ހަރުކަށި ފިކުރާ ދެކޮޅަށް ރ. މަޑުއްވަރީގައި ހިންގި އޮޕަރޭޝަންގައި އެ ރަށުގެ ކުއްޖަކު މައިންބަފައިންގެ އަތުން ނަގައި ކުއްޖާގެ ބޮޑުދައިތައާ ހަވާލުކޮށްފި އެވެ.
ފުލުހުން ބުނީ މައިންބަފައިންގެ އަތުން ކުޑަ އަންހެން ކުއްޖަކު އަތުލީ ކުޑަކުދިންނަށް ކިޔަވައިދިނުމަށާއި ވެކްސިން ދިނުމަށް އެއާއިލާއިން އިންކާރު ކުރާތީ ފުލުހުންގެ ހާޒިރުގައި ޖެންޑާ މިނިސްޓްރީގެ ފަރާތުން ތަކުރާރުކޮށް ނަސޭހަތް ދިނުމުން ނަސޭހަތް ދިނުމުން ވެސް ގަބޫލުނުކުރުމުން ކަމަށެވެ.
މަޑުއްވަރީގައި ހިންގި އޮޕަރޭޝަނުގައި ނަސޭހަތް ދިނުމުން އެއް އާއިލާއެއްގެ ތިން ކުއްޖަކަށް ވެކްސިން ދީފައިވާ ކަމަށް ވެސް ބުންޏެވެ.
ހަރުކަށި ފިކުރު ފެތުރޭތީ މަޑުއްވަރީގައި ފުލުހުންނާއި ސިފައިން ހާއްސަ އޮޕަރޭޝަނެއް ފެށީ ބުދަ ދުވަހު އެވެ. އެ އޮޕަރޭޝަނުގައި އެރަށުގެ ހަތް ގެއަކާއި ދޯންޏެއް ބަލައި ފާސްކޮށް ތިން މީހަކު ހައްޔަރުކޮށް ގިނަ އަދަދެއްގެ އިލެކްޓްރޯނިކް ސާމާނު ފުލުުހުންގެ ބެލުމުގެ ދަށަށް ގެންދިޔަ އެވެ.
