔާސީ އިންތިޚާބުގައި މަކަރު ހެދުމާއި އޮޅުވައިލުމުގެ އަމަލުތައް ހިންގާފައިވާ ކަމަށް ބެލެވޭ ކަންކަން ފެންމަތިވެފައިވާ ކަމަށެވެ. އެގޮތުން އިލެކްޝަންސް ކޮމިޝަންގެ ދެ މެމްބަރަކު، ފާހަގަ ޖެހުމަށް ބޭނުންކުރެވޭ އަނގޮޓިތަކެއް ރާއްޖެ ގެނެސް އެކި ސަރަހައްދުތަކަށް ފޮނުވި ކަމާއި އޭގެ ބޭނުމަކީ ވޯޓުލާ މަރުކަޒުގައި ތިބި އޮފިޝަލުން މެދުވެރިކޮށް ވޯޓު ގުނައި، ތަރުތީބު ކުރާއިރު ކަރުދާސްތަކުގައި ފާހަގަ ޖެހުން ކަމަށް އޭނާ ވިދާޅުވި އެވެ. އަދި ފަސޭހައިން ލިބެން ހުންނަ ދެލި ފޮހެވޭ ގަލަންތަކެއް ފާހަގަ ޖަހަން ބޭނުން ކުރުމުން ބައެއް ކަރުދާސްތަކުގެ ފާހަގަ ގެއްލުމުގެ ފުރުސަތު އޮންނަ ކަމަށާއި ރަނގަޅަށް ވޯޓު ކަރުދާސްތައް ބަލައިފި ނަމަ އެކަން އެނގޭނެ ކަމަށް ވެސް އޭނާ ވިދާޅުވި އެވެ.
މީގެ އިތުރުން ޗާޕްކުރިއިރު ވޯޓު ކަރުދާހުގައި ޚާއްސަ ކެމިކަލެއް ހިމަނައިގެން އެ ކަރުދާހުގައި ވަކި ގޮތަކަށް ފާހަގަ ޖެހުމަށް މަސައްކަތް ކުރި ކަމަށް ބެލެވޭ ކަމަށާއި އެފަދަ ކަންކަން ބައެއް އޮފިޝަލުންނަށް ފާހަގަވި ކަމަށް އޭނާ ވިދާޅުވި އެވެ. އެފަދަ ކަންކަމުގައި ބޭރު ބައެއްގެ އަތެއް ވާ ކަމަށް ބެލެވޭ ކަމަށާއި އެހެންވެ އެއީ ސަލާމަތީ ބާރުތަކުން ތަހުގީގު ކުރަން ޖެހޭ ކަމެއް ކަމަށް ވެސް އޭނާ ވިދާޅުވި އެވެ.
ސަލީމް ވިދާޅުވި ގޮތުގައި ވޯޓު ކަރުދާސް ޗާޕްކުރި އެމް7 ކުންފުންޏަށް އެ މަސައްކަތް ހަވާލުކުރީ ވެސް ވަކި ގޮތަކަށް ވޯޓު ކަރުދާސްތައް ހަދަން މަގުފަހި ކުރުމުގެ ގޮތުން ކަމަށް ބެލެވެ އެވެ. އެއީ ގާސިމް އިބްރާހީމްގެ ދެ ދަރިކަލެއްގެ މަސްލަހަތު އޮތް ކުންފުންޏެއް ކަމަށާއި އެ ކުންފުންޏަށް އެ މަސައްކަތް ހަވާލުކުރީ ވެސް ބިޑް ކުރުމެއް ނެތި މާލިއްޔަތު ގަވާއިދާ ޚިލާފަށް ކަމަށް އޭނާ ވިދާޅުވި އެވެ. އެ ކުންފުންޏާ އެކު އެކަމަށް ކުރިމަތިލި ނޮވެލްޓީ އަކީ ވޯޓު ކަރުދާސް ޗާޕް ކުރުމުގެ ތަޖުރިބާ ހުރި ކުންފުންޏެއް ކަމަށާއި ފުރަތަމަ ބިޑް ހުށަހެޅިއިރު، އެމް7 ކުންފުންޏަށް ވުރެ ގިނަ ޕޮއިންޓް ނޮވެލްޓީ އަށް ލިބުނު ކަމަށް ވެސް ވިދާޅުވި އެވެ.
