މާލެއިން މިދިޔަ އަހަރު 922 ޓަނުގެ ޕްލާސްޓިކް ކުނި ބޭރުކުރި

މާލެ ސަރަހައްދުން މިދިޔަ އަހަރު 922 ޓަނުގެ ޕްލާސްޓިކް ކުނި ބޭރުކޮށްފައިވާކަން ވެމްކޯގެ ތަފާސްހިސާބުތަކުން ދައްކައިފި އެވެ.

ދުނިޔޭގެ ތިމާވެށީގެ ދުވަހާ ގުޅުވައިގެން ވެމްކޯއާ ހަވާލާދީ މޯލްޑިވްސް ބިއުރޯ އޮފް ސްޓެޓިސްޓިކްސް އިން މިދިޔަ ބުރާސްފަތި ދުވަހު އާންމުކުރި ތަފާސްހިސާބުތަކުގައިވާ ގޮތުގައި، މާލެ ސަރަހައްދުން މިދިޔަ އަހަރު 922 ޓަނުގެ ޕްލާސްޓިކް ކުނި ބޭރުކޮށްފައިވެ އެވެ. އެންމެ ގިނައިން ޕްލާސްޓިކް ކުނި ބޭރުކޮށްފައި ވަނީ މިދިޔަ އަހަރުގެ ނޮވެމްބަރު މަހު އެވެ. އެއީ 135 ޓަނުގެ ޕްލާސްޓިކް ކުންޏެވެ.

މާލެ ސަރަހައްދުން ބޭރުކޮށްފައިވާ ކުނީގެ ތަފުސީލް

• 131،713 ޓަނުގެ މިކްސްޑް ވޭސްޓް

• 44،684 ޓަނުގެ ތެތް ކުނި

• 22،124 ޓަނުގެ ގާކުނޑި

• 11،592 ޓަނުގެ ގޭގެއިން ބޭރުކުރާ ބޮޑެތި ކުނި

• 10،385 ޓަނުގެ ލަކުޑި ކުންޏާއި ފަތްކުނޑި

• 4،948 ޓަނުގެ ކަރުދާހާއި ކާޑުބޯޑު ކުނި

• 861 ޓަނުގެ މެޑިކަލް ވޭސްޓް

ރާއްޖޭގައި ޕްލާސްޓިކް ކުނި އުފެދޭ ވަރު މަދުކުރުމަށް ސަރުކާރުން ވަނީ މީގެ ކުރިން ގިނަ ފިޔަވަޅުތަކެއް އަޅައިފަ އެވެ. އެކި ފިޔަވަހިތަކަކަށް ބަހާލައިގެން އަންނަނީ ޕްލާސްޓިކްގެ އެކި ބާވަތްތައް މަނާކުރަމުންނެވެ. ތިމާވެއްޓަށް ގެއްލުންދޭ ސިންގަލް ޔޫސް ޕްލާސްޓިކް މަނާކުރުމުގެ ލިސްޓުގެ ދަށުން މަނާކުރާ އެންމެ ފަހު ބާވަތް ކަމަށްވާ ޕްލާސްޓިކް ކުދި ފެންފުޅި އަންނަ އަހަރުގެ މާޗު އެކަކުން ފެށިގެން މަނާވާނެ އެވެ.

ރާއްޖެއަށް އެތެރެކުރުމާއި އުފެއްދުމާއި ބާޒާރަށް ނެރުން މަނާ، އެއް ފަހަރު ބޭނުންކޮށްފައި އުކާލާ ޕްލާސްޓިކުގެ ބާވަތްތަކުގެ ލިސްޓެއް އެކުލަވާލީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގަ އެވެ. އޭގެ ދަށުން އެކި ތާރީހުތަކަށް ބަހާލައިގެން ޖުމްލަ 13 ބާވަތެއްގެ ޕްލާސްޓިކް މިހާތަނަށް ވަނީ މަނާކޮށްފަ އެވެ.

މުޅި ދުނިޔެއަށް ކުރިމަތިވެފައިވާ ޕްލާސްޓިކް ކުނީގެ ނުރައްކަލާއި ރާއްޖޭގެ ކަނޑުތަކުގައި އޮޔާދާ ކުނީގެ ނުރައްކަލަކީ ރާއްޖޭގެ ގުދުރަތީ ރީތިކަމަށް ނޭދެވޭ އެތައް އަސަރެއް ކުރާ ގައުމީ ބޮޑު މައްސަލައެކެވެ.

ސްޓެޓިސްޓިކްސް ބިއުރޯ އިން ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްްއޭ)އާ ހަވާލާދީ ބުނީ އެ އޮތޯރިޓީއަށް މިދިޔަ އަހަރު އެންމެ ގިނައިން ރިޕޯޓްކޮށްފައި ވަނީ ވާރޭވެހިގެން ފެންބޮޑުވުމުގެ ހާދިސާތައް ކަމަށެވެ.

ވާރޭވެހިގެން ފެންބޮޑުވުމުގެ 93 ހާދިސާއެއް އެންޑީއެމްއޭ އަށް މިދިޔަ އަހަރު ރިޕޯޓްކޮށްފައިވެ އެވެ. ދެންމެ އެންމެ ގިނައިން ރިޕޯޓްކޮށްފައި ވަނީ އަލިފާނުގެ ހާދިސާތަކެވެ. އެއީ 83 ހާދިސާއެކެވެ. ގަދައަށް ވައިޖެހިގެން ގެއްލުން ލިބިގެން 57 ހާދިސާއެއް ވެސް ރިޕޯޓްކޮށްފައިވެ އެވެ.

ސްޓެޓިސްޓިކްސް ބިއުރޯ އިން ސްޓެލްކޯގެ ތަފާސްހިސާބުތަކާ ހަވާލާދީ ބުނީ އެ ކުންފުނިން ކަރަންޓުގެ ހިދުމަތް ދިނުމަށް އުފައްދާ ހަކަތައިގެ 98 ޕަސެންޓަކީ ތެލުން އުފައްދާ ހަކަތަ ކަމަށެވެ. އަމިއްލަ ގޭގޭގައި ސޯލާ ޕަވާ ސިސްޓަމްތައް ހަރުކޮށްގެން 1.4 ޕަސެންޓް އިޔާދަކުރަނިވި ހަކަތަ އުފައްދަ އެވެ. އަދި ސީދާ އެ ކުންފުނީގެ ބެލުމުގެ ދަށުން އުފައްދަނީ އެންމެ 0.3 ޕަސެންޓް އިޔާދަކުރަނިވި ހަކަތަ އެވެ.