ސްރީ ލަންކާގައި ތިބި ދިވެހިންގެ ޒަރޫރީ ބޭނުންތަކަށް ރާއްޖެ އިން އެހީ ފޮނުވޭގޮތް ހަމަޖައްސައި ކޮންމެ އާދީއްތަ ދުވަހަކު މޯލްޑިވިއަންގެ ކާގޯ ފްލައިޓުން 15 ކިލޯ، ކޮންމެ އާއިލާއަކަށް ފޮނުވޭނެ އިންތިޒާމު ހަމަޖައްސާފައިވާ ކަމަށް ފޮރިން މިނިސްޓްރީން މިއަދު ބުނެފި އެވެ.
ކޮރޯނާވައިރަހުން ރައްކާތެރިވުމުގެ ފިޔަވަޅެއްގެ ގޮތުން، ލަންކާގައި ވަނީ މުއްދަތެއް ނެތް ގޮތަށް ކާފިއު އިއުލާން ކޮށްފަ އެވެ. މިކަމުގެ ސަބަބުން ޒަރޫރީ ބޭނުންތައް ފުއްދުމުގައި، އެ ގައުމުގައި ދިރިއުޅޭ ދިވެހިންނަށް ވެސް ވަނީ އުނދަގޫތަކެއް ކުރިމަތިވެފަ އެވެ.
ފޮރިން މިނިސްޓްރީ މެދުވެރިވެ މި ކަމަށް ހައްލު ހޯދާފައިވާ އިރު، ކާގޯގެ ގޮތުގައި ފޮނުވެނީ ސްރީ ލަންކާ އިން ލިބެން ނެތް ބޭހެއް ނުވަތަ އެހެން ޒަރޫރީ ކަމެއްގައި ފޮނުވާ ތަކެއްޗެވެ. އެ މިނިސްޓްރީން މިހާރު ވަނީ، ލަންކާ އަށް ފޮނުވޭނެ ތަކެތީގެ ތަފްސީލް ލިސްޓަކާއި އަމަލުކުރަން ޖެހޭ ގޮތް ވެބްސައިޓުގައި އާއްމުކޮށްފަ އެވެ.
ކާގޯގެ ގޮތުގައި ފޮނުވޭނެ ތަކެތި:
- ލަންކާ އިން ލިބެން ނެތް ބޭސް (ޕްރިސްކްރިޕްޝަން ސިޓީ އޮންނަން ޖެހޭ.)
- މަސް ދަޅު ކޭސް
- ނޫޑުލްސް
- ރަނގަށް ބަންދުކޮށްފައި ހުންނަ ރިހާކުރު ފުޅި
- މަސް ޕެކެޓް، ފަތް ޕެކެޓް
ކާގޯ ފްލައިޓުގައި ފޮނުވުން މަނާތަކެތީގެ ތެރޭގައި ފައިސާ އާއި ރޯމަހާއި ކޭކާއި ހެދިކާ އާއި މޭވާ އަދި ތަރުކާރީ ފަދަ ބާވަތްތައް ހިމެނެ އެވެ.
ލަންކާ އަށް ފޮނުވާ ތަކެއްޗާ ދިވެހި އެމްބަސީން ހަވާލުވެ، އާއިލާތަކަށް އެ ތަކެތި ފޯރުކޮށްދޭނީ އެތަނުންނެވެ. އެހީގެ ތަކެތި ފޮނުވާއިރު ލިބެންވާ ފަރާތުގެ ވެސް މައުލޫމާތު ތަފްސީލްކޮށް ލިއުމަށް މިނިސްޓްރީން އެދެ އެވެ.
ކޮންމެ މަތިންދާބޯޓަކަށް ވެސް ކާގޯގެ ގޮތުގައި ގެންދެވެނީ ވަކި މިންވަރަކަށެވެ. އެހެންވެ މިނިސްޓްރީން ކަނޑައަޅާފައި ވަނީ ފޯމު ހުށަހަޅާ ތަރުތީބުން އިސްކަންދީގެން އެހީގެ ތަކެތި ފޮނުވުމަށެވެ. މި ތަކެތި ބަލައިގަންނާނީ ގްރޭޓާ މާލެ ބަސް ސްޓޭޝަންގައި ހުންނަ މޯލްޑިވިއަން ސިޓީ ޗެކިން އޮފީހުން ކޮންމެ ހޮނިހިރު ދުވަހެއްގެ ހެނދުނު 9:00 އިން މެންދުރު 1:00 އަށެވެ.
