ގަލްފް އިންފޮމޭޝަން ޓެކްނޮލޮޖީ އެގްޒިބިޝަން (ޖީޓެކްސް 2019) ގައި ބައިވެރިވެ ވަޑައިގަތުމަށް ޔުނައިޓެޑް އަރަބް އެމިރޭޓްސް (ޔޫއޭއީ) އަށް ކުރެއްވި ދަތުރަށް ދައުލަތުން އެއްވެސް ޚަރަދެއް ނުކުރައްވާ ކަމަށް ޑިފެންސް މިނިސްޓަރު މާރިޔާ އަހްމަދު ދީދީ މިއަދު ވިދާޅުވެއްޖެ އެވެ.
ޖީޓެކްސްގައި މިދިޔަ ހަފުތާގައި ބައިވެރިވެ ވަޑައިގަތުމަށް ފަހު މާރިޔާ ވަނީ ރާއްޖެ ވަޑައިގެންފަ އެވެ.
އެކަމަކު އެ ދަތުރުގައި ޔޫއޭއީގެ ބޮޑުވަޒީރުގެ ނައިބު ސައިފް ބިން ޒައިދާ އެކު ބޭއްވި ބައްދަލުވުމުގައި މާރިޔާއާ އެކު އޭނާގެ ދަރިކަލުން ބައިވެރިވެ ވަޑައިގެންފައިވާތީ ސޯޝަލް މީޑިއާގައި އެކަމަށް ފާޑު ކިޔުން އަމާޒުވި އެވެ.
މާރިޔާ ކުރެއްވި ޓުވީޓެއްގައި ވިދާޅުވީ އޭނާގެ ދަތުރުގެ ކަންކަން ހަމަޖެއްސީ ދިވެހި ސަރުކާރަކުން ނޫން ކަމަށެވެ. އެ ދަތުރުގައި އޭނާގެ އާއިލާގެ މެމްބަރެއްގެ އެއްވެސް ކަމަކަށް ވެސް ދައުލަތުން އެއްވެސް ޚަރަދެއް ނުހިނގާ ކަމަށް ވިދާޅުވި އެވެ.
ޔޫއޭއީގެ ޑުބާއީގައި ޖީޓެކްސް 2019 ކުރިއަށް ގެންދިޔައީ މިމަހުގެ ހަ ވަނަ ދުވަހުން ފެށިގެން އިއްޔެގެ ނިޔަލަށެވެ.
އެ ދަތުރުގައި ޒައިދާ އެކު ކުރެއްވި މަޝްވަރާތަކަށް ފަހު މިނިސްޓަރު މާރިޔާ ވިދާޅުވެފައި ވަނީ ރާއްޖޭގައި ފަޔަމަނުން ތަމްރީންކުރަން ޔޫއޭއީން އެހީވާން ނިންމާފައިވާ ކަމަށެވެ. ފަޔަމަނުން ތަމްރީންކުރާނީ ޔޫއޭއީގެ މަޝްހޫރު އިންސްޓިޓިއުޓެއްގައި ކަމުގެ ޔަގީން ކަން ވެސް ޒައިދު ދެއްވި ކަމަށް މިނިސްޓަރު ވަނީ ވިދާޅުވެފަ އެވެ.
