ވެމްކޯ އިން ކުނި އުފުލަން ގެންގުޅޭ ވެހިކަލެއްގައި ހުރި ކުނިތަކެއްގައި ރޯވެފައި ވަނިކޮށް ފުލުހުންނަށް ފެނި، އަލިފާން ނިއްވާލައިފި އެވެ.
ފުލުހުން ބުނީ ކުނިތަކުގައި ރޯވެފައި ހުއްޓާ ފެނުނީ ފުލުހުންގެ ސީސީޓީވީ ފުޓޭޖް މޮނިޓަކުރުމުގެ ތެރޭގައި، މިރޭ 9:56 ގައި ކަމަށެވެ. އަދި އެ މަންޒަރު ފެނުމާ އެކު ފުލުހުން ގޮސް 10:10 ގައި އަލިފާން ނިއްވާލި ކަމަށް ވެސް ފުލުހުން ބުންޏެވެ.
ރޯވީ، ފުލުހުން ބުނި ގޮތުގައި އޯކިޑް މަގާއި ޗާންދަނީ މަގު ގުޅޭ ކަންމަތީގައި އޮތް ވެހިކަލެއްގައި ހުރި ކުނިތަކެއްގަ އެވެ.
ރޯވި ވެހިކަލުން ކުނި ހުސްކޮށްފައި. -- ފޮޓޯ: ޕޮލިސް
އަލިފާން ރޯވާން ދިމާވި ސަބަބާ ބެހޭ ގޮތުން ފުލުހުން ވަކި އެއްޗެއް ނުބުނެ އެވެ.
މި ހާދިސާގައި މީހަކަށް އަދި ވެހިކަލަށް ވެސް ގެއްލުމެއް ނުވެ އެވެ.