ނިއު ޒިލެންޑުގެ ކްރައިސްޗާޗުގެ ދެ މިސްކިތަކަށް މިއަދު ދިން ބަޑީގެ ހަމަލާތަކުގައި އެއްވެސް ދިވެއްސަކަށް އަނިޔާއެއް ނުވާ ކަމަށް ފޮރިން މިނިސްޓަރު އަބްދުﷲ ޝާހިދު މިއަދު ވިދާޅުވެއްޖެ އެވެ.
ކްރައިސްޗާޗުގައި ހުންނަ ދެ މިސްކިތަކަށް ހަމަލަ ދިން އިރު، އެތަނުގައި ގިނަ ބަޔަކު ދިޔައީ ނަމާދު ކުރަމުންނެވެ. ޓެރަރިސްޓް ހަމަލާގައި 40 މީހަކު މަރުވެ، 20 މީހަކު ވަނީ ޒަހަމްވެފަ އެވެ. އެތަނުން އެއް މިސްކިތުގައި ނަމާދު ކުރަން 100 އަށްވުރެ ގިނަ މީހުން ތިބި ކަމަށްވެ އެވެ.
ނިއު ޒިލެންޑްގެ ކްރައިސްޗާޗުގައި ދިވެހިންގެ ބަޔަކު ދިރިއުޅޭ އިރު، ހަމަލާ އަމާޒުވި ދެ މިސްކިތަށް ވެސް ދިވެހިން ގޮސް އުޅެ އެވެ. އެކަމަކު، އެ ގައުމުގައި އުޅެނީ ކިހާ ދިވެހިންނެއް ކަމެއް މިނިސްޓްރީން އަދި ނުބުނެ އެވެ.
ޓެރަރިސްޓް ހަމަލާ ކުށްވެރި ކުރައްވައި ރައީސް އިބްރާހިމް މުހައްމަދު ސޯލިހް ކުރެއްވި ޓުވީޓެއްގައި ވިދާޅުވީ ރާއްޖެ އިން އޮތީ ހަމަލާ އަމާޒުވި މީހުންގެ އާއިލާ އާއި ގައުމުގެ ރައްޔިތުންނާ އެކު ކަމަށެވެ. އަދި އެއްވެސް ތަނެއްގައި ޓެރަރިޒަމަށް ޖާގަ ދެވިގެން ނުވާނެ ކަމަށް އެމަނިކުފާނު ވިދާޅުވި އެވެ.
ފޮރިން މިނިސްޓަރު ޝާހިދު ވެސް ވަނީ ޓެރަރިސްޓް ހަމަލާ ކުށްވެރި ކުރައްވައިފަ އެވެ.
ނޫސްވެރިންނާ ވާހަކަ ދައްކަވަމުން ޕޮލިސް ކޮމިޝަނަރު މައިކް ބުޝް ވިދާޅުވީ ތިން ފިރިހެނުންނާއި އެއް އަންހެނަކު ހައްޔަރުކޮށްފައިވާ ކަމަށެވެ. މަންޒަރު ދުށް މީހުން ބުނީ ކްރައިސްޗާޗުގެ އަލް ނޫރު މިސްކިތުގައި ލެއިންތަތްތެޅި ވެއްޓިފައިވާ އެތައް ބަޔަކު ތިބި ކަމަށެވެ.
ހަމަލާއާ ގުޅިގެން ނިއު ޒީލެންޑުގެ ހުރިހާ މިސްކިތެއް ބަންދުކުރުމަށް ކަމާބެހޭ ފަރާތްތަކުން ވަނީ އަންގައިފަ އެވެ. ކްރައިސްޗާޗުގެ ހުރިހާ ސްކޫލެއް ވެސް މިހާރު ވަނީ ބަންދުކޮށްފަ އެވެ.
ނިއު ޒިލެންޑްގެ ބޮޑު ވަޒީރު ޖަސިންޑާ އާޑާން ނެރުއްވި ބަޔާނެއްގައި ވިދާޅުވީ މިއީ "ނިއު ޒީލެންޑުގެ ހަޔާތުގައި އެންމެ ކަޅު އެއް ދުވަސް" ކަމަށެވެ. ބޮޑު ވަޒީރު ވިދާޅުވި ގޮތުގައި މިއީ ބަޔަކު ދިން ޓެރަރިސްޓް ހަމަލާ އެކެވެ.