މަރުގެ މައްސަލަތަކުގައި އަންހެނުންގެ ހެކިބަސް ވެސް ގަބޫލުކުރެވޭނެ ކަމަށް ހައި ކޯޓުން މިއަދު ކަނޑައަޅައިފި އެވެ.
ހައި ކޯޓުން އެގޮތަށް ކަނޑައެޅީ މީގެ ނުވަ އަހަރު ކުރިން ވިލިމާލޭގައި ގްރޫޕަކުން ހަމަލާދީ މަރާލި ނ. މާޅެންދޫ ވައިޓްހައުސް، އަހުމަދު މިރުޒާ އިބްރާހިމްގެ މަރުގެ މައްސަލާގައި މަރަން ހުކުމް ކޮށްފައިވާ ދެ މީހުންގެ ތެރެއިން ޏ. ފުވައްމުލަކު ޒާވިއާ އަބްދުﷲ ނަޒީފްގެ މަރުގެ ހުކުމް ދަމަހައްޓައި، އެ ކޯޓުން ކުރި ހުކުމުގަ އެވެ.
އިސްލާމީ ޝަރީއަތުގައިި ހައްދާއި މަރުގެ މައްސަލަތައް ސާބިތުވާނީ ދެ ފިރިހެނުންގެ ހެކިބަހުން ކަމަށް ވާއިރު އެ މައްސަލާގައި ހެކިބަސް ދިން މީހުންގެ ތެރޭގައި އަންހެނުން ތިިބި ކަމަށް ބުނެ އެކަން ހައި ކޯޓުގައި ނަޒީފްގެ ފަރާތުން ފާހަގަކުރި އެވެ.
މަރުގެ މައްސަލަތަކުގައި މީގެ ކުރިންވެސް އަންހެނުންގެ ހެކި ބަސް ބަލައިގަންނަމުން އަޔަސް މިއީ އެ ބާވަތުގެ މައްސަލަތަކުގައި އަންހެނުންގެ ހެކިބަސް ބަލައިގަތުމާ މެދު މަތީ މަރުހަލާގެ ކޯޓަކުން ގޮތެއް ނިންމި ފުރަތަމަ ފަހަރެވެ. އެހެންކަމުން އެ ސުވާލާ މެދު، ހައި ކޯޓުން ނިންމި ގޮތުން އެއީ އެކަމުގައި ކުރިއަށް އޮތް ތަނުގައި ވެސް ބަލައިގަންނާނެ އުސޫލެއް ކަނޑައެޅުނީ އެވެ.
ތިން ފަނޑިޔާރުން ހިމެނޭ ބެންޗުން އިއްތިފާގުގައި ނިންމީ ޒިނޭ ފިޔަވައި އެހެން މައްސަލަތަކުގައި މަދުވެގެން ދެ ފިރިހެނުންގެ ހެކިބަހުން ކުށް ސާބިތުވުމަކީ އިސްލާމީ ފިގުހުގެ އާންމު އުސޫލު ކަމަށް ވިޔަސް، އެއީ ޚިލާފެއް ނެތް އުސޫލެއް ނޫން ކަމަށެވެ. އަދި މަރުގެ މައްސަލަތަކުގައި ފިރިހެނަކާއި ދެ އަންހެނެއްގެ ހެކިބަސް ވެސް ބަލައިގަނެވިދާނެ ކަމަށް ބައެއް އިލްމުވެރިން ވިދާޅުވާ ކަމަށް އެ ހުކުމުގައިވެ އެވެ.
ރާއްޖޭގައި މިހާރު އަމަލުކުރާ އަންހެނުންގެ ހެކިބަހުގެ ގާނޫނު އޮތް ގޮތުން ގުރުއާނުގައި ކަނޑައެޅިފައިވާ ކަންކަން ފިޔަވައި އެހެން ކަންކަމުގައި އަންހެނުންނާއި ފިރިހެނުންގެ ހެކިބަސް ހަމަހަމަވާ ކަން ފާހަގަކޮށް، އެ ހުކުމުގައި ބުނީ ހެކިބަސް ދިނުމުގައި ގުރުއާނުގައި ކަނޑައަޅާފައިވަ ކަންކަން ބަޔާންކުރާ ޝަރީއަތް ކުރުމާ ބެހޭ ގަވާއިދު އޮތްގޮތުން ވެސް ހައްދުގެ މައްސަލަތަކުގެ ތެރެއިން ފިރިހެނުންގެ ހެކިބަހުން އެކަނި ސާބިތު ކުރެވެނީ ޒިނޭގެ މައްސަލަތައް ކަމަށެވެ. އެހެންވެ، މަރުގެ މައްސަލަތަކުގައި ގަބޫލުކުރެވޭނީ ދެ ފިރިހެނުންގެ ހެކިބަސް އެކަނި ކަމަށް ނުބުނެވޭނެ ކަމަށް ވެސް އެ ހުކުމުގައިވެ އެވެ.
"ޒިނޭ ފިޔަވައި ހައްދާއި ގިސާސްގެ މައްސަލަތަކުގައި ހެކިބަސް އަދާކުރާ މީހަކީ ކަނޑައެޅިގެން ދެ ފިރިހެނުން ކަމުގައި މުތުލަގަށް ބުނެވެން ނެތް ކަމާއި، ވީމާ ކީރިތި ގުރުއާނުގައި ކަނޑައެޅި ބަޔާން ވެފައިވާ ކަންކަން ފިޔަވައި އެހެން ކަންކަމުގައި އަންހެނުންނާއި ފިރިހެނުންގެ ހެކިބަސް ހަމަހަމަ ކުރުމަށް ގާނޫނުގައި ކަނޑައެޅިފައިވާ މި އުސޫލަކީ ކަނޑައެޅިގެން އިސްލާމީ ފިގުހާ ޚިލާފް އުސޫލެއް ނޫން" ކަމަށް، ފަނޑިޔާރު މުހައްމަދު ނިޔާޒް ރިޔާސަތު ބެލެހެއްޓެވި ބެންޗުން އިއްވެވި ހުކުމުގައިވެ އެވެ.
މަރުގެ މައްސަލަތަކުގައި މެޑިކަލް އެވިޑެންސް ފަދަ ހެކިތައް ވެސް އިސްލާމީ ނިޒާމުގައި ބަލައިގެންފައިވާ ކަން ފާހަގަކޮށް، އެ ހުކުމުގައި ބުނީ އެއީ ޒަމާނުގެ ހާލަތާ ގުޅޭ ގޮތުން ފުޅާވަމުންދާނެ އިލްމެއް ކަމަށެވެ. އެހެންވެ، މަރުގެ މައްސަލަތައް ސާބިތުކުރެވޭނީ ހަމައެކަނި ދެ ފިރިހެނުންގެ ހެކިބަހުން ކަމަށް ބުނެ އެކަން ހަނިނުކުރެވޭނެ ކަމަށް ވެސް އެ ހުކުމުގައިވެ އެވެ.
ފަނޑިޔާރު ނިޔާޒްގެ އިތުރުން އެ މައްސަލަ ބެއްލެވި ބެންޗުގައި ދެން ތިއްބެވީ ފަނޑިޔާރު ހުސައިން ޝަހީދާއި ފަނޑިޔާރު ޝުއައިބު ހުސައިން ޒަކަރިއްޔާ އެވެ.