ޗައިނާ އިން އިސްނަގައިގެން 2014 ވަނަ އަހަރު އުފެއްދި އޭޝިއަން އިންފްރާސްޓްރަކްޗާ އިންވެސްޓްމެންޓް ބޭންކް (އޭއައިއައިބީ) އިން މެންބަރު ގައުމުތަކަށް އެހީވާން ފަސް ބިލިއަން ޑޮލަރުގެ އެހީގެ ޕެކޭޖެއް އިއުލާނުކޮށްފައި ވާއިރު ރާއްޖޭން ވެސް އެހީ އަށް އެދިފައިވާ ކަމަށް އެ ބޭންކުގެ ރައީސް ޖިން ލިކުއިން ވިދާޅުވެއްޖެ އެވެ.
މިކަމާ ބެހޭ ތަފްސީލެއް ޖިން ދެއްވައިފައެއް ނުވެ އެވެ. ކޮވިޑް-19ގެ ސަބަބުން ދުނިޔޭގެ އިގްތިސާދު ހުއްޓުމަކަށް އައިސް ރާއްޖެ އަށް ވެސް ބޮޑެތި ގެއްލުންތައް ވަމުން ދާތީ ސަރުކާރުން ވެސް ރާއްޖޭގެ ވިޔަފާރިތައް ހިމާޔަތްކޮށް އިގްތިސާދު ސަލާމަތްކުރުމަށް އެހީގެ ޕެކޭޖްތައް އިއުލާނުކޮށްފަ އެވެ. އަދި މިކަމުގައި މާލީ އެހީތެރިކަން ހޯދަން މާލީ އެކި އިދާރާތަކާ މަޝްވަރާކުރަމުން އަންނަ ކަމަށް ވަނީ ބުނެފަ އެވެ. އެގޮތުން އައިއެފްސީ އިން 50 މިލިއަން ޑޮލަރާއި އިންޓަނޭޝަނަލް މަނިޓަރީ ފަންޑު (އައިއެމްއެފް) އިން 30 މިލިއަން ހޯދުމުގެ މަސައްކަތް ކުރަމުން އަންނަ ކަމަށް ބުނެފައިވެ އެވެ.
ވޯލްޑް ބޭންކުން އިއްޔެ ވަނީ 266 މިލިއަން ރުފިޔާގެ އެހީގެ ޕެކޭޖެއް ވެސް ރާއްޖެ އަށް ފާސްކޮށްފަ އެވެ.
ބައެއް ނޫސްތަކުގައި ބުނެފައިވާ ގޮތުގައި ރާއްޖެ އާއި މި ސަރަހައްދުގެ އެހެން ގައުމުތަކާ އެކު ޖުމްލަ 76 މެންބަރުންގެ މައްޗަށް އެކުލެވޭ އޭއައިއައިބީގެ ރައީސް ޖިން، އައިއެމްއެފްގެ މެނޭޖިން ޑިރެކްޓަރު ކްރިސްޓަލީނާ ޖޯޖީވާ އާއި ވޯލްޑް ބޭންކުގެ ރައީސް ޑޭވިޑް މަލްޕާސްއާ އެކު ބޭއްވެވި ވާޗުއަލް ބައްދަލުވުމެއްގައި ވަނީ ގައުމުތަކަށް ފަސް ބިލިއަން ޑޮލަރު ހޭދަކުރައްވާނެ ކަމަށް ވިދާޅުވެފަ އެވެ.
"ކޮރޯނާވައިރަސް ފެތުރުން ހުއްޓުވައި ގައުމުތަކުގެ އާންމު ހާލާތަށް ވީ އެންމެން އަވަހަށް ދެވޭނެ ގޮތެއް ހޯދައިދިނުމަށް ބައިނަލްއަގުވާމީ މާލީ އިދާރާތަކުން ކޮށްދެވޭނެ ކަންކަމާ ބެހޭ ގޮތުން އަޅުގަނޑުމެން މަޝްވަރާކުރިން،" ޔޫރޯމަނީ ނޫހަށް ދެއްވި އިންޓަވިއުއެއްގައި ޖިން ވިދާޅުވެފައިވެ އެވެ.
އޭނާ ވިދާޅުވި ގޮތުގައި މިއީ މާލީ އިދާރާތަކުން ހިކުމަތްތެރިކަމާ އެކު ވިސްނައި، އާންމު އުސޫލު ދޫކޮށް ގައުމުތަކަށް އެހީވާންޖެހޭ ވަގުތެވެ. ގައުމުތަކުން އޭއައިއައިބީގެ އެހީ އަށް އެދެމުން އަންނަ ކަމަށާއި ދިވެހިރާއްޖެ ވެސް އޭގެ ތެރޭގައި ހިމެނޭ ކަމަށް އޭނާ ވިދާޅުވި އެވެ.
"އާންމު ސިއްހަތުގެ މިފަދަ ބަލިމަޑުކަމެއްގައި މާލީ އިދާރާތަކުން އެހީވާންޖެހޭނެ،" މިއީ މާލީ އިދާރާތަކުގެ ހަގީގީ ބޭނުން ހިފޭކަން ނުވަތަ ނޫންކަން އެނގޭނެ އިމްތިހާނެއްގެ ގޮތުގައި ޖިން ފާހަގަކުރެއްވި އެވެ.
މެންބަރު ގައުމުތަކަށް އެހީވާން އަދި ކަނޑައަޅާފައިވަނީ ފަސް ބިލިއަން ޑޮލަރު ކަމަށް ވިޔަސް، ގައުމުތަކުގެ އިގްތިސާދީ ބަލިކަށިކަން މިހާރު ހާމަޔަށް ފެންނަ ހުރުމުން މި އަދަދު އަދި އިތުރުކުރަން ވެސް ޖެހިދާނެ ކަމަށް ވެސް ޖިން ވިދާޅުވި އެވެ. އޭނާ ވިދާޅުވި ގޮތުގައި އެހީގެ ގޮތުގައި ކަނޑައަޅާ ފައިސާ އިތުރުކުރަން ޖެހުނަސް އެކަން ކުރުމުގެ ގާބިލްކަން އޭއައިއައިބީ އަށް ލިބިގެންވެ އެވެ.