މީގެ އިތުރުން، އިންތިޚާބާ ގުޅޭ ޝަކުވާތައް ބަލަން އުފެއްދި ގައުމީ ކޮމްޕްލެއިންޓްސް ބިއުރޯގެ މަސައްކަތްތައް ކުއްލި ގޮތަކަށް ދަރުބާރުގެއަށް ބަދަލު ކުރުމުން، ޝަކުވާ ހުށަހެޅުމުގެ ފުރުސަތު ގިނަ ބަޔަކަށް ހަނިވި ކަމަށް ސަލީމް ވިދާޅުވި އެވެ. ފޯނު ނުވަތަ ފެކްސް މެދުވެރިކޮށް ޝަކުވާ ހުށަހެޅޭނެ އިންތިޒާމެއް އެތަނުގައި ނެތްއިރު، ޝަކުވާ ފޯމު ދޫކުރެވޭނެ އިންތިޒާމް ވެސް ދަރުބާރުގޭގައި ހެދި ތަނުގައި ނެތް ކަމަށް އޭނާ ވިދާޅުވި އެވެ. އަދި އެ ބިއުރޯއަށް ހުށަހެޅި މައްސަލަތަކުގެ ތެެރެއިން ކޮމިޝަނަށް ފޮނުވި ބައެއް މައްސަލަތައް އެ ކޮމިޝަނުން އަނބުރާ ފޮނުވާލި ކަމަށް ވެސް އޭނާ ވިދާޅުވި އެވެ.
ސަލީމް ވިދާޅުވި ގޮތުގައި ވޯޓު ކަރުދާހުގެ ސައްހަ ކަން ކަށަވަރު ކުރުމަށްޓަކައި، ވޯޓު ގުނާއިރު ހުރިހާ މަރުކަޒެއްގައި ޔޫވީ ލައިޓް ބޭނުން ކުރަން ހަމަޖައްސާފައި އޮތަސް ބައެއް މަރުކަޒުތަކުގައި ވޯޓު ގުނިއިރު އެ ގޮތަށް އަމަލު ކޮށްފައެއް ނެތެވެ. އަދި ވޯޓު ލާން ފެށުމުގެ ކުރިން، ވޯޓު ކަރުދާހުގެ އަދަދު ބައެއް މަރުކަޒުތަކުގައި އިއުލާން ކޮށްފައި ނުވާ ކަމަށާއި އެހެންވެ، ވޯޓު ކަރުދާސްތައް އެކި މަރުކަޒުތަކަށް ބެހިފައި ހުރި ގޮތް ސާފުނުވާ ކަމަށް އޭނާ ވިދާޅުވި އެވެ.
ހުޅުމާލޭގައި ބެހެއްޓި ފޮށްޓެއްގައި އިތުރަށް 25 ވޯޓު ކަރުދާސް ހުރި މައްސަލައެއް ވެސް ފާހަގަވި ކަމަށް ސަލީމް ވިދާޅުވި އެވެ. އަދި ބައެއް މަރުކަޒުތަކުގައި ވޯޓު ކަރުދާސް ކޮޅު ވޯޓުލާ މަރުކަޒުން ބޭރަށް ގެންދިއުމާއި އަދި ބޭރުން ގެންނަ ކަރުދާސް ފޮށިތަކަށް އެޅުމުގެ މައްސަލަތައް ވެސް ފާހަގަވެފައިވާ ކަމަށް އޭނާ ވިދާޅުވި އެވެ. ބައެއް މަރުކަޒުތަކުގައި ވޯޓިން ބޫތު ބެހެއްޓި ގޮތުން ވޯޓުގެ ސިއްރުކަން ގެއްލޭ ކަމަށް ވެސް އޭނާ ވިދާޅުވި އެވެ.