ލަންކާގައި ތިބިި ދިވެހިންނަށް އެހީ ފޮނުވުމުގެ ފުރުސަތު އެ މީހުންގެ އާއިލާތަކަށް ހަމަޖައްސައިދޭން ނިންމިއިރު، ލަންކާގައި ތިބި ދިވެހިންގެ ތެރެއިން ރާއްޖެ އަންނަން ބޭނުންވާ މީހުން ގެނެވޭނެ ގޮތެއްވޭތޯ ބަލަމުން އަންނަ ކަމަށް ސަރުކާރުން ކުރިން ވަނީ ބުނެފަ އެވެ.
ކޮޮވިޑް-19 އާ ގުޅިގެން ލަންކާގެ އިތުރުން އިންޑިއާ އާއި ނޭޕާލް ވެސް ބަންދުކޮށް، ވައިގެ ދަތުރުތައް ހުއްޓާލާފައިވާތީ ބައެއް ދިވެހިން އެ ގައުމުތަކުގައި ވެސް ރާއްޖެ ނާދެވިފައި އެބަތިއްބެވެ. އެ މީހުންނަށް ވެސް ބޭނުންވާ އެހީ ފޯރުކޮށްދެމުންދާ ކަމަށް ސަރުކާރުން ބުނެފައިވެ އެވެ.
ކޮވިޑަށް19 އަށް ރާއްޖެ އިން ޕޮޒިޓިވްވި އަދަދު މިހާރު ވަނީ 18 އަށް އަރައިފަ އެވެ. އޭގެ ތެރޭގައި އިނގިރޭސި ވިލާތުން އައިސް ކަރަންޓީން ފެސިލިޓީގައި ހުއްޓާ ޕޮޒިޓިވްވި ތިން ދިވެހިން ވެސް ހިމެނެ އެވެ. އެންމެ ފަހުން ދިވެއްސަކު ކޮވިޑް-19 އަށް ޕޮޒިޓިވްވިކަން އެޗްޕީއޭ އިން އިއުލާންކުރީ މިއަދެވެ. އަނެއް ދެ މީހުން ޕޮޒިޓިވްވި ކަން އެނގުނީ މިދިޔަ ހުކުރާއި އާދިއްޔަ ދުވަހު އެވެ. ރާއްޖެ އިން ކޮވިޑް-19 އަށް ޕޮޒިޓިވްވި މީހުންގެ ތެރެއިން މިހާތަނަށް ރަނގަޅުވީ 13 މީހެކެވެ. އެއީ ކުރެއްދޫ އައިލެންޑް ރިސޯޓުގެ ތުރުކީގެ ޑޮކްޓަރާއި އެ ރިސޯޓުގެ އެހެން ބިދޭސީ މުވައްޒަފެކެވެ. ރާއްޖެ އިން ކޮވިޑް-19 އަށް ޕޮޒިޓިވްވި 18 މީހުންގެ ތެރެއިން ދެ ޓޫރިސްޓެއްގެ ނަތީޖާ ލިބުނުއިރު އެ ދެ މީހުން ވަނީ މިދިޔަ ހުކުރު ދުވަހު ފުރައިފަ އެވެ. އައިލެންޑް ސަފާރީ-1 އިން ކޮވިޑް-19 އަށް ޕޮޒިޓިވްވި ދެ ޓޫރިސްޓުންނާ "ކްލޯޒްޑް ކޮންޓެކްޓް" އޮތް މި ދެ މީހުންގެ ފަރާތުން ބަލީގެ އަލާމާތެއް ނުފެނުނަސް ޓެސްޓު ކުރީ އެޗްޕީއޭ އިން ކުރާ ދިރާސާ އަކަށް ކަމަށް އެ އިދާރާ އިން ބުނެފައި ވެ އެވެ.