މާފަށް އެދޭކަށް ނުޖެހޭ، ބައްދަލުވުމަށް މައުމޫން ދެކޮޅު ހައްދަވައިފި ނަމަ އެއް ކަމެއް ސާފުވާނެ: ނިހާން
މުލިއާގޭގައި ބޭއްވި ބައްދަލުވުމަށް ފަހު ނިހާން ނޫސްވެރިންނާ ވާހަކަ ދައްކަވަނީ. --ފޮޓޯ: މުހައްމަދު ޝަރުހާން
12 އޮކްޓޯބަރ 2016 - 15:44
45 comments
ޕީޕީއެމްގެ ކައުންސިލް ބައްދަލުވުމެއް ދެން ބާއްވާނީ މިދިޔަ ޖުލައި މަހު ބޭއްވި ބައްދަލުވުމުން ނިކުމެވަޑައިގަތް މެމްބަރުން މާފަށް އެދިވަޑައިގަތުމުން ކަމަށް އެ ޕާޓީގެ ރައީސް މައުމޫން އަބްދުލް ގައްޔޫމް ވިދާޅުވެފައިވީ ނަމަވެސް މާފަށް އެދެން ޖެހޭ ވަރުގެ އެއްވެސް ކަމެއް މެމްބަރުން ކުރައްވާފައި ނުވާ ކަމަށް ޕާލަމެންޓްރީ ގްރޫޕުގެ ލީޑަރު އަހްމަދު ނިހާން މިއަދު ވިދާޅުވެއްޖެ އެވެ.
ޕީޕީއެމްގެ ޕީޖީ ގްރޫޕުގެ މެމްބަރުން، ރައީސް އަބްދުﷲ ޔާމީނާ އެކު މުލިއާގޭގައި ބޭއްވި ބައްދަލުވުމަށް ފަހު ނޫސްވެރިންނާ ބައްދަލުކުރައްވައި ނިހާން ވަނީ ނުސީދާކޮށް މައުމޫނަށް ބަހުގެ ހަމަލާތަކެއް އަމާޒު ކުރައްވައިފަ އެވެ. ޕީޕީއެމަކީ ހަމައެކަނި މައުމޫންގެ އެއްޗެއް ނޫން ކަމަށާއި ޕާޓީގެ މައްސަލަތައް ހައްލުކުރަން މައުމޫން ދޫދެއްވަން ޖެހިވަޑައިގަންނަވާ ކަމަށް ދޭހަވާ ގޮތަށް އޭނާ ވާހަކަ ދެއްކެވި އެވެ.
ސިޔާސީ ޕާޓީތަކާއި ސަރުކާރާ އެކު ބާއްވާ މަޝްވަރާތަކުގައި ޕީޕީއެމް ތަމްސީލްކުރައްވާނީ ދިއްގަރު ދާއިރާގެ މެމްބަރު ފާރިސް ކަމަށް ނިންމަވައި މައުމޫން ނަން ފޮނުއްވީ، ނިހާން ވިދާޅުވި ގޮތުގައި، ޕާޓީގެ ގަވާއިދުތަކާއި އުސޫލްތަކާ ހިލާފަށެވެ.
އެންމެ ފަހުން ބޭއްވި ކައުންސިލް ބައްދަލުވުން ވެސް ކުރިއަށް ނުގެންދެވުނީ ފާރިސް ބައިވެރިވެވަޑައިގަތުމުން ކަމަށް އޭނާ ވިދާޅުވި އެވެ.
