ފަނޑިޔާރަކު ނިންމާ ނިންމުމެއްގެ މެރިޓާ ގުޅުވައިގެން އެ ފަނޑިޔާރަކާ މެދު ސުލޫކީ ފިޔަވަޅެއް ނޭޅޭނެ ކަމަށް އަންގައި ސުޕްރީމް ކޯޓުން އަމުރެއް ނެރެފި އެވެ.
މި އަމުރު ނެރެފައިވަނީ ސުޕްރީމް ކޯޓުގެ ފަނޑިޔާރު އަބްދުﷲ ދީދީއާ ގުޅޭ ގޮތުން ހުށަހަޅާފައިވާ ސުލޫކީ މައްސަލައެއް ބަލަމުން ދާތީ އޭނާ ސަސްޕެންޑްކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) ނިންމުމުން، އެއަށް އަމަލުކުރުން ފަސްކުރުމަށް ސުޕްރީމް ކޯޓުން ނެރުނު ވަގުތީ އަމުރު ގާނޫނުއަސާސީއާ ހިލާފް ކަމަށް ރައްޔިތުންގެ މަޖިލީހުން މިއަދު ފާސްކޮށްފައި ވަނިކޮށެވެ.
އަދުލު އިންސާފު ގާއިމުކުރުމުގެ އެންމެހާ ބާރުތައް ލިބިގެންވަނީ ސުޕްރީމް ކޯޓަށް ކަމަށާއި ފަނޑިޔާރުންގެ މަސައްކަތާ ބެހި ނުފޫޒު ފޯރުވައިގެން ނުވާނެކަން ބަޔާންކޮށް ގާނޫނުއަސާސީގައި ބަޔާންކޮށްފައިވާ މާއްދާތަކާ ހަވާލާ ދެމުން ކޯޓު އަމުރުގައި ބުނެެފައިވަނީ ފަނޑިޔާރަކު މަސްއޫލިއްޔަތާއި ވާޖިބު އަދާކުރުމުގައި ދިން ރައުޔަކާ ގުޅިގެން ނުވަތަ ކުރި ހުކުމަކާ ގުޅިގެން، ގާނޫނުއަސާސީގައި ބުނާ އިސްތިއުނާފު ކުރުމުގެ ހަމަތަކުގެ ބޭރުން ނުވަތަ ފަނޑިޔާރުންގެ ގާނޫނުގައި ބުނާ ސުލޫކީ މައްސަލަ ބެލުމުގެ އުސޫލުތަކުގެ ބޭރުން ފަނޑިޔާރަކު ޖަވާބުދާރީ ނުކުރެވޭނެ ކަމަށެވެ.
މީގެ އިތުރުން، ސުޕްރީމް ކޯޓުން ނިންމާފައިވާ ނިންމުމެއް ބަދަލުކުރުމަށް ނުވަތަ ބާތިލްކުރުމަށް ނުވަތަ އެ ނިންމުމަކާ ދުރަށް ދިއުމަށް ނުވަތަ އެ ނިންމުމަށް ފަހުގެ ނިންމުންތަކާ ތަފާތުކުރުމަށް ސުޕްރީމް ކޯޓަށް ލިބިދޭ އިހްތިޔާރަކަށް ހުރަހެއް ނެތް ކަމަށް ކޯޓުތަކުގެ ގާނޫނުގައި ބަޔާންކޮށްފައިވާކަން އަމުރުގައި ވަނީ ބަޔާންކޮށްފަ އެވެ. އަދި ބައިނަލްއަގުވާމީ މުއާހަދާތަކާއި އާލަމީ އުސޫލުތަކާއި އިސްލާމީ ޝަރީއަތުގައި އަދުލުއިންސާފު ގާއިމުކުރުން ކަށަވަރުކޮށްދިނުމުގެ ދަލީލުތަކާއި އުސޫލުތަކަށް ބެލުމުން ރާއްޖޭގެ އެއްވެސް މަރުހަލާއެއްގައި މައުލޫއީ ގޮތުން ނުވަތަ އިޖުރާއީ ގޮތުން ވިޔަސް، މެރިޓާ ގުޅުވައިގެން އެ ނިންމުމެއް ގޯސް ކަމަށް ބުނެ އެއްވެސް ބާވަތެއްގެ ތައުދީބީ ފިޔަވަޅެއް އެޅުމަކީ އެއްވެސް ފަރާތަކަށް ލިބިދީފައިވާ އިހްތިސާސެއް ނޫން ކަމަށް އަމުރުގައިވެ އެވެ.
މި އަމުރު ނެރުމުގެ އިރުކޮޅެއް ކުރިން ރައްޔިތުންގެ މަޖިލީހުން ވަނީ ފަނޑިޔާރު ޑީޑީ ސަސްޕެންޑްކުރަން ޖޭއެސްސީން ނިންމި ނިންމުމުގައި ގާނޫނީ ބާރު އެބައޮތް ކަމަށް ރައްޔިތުންގެ މަޖިލިހުގެ ޖުޑިޝަރީ ކޮމިޓީން ނިންމައި އެ ރިޕޯޓު މަޖިލިހުން ފާސްކޮށްފަ އެވެ. އަދި އެ ނިންމުމަށް އިސްލާހެއް ގެނެސް ޑީޑީގެ މައްސަލާގައި އަމުރާ ހިލާފު ހުރިހާ ކަމެއް ބާތިވާނެ ކަމަށް ބުނެ ސުޕްރީމް ކޯޓުން ނެރުނު އަމުރަކީ ގާނޫނުއަސާސީއާ ކަނޑައެޅިގެން ހިލާފު އަމުރެއް ކަމަށް ވެސް ބުނެފައިވެ އެވެ. އަދި ގާނޫނުއަސާސީން މަޖިލިހަށް މަތިކޮށްފައިވާ ބާރަށާއި މަސައްކަތަށް ހުރަސް އެޅޭ ގޮތަށާއި ގާނޫނުއަސާސީއާ ހިލާފަށް އެއްވެސް އަމަލެއް ނުހިންގުމަށް ކޯޓަށް އިލްތިމާސްކުރާ ކަމަށް އިސްލާހުގައިވެ އެވެ.
މި ރިޕޯޓު މަޖިލިހުން ފާސްކުރީ ވޯޓުގައި ބައިވެރިވެވަޑައިގެންނެވި އެމްޑީޕީގެ 64 މެމްބަރުންގެ އިއްތިފާގުންނެވެ.