ކޮވިޑް-19 ގެ ސަބަބުން އެކި ގައުމުތަކުގައި ތާށިވެފައި ތިބި ދިވެހިން ރާއްޖެ ގެނައުމަށް ފޮރިން މިނިސްޓްރީން ކުރަމުން އަންނަ މަސައްކަތުގެ ތެރެއިން ލަންކާގައި ތާށިވެފައި ތިބި 200 އަށް ވުރެ ގިނަ މާދަމާ ރާއްޖެ ގެންނާނެ ކަމަށް ފޮރިން މިނިސްޓްރީން ބުނެފި އެވެ.
ފޮރިން މިނިސްޓްރީން މިއަދު ބުނީ މިރޭ ފަތިހު ޗެކިން ފަށާ ސްރީ ލަންކަން އެއާލައިންސުން ރާއްޖެ އަންނަން ބޭނުންވާ މީހުންނަށް 290 ޖާގަ ޚާއްސަ ކޮށްފައިވާ ކަމަށެވެ. އެކަމަކު، އެނގިފައިވާ ގޮތުގައި މިހާތަނަށް ޓިކެޓު ނަގާފައި ވަނީ 260 ވަރަކަށް މީހުންނެވެ.
ލަންކާގަައި ރާއްޖެ އައުމުގެ މަގުފަ ހިނުވެ އަދިވެސް ގިނަ ދިވެހިންތަކެއް ތިބި އިރު، އެކަމާ ގުޅިގެން ގިނަ ޝަކުވާތަކެއް ދަނީ ފެންމަތިވަމުންނެވެ.
ލަންކާގައި ތިބި ދިވެހިން ރާއްޖެ ގެނައުމުގައި އިސްކަންދޭނެ މީހުންތަކެއް ސަރުކާރުން ވަނީ ކަނޑައަޅައިފަ އެވެ. އޭގެ ތެރޭގައި ހިމެނެނީ ލަންކާ އަށް ބޭސްފަރުވާ އަށް ގޮސް އަނބުރާ ރާއްޖެ ނާދެވި ތިބި މީހުންނާއި ޓޫރިސްޓުންގެ ގޮތުގައި ލަންކާ އަށް ގޮސް ނާދެވި ތިބި މީހުންގެ އިތުރުން ކިޔަވާ ދަރިވަރުންގެ ތެރެއިން ކޯސް ނިމި ރާއްޖެ އަށް އަނބުރާ ނާދެވި ތިބި މީހުންނެވެ. މީގެ އިތުރުން، ސިއްހީ ސަބަބުތަކަށްޓަކައި އަނބުރާ އަންނަން ބޭނުންވާ މީހުންނާއި ދިރިއުޅުމުގެ ހާލަތު ހުރި ގޮތުން އެނބުރި އަންނަން ބޭނުންވާ މީހުންނަށް ވެސް އިސްކަންދޭނެ އެވެ.
ފްލައިޓްގައި ޖާގަ އޮތް ވަރަކުން އިތުރު މީހުންނަށް ވެސް ޖާގަ ދޭނެ ކަމަށް ފޮރިން މިނިސްޓްރީން ވަނީ ބުނެފަ އެވެ.
ލަންކާއަކީ ގިނަ އަދަދެއްގެ ދިވެހިން އެކި ބޭނުންތަކަށް އެންމެ ގިނައިންދާ އެއް ގައުމަށް ވާއިރު، މިހާރު ވެސް ލަންކާގައި ނާދެވި ވަރަށް ގިނަ ދިވެހިން އެބަތިއްބެވެ. އެހެންވީމާ އެންމެ ފުރަތަމަ ބާއްވާ ފްލައިޓުގައި އެންމެނަށް ޖާގަ ނުދެވުނަސް ކުރިއަށް އޮތް ތަނުގައި އަދިވެސް ފްލައިޓުތައް ބާއްވަމުންދާނެ ކަމަށް ފޮރިން މިނިސްޓްރީން ބުނެފައި ވެއެވެ.