ޕީޕީއެމްގެ އިސްލާހީ އެޖެންޑާ އިއުލާންކުރައްވަން ބޭއްވި ޕްރެސް ކޮންފަރެންސްގައި މައުމޫން ވާހަކަފުޅު ދައްކަވަނީ.-- ފޮޓޯ: މުހަންމަދު ޝަރުހާން/ މިހާރު
ނިހާން ވިދާޅުވީ ކައުންސިލް ބައްދަލުވުމުގައި، އެ ޕާޓީން ވަކިކޮށްފައިވާ ފާރިސް އާއި ޖެންޑާ މިނިސްޓްރީގެ ކުރީގެ ކޯޑިނޭޓަރު އައިމިނަތު ނާދިރާ ތިއްބެވި ކަން މައްސަލައެއްގެ ގޮތުގައި ނެންގެވީ އޭނާ އެވެ. އެ މައްސަލަ ނެންގެވީ، މައުމޫން ވިދާޅުވާން ބޭނުންފުޅުވާ އެއްޗެއް ވިދާޅުވުމުގެ ފުރުސަތު ދެއްވުމަށް ފަހު ވަރަށް އިހްތިރާމާ އެކު ކަމަށް ވެސް ނިހާން ވިދާޅުވި އެވެ.
"[ފާރިސް އާއި ނާދިރާ ބައްދަލުވުމުގައި ތިއްބެވި] އެ މައްސަލާގައި އަޅުގަނޑުމެން ނިކުމެގެން ދިޔައީ މައުމޫންގެ އަރިހުން އިޒުނަ ވެސް ހޯދައިގެން. އެ މަނިކުފާނަށް އިހްތިރާމް ކުރުމުގެ ގޮތުން ނިކުތް ނުކުތުމަކަށް މާފަށް އެދެން ޖެހޭނެ ސަބަބެއް އޮތްހެނެއް އަޅުގަނޑަކަށް ހިއެއް ނުވޭ،" ނިހާން ވިދާޅުވި އެވެ.
ނިހާން ވިދާޅުވީ ޕީޕީއެމް ތެރޭގައި ފެކްޝަންތަކެއް އޮތް ކަމަކަށް ވާހަކަ ދެއްކިއަސް ޕާލަމެންޓްރީ ގްރޫޕުން އެކަން ގަބޫލުނުކުރާ ކަމަށެވެ. އެކަމަކު ޕާޓީ ތެރޭގައި ހިޔާލު ތަފާތުވުންތަކެއް އެބަހުރި ކަމަށާއި އެ ކަންކަމަށް ހައްލު ހޯދަން ޖެހޭ ކަމަށް ނިހާން ވިދާޅުވި އެވެ.
ޕީޕީއެމް އެތެރޭގެ މައްސަލަތައް ހައްލުކުރަން ޕާލަމެންޓްރީ ގްރޫޕުން އިސް ނަގާފައިވާއިރު، ރައީސް އަބްދުﷲ ޔާމީނާއި މައުމޫން ބައްދަލުކުރައްވަން ޖެހޭ ކަމަށް ނިހާން ވިދާޅުވި އެވެ. މައުމޫން އެކަމަށް، ދެކޮޅު ހައްދަވައިފި ނަމަ، ޕާޓީގެ ބައެއް ކަންކަން އިސްލާހު ނުކުރައްވައި ދޫކޮށްލައްވަން މައުމޫން ބޭނުންފުޅުވާ ކަން ޕާޓީގެ މެމްބަރުންނާއި ސަޕޯޓަރުންނަށް ސާފުވެގެންދާނެ ކަމަށް ނިހާން ވިދާޅުވި އެވެ.
"ރައީސް މައުމޫނަކީ މި ގައުމުގެ 30، އަހަރުގެ ބާނީ، އެމަނިކުފާނަށް އެނގިވަޑައިގަންނަވާނެ މިފަދަ ކަންކަމުގައި ކުރިއަށް ވަޑައިގަންނަވަންވީ ގޮތް،" ނިހާން ވިދާޅުވި އެވެ.
