އަންނަ ހަފުތާގައި ރާއްޖެ ވަޑައިގަންނަވަން ނިންމަވާފައިވާ ކުރީގެ ރައީސް މުހައްމަދު ނަޝީދު، މިނިވަން ކުރުމަށް އެދި މާދަމާ މަޖިލީހަށް ގަރާރެއް ހުށަހެޅުމަށް އިދިކޮޅު ކޯލިޝަނުން ނިންމައިފި އެވެ.
"މިހާރު" އަށް އެނގިފައިވާ ގޮތުގައި 42 އަށް ވުރެ ގިނަ މެމްބަރުން ސޮއިކުރައްވައި އެ ގަރާރު މަޖިލީހަށް ހުށަހަޅަނީ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތް މައްސަލައާ އެކު އެވެ. މަސީހުގެ މައްސަލާގައި 51 މެމްބަރަކު މިހާތަނަށް ސޮއިކުރައްވާފައި ވެ އެވެ. އެއީ އިދިކޮޅު ކޯލިޝަންގެ އިތުރުން ޕީޕީއެމާއި އެމްޑީއޭ މެމްބަރުން ވެސް ހިމެނޭގޮތަށް ކަމަށް އިތުބާރު ހުރި ފަރާތަކުން ޔަގީންކޮށްދެ އެވެ.
ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ގާނޫނާ ޚިލާފަށް ހައްޔަރުކުރި މައްސަލާގައި ނަޝީދުގެ މައްޗަށް އިއްވި 13 އަހަރުގެ ޖަލު ހުކުމް ތަންފީޒު ކުރައްވަމުން ގެންދަވަނިކޮށް ބޭސްފަރުވާއަށް އިނގިރޭސިވިލާތަށް ފޮނުވުމުން ހިމާޔަތް ހޯއްދަވައިގެން އުޅުއްވާ ނަޝީދު ރާއްޖެ ވަޑައިގަތުމަށް ނިންމާފައިވަނީ އަންނަ ހަފްތާގެ ބުރާސްފަތި ދުވަހު އެވެ.
ސުޕްރީމް ކޯޓުން ނަޝީދު މިނިވަން ނުކުރަނީސް ރާއްޖެ ވަޑައިގަންނަވާތީ އިދިކޮޅު ކޯލިޝަންގެ މެދުގައި ވެސް ވަނީ ހިޔާލު ތަފާތުވުން އުފެދިފަ އެވެ. ޖުމްހޫރީ ޕާޓީގެ ލީޑަރު ގާސިމް އިބްރާހިމް ފަދަ ބޭފުޅުން ވިދާޅުވަނީ ރައީސް ނަޝީދު ވަޑައިގަންނަވަން ވާނީ އޮންނަ އުސޫލުގެ ތެރެއިން ކޯޓުން މިނިވަން ވެގެން ކަމަށެވެ. ނަމަވެސް މިހާތަނަށް އެ މައްސަލަ ކޯޓަށް ހުށަހަޅާފައެއްނުވެ އެވެ.
އިދިކޮޅު ކޯލިޝަންގެ މަޖިލިސް މެމްބަރަކު ނަން ނުޖެހުމަށް އެދިވަޑައިގެން ވިދާޅުވީ މަޖިލީހުގެ މެޖޯރިޓީ މެމްބަރުންގެ ސޮޔާއެކު މާދަމާ ހުށަހަޅާ ޕެޓިޝަންގައި ބާރު އަޅާފައިވާނީ ނަޝީދަށް ހުކުމް ކޮށްފައި ވަނީ ނުހައްގުން ކަމަށްވާތީ މިނިވަން ކުރުމަށެވެ.