ސަލީމް ވިދާޅުވި ގޮތުގައި ވޯޓު ގުނުމަށް ފަހު، ވޯޓު ކަރުދާސްތައް ބަންދުކުރާ ސެކިއުރިޓީ އުރަތައް ކޮމިޝަނަށް ގެންދިޔައިރު، ބައެއް އުރަތައް ބަންދު ނުކޮށް ހުރި މައްސަލަތަކެއް ދިމާވި އެވެ. އެހެންވެ، އެ އުރަތައް ބަންދު ކުރުމުގައި ކޮމިޝަންގެ ބައެއް މުވައްޒަފުން ވެސް އުޅުނު ކަމަށް އޭނާ ވިދާޅުވި އެވެ. އަދި ބައެއް މަރުކަޒުތަކުގައި ވޯޓު ލުން ކުރިއަށް ގެންދިޔައިރު ކެމްޕެއިން ކުރުމާއި ހަދިިޔާ ބެހުމުގެ ކަންކަން ވެސް ކުރި ކަމަށާއި ވޯޓުލާ މަރުކަޒަށް ވެއްދުން މަނާ ތަކެތި ކަމަށްވާ އަތް ދަބަހާއި ފޯނު ފަދަ ތަކެތި ބައެއް މަރުކަޒުތަކަށް ވެއްދި ކަމަށް ވެސް އޭނާ ވިދާޅުވި އެވެ.
އިންތިޚާބުގައި ފާހަގަވި އެފަދަ މައްސަލަތަކަކީ އެކަމުގެ ސަބަބުން ރައީސް ޔާމީންގެ އިންތިޚާބީ ހައްގަށް ހުރަސް އެޅިފައިވާ ކަމަށާއި އަދި އެއީ މިނިވަންކަމާ އެކު ރައީސަކު އިންތިޚާބު ކުރުމަށް ރައްޔިތުންނަށް އޮތް ފުރުސަތު ގެއްލޭ ކަމެއް ކަމަށް އޭނާ ވިދާޅުވި އެވެ. އަދި އެއީ އޭގެ ސަބަބުން ދުސްތޫރީ ހަމަނުޖެހުމަކަށް މަގުފަހިވެދާނެ ކަމެއް ކަމަށާއި އެކަމަށް ހައްލެއް ހޯދައި ދިނުމުގެ ބާރު އަދުލު އިންސާފު ގާއިމް ކުރުމުގެ އެންމެ އިސް ފަރާތުގެ ހައިސިއްޔަތުން ސުޕްރީމް ކޯޓަށް އޮންނާނެ ކަމަށް ސަލީމް ވިދާޅުވި އެވެ.
އެކަންކަން ފާހަގަ ކުރައްވައި، އޭނާ އެދިވަޑައިގަތީ އިންތިޚާބު ބާތިލްކޮށް، އަލުން އިންތިޚާބު ބާއްވަން އަމުރުކޮށް ދިނުމަށާއި އިންތިޚާބުގައި ގާނޫނާ ޚިލާފަށް ހިނގި ކަމަށް ބުނާ ކަންކަން ތަހުގީގު ކުރަން އަމުރުކޮށް ދިނުމަށެވެ.
އުއްތަމަ ފަނޑިޔާރާއި ސުޕްރީމް ކޯޓުގެ ފުލް ބެންޗުން ބައްލަވާ އެ މައްސަލާގެ އިތުރު އަޑުއެހުމެއް މާދަމާ ހެނދުނު ވެސް އޮންނާނެ އެވެ.
މިއަދުގެ އަޑުއެހުން ކުރިއަށް ދިޔައިރު، ޕީޕީއެމްގެ ތިން ނައިބު ރައީސުން ކަމަށްވާ އަބްދުއްރަހީމް އަބްދުﷲ އާއި އިކޮނޮމިކް މިނިސްޓަރު މުހައްމަދު ސައީދުގެ އިތުރުން ޓޫރިޒަމް މިނިސްޓަރު މޫސާ ޒަމީރާއި އެ ޕާޓީގެ ޕާލިމެންޓްރީ ގްރޫޕްގެ ލީޑަރު އަހުމަދު ނިހާނާއި ޕާޓީގެ ބައެއް އެކްޓިވިސްޓުން ވެސް އެ ޝަރީއަތް އަޑުއެއްސެވުމަށް ވަޑައިގެން ތިއްބެވި އެވެ. އަދި އިދިކޮޅު ކޯލިޝަންގެ ބައެއް މަޖިލިސް މެމްބަރުން ވެސް އެ އަޑުއެހުމަށް ހާޒިރުވި އެވެ.