ޕީޕީއެމްގެ ތެރޭގައި އުފެދިފައިވާ މައްސަލާގައި ވެސް، ނިހާން ވިދާޅުވި ގޮތުގައި، ހައްލު ނުލިބެންވީ ސަބަބެއް ނެތެވެ. މައްސަލަތަކާ އިށީނދެ ވާހަކަ ދެއްކުމުގެ ފުރުސަތު އޮތް އިރު އެގޮތް ގަބޫލުނުކުރުން އެއީ ކޮންމެވެސް އެއް ބަޔަކު ޑިމޮކްރަސީގެ ސިފަތަކާ ދުރު ކަން ވެސް އެނގޭނެ ކަމެއް ކަމަށް ނިހާން ވިދާޅުވި އެވެ.
އޭނާ ވިދާޅުވީ ޕާޓީ ތެރޭގައި އުފެދިފައިވާ މައްސަލަތައް ހައްލުކުރަން ރައީސް ޔާމީން ހުންނެވީ މައުމޫނާ ބައްދަލުކުރައްވަން ތައްޔާރަށް ކަމަށެވެ. އަދި ޕީޖީ ގުރޫޕުގެ ހުށަހެޅުން ރައީސް ޔާމީ ވަނީ ގަބޫލުފުޅު ކުރައްވާފައިވާ ކަމަށް ނިހާން ވިދާޅުވި އެވެ. ހަމަ އެގޮތަށް މައުމޫން ވެސް މި މަޝްވަރާއަށް އެއްބާރުލުން ދެއްވާނެ ކަމަށް އުންމީދު ކުރައްވާ ކަމަށް ނިހާން ވިދާޅުވި އެވެ.
ފާރިސް، ޕީޕީއެމް ތަމްސީލްކުރުމާ ދެކޮޅު!
ރައީސް އަބްދުﷲ ޔާމީނާ އެކު ބޭއްވި ބައްދަލުވުމުގައި މެމްބަރުން ނެންގެވި އެއް މައްސަލައަކީ ޕީޕީއެމް ތަމްސީލްކުރާ މުހިއްމު ބައްދަލުވުމެއްގައި، އެ ޕާޓީން ވަކިކޮށްފައިވާ ދިއްގަރު ދާއިރާގެ މެމްބަރު އަހްމަދު ފާރިސް މައުމޫން ބައިވެރިވެވަޑައިގަތުން ކަމަށް ނިހާން ވިދާޅުވި އެވެ. ސަރުކާރާއި ސިޔާސީ ޕާޓީތަކާ އެކު އޮންނަ މަޝްވަރާ އަށް އޭނާގެ ނަން، މައުމޫން ހުށަހަޅުއްވާފައިވީ ނަމަވެސް ޕީޖީ ގްރޫޕް މެމްބަރުން އެކަމަށް ތާއީދު ނުކުރައްވާ ކަމަށް ނިހާން ވިދާޅުވި އެެވެ.
ދިއްގަރު ދާއިރާގެ ޕީޕީއެމްގެ މެމްބަރު އަހުމަދު ފާރިސް މައުމޫން ރައްޔިތުންގެ މަޖިލިހުގެ ޖަލްސާއެއްގައި ވާހަކަ ދައްކަވަނީ. ފާރިސް އަކީ އެ ޕާޓީގެ މެމްބަރެއް ނޫން ކަމަށް ނިހާން ތަކުރާރުކޮށް ވިދާޅުވި.---ފޮޓޯ: މަޖިލިސް
މަޝްވަރާ ކުރިއަށް ގެންދަނީ އދ.ގެ މަންދޫބާ އެކު ކަން ފާހަގަ ކުރައްވަމުން ނިހާން ވިދާޅުވީ އެފަދަ މުހިއްމު ބައްދަލުވުމެއްގައި "އާނބަސް ނުވަތަ ނޫން ބަސް" ވިދާޅުވެވޭނީ ޕާޓީގެ ކައުންސިލުން އެ ބާރު ދީފައި އޮތް ބޭފުޅަކަށް ކަމަށެވެ. ފާރިސް އަށް އެ ބާރު ކައުންސިލުން ދީފައި ނުވާއިރު، އޭނާ އަކީ މިހާރު ޕީޕީއެމް މެމްބަރެއް ނޫން ކަމަށް ވެސް ތަކުރާރުކޮށް ނިހާން ވިދާޅުވި އެވެ.
"ޕާޓީގެ ރައީސްގެ އެއްޗެއް ނޫން ޕާޓީއަކީ، ޕާޓީގެ މުސްތަޝާރުގެ އެއްޗެއް ނޫން ޕާޓީއަކީ. ޕާޓީ ކައުންސިލްގެ ވަކިވަކި މެމްބަރުންގެ އެއްޗެއް ނޫން ޕާޓީއަކީ. ...ކަންކަން ނިންމަން ޖެހޭނީ ޕާޓީގެ ކައުންސިލުން،" ނިހާން ވިދާޅުވި އެވެ.
ޑިމޮކްރެޓިކް ހަމަތަކުން ބަލާއިރު ވެސް، ނިހާން ވިދާޅުވި ގޮތުގައި، މަޝްވަރާގެ މަންދޫބަކީ ޕާޓީގެ ކައުންސިލުން ރުހުން ދީފައިވާ މީހަކަށް ވާން ޖެހެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޒާދީ
16 October 2016
ޕީޕީއެމް ގެ ޔާމީން ފެކަޝަނުން ނުޖެހޭ ވާހަކަ ދައްކާކަށް! އެމީހުންނަށް ކޯޓްތައް ފުދޭ! އެމީހިން އެދޭގޮތަށް ޙުކުމްތައް ނެރެދޭނެ ކަމުގެޔަޤީންކަން އޮވޭ! ދެން ކީއްކުރަން ވާހަކަ ދައްކަން ވަގުތު ބޭކާރު ކުރަންވީ!
ޕޕ
14 October 2016
ކައުންސިލް ބޭނުން ކޮއްގެން ޕާރޓީ ކޮންތްރޯލް ކުރާކައް ފުރުސަތެއް ޔާމިން އަކައް އާއްމު މެންބަރުން ނެއް ނުދޭނެ. ޢަބުދުއްރަހީމް އަކީ ހައިސިއްޔަތެއް އޮތް މީހެއްނޫން. އާއްމު މެންބަރުން މާކުރިން ނޫނެކޭ ބުނެފަ ހުރި މީހެއް ނިހާން ދެން ތީ ކޮން ފެންވަރެއް ހުރި މީހެއް މައުމޫން ގެ ވާހަކަ ދައްކަން. 2018 ސޮރީ.
ޖަމާލު
13 October 2016
މައުމޫނު ބުންޏަސް ދެނެއް ޔާމީނަކަށް ވޯޓެއް ނުދޭނަން. މައުމޫނަށް ހެދި ގޮތުން
އުމަރު
13 October 2016
އެންމެ ރަނގަޅުވާނީ މައާފަތްއެދި މައުމޫނުގެ ފެކްޝަނާގުޅި ޤައުމާއިގެން ކުރިއަށް ވަޑައިގަތިއްޔާ، ހަމަ ގައިމުވެސް ތިޔައިނދެވެނީ ފެތެމުންދާ އޮޑިއެއްގެ ދިރުބާގައި، މާލަސްނުވަނީ މައުމޫނުގެ އަތުގައި ހިއްޕަވާށެވެ.
ރރރ
13 October 2016
ޢެމްޑީޕީން ދެން ކެންޑިޑޭޓަކައް ނެރޭނީ ފާރިޝް މައުމޫން.
މޮޅޭބުނާނަން
13 October 2016
ނިހާނު މަޖިލިސްގެގޮނޑިއެއް ރައީސްމައުމޫނުގެ ސަޕޯޓާއިނުލައި ނިކަންކާމިޔާބުކޮށްބަލަ؟
އަދުނޫނު
13 October 2016
"ލާހިކެއްނޫން"! ތަންކޮޅެއްކުރިންވެސް މި ބަސް ސިޔާސީ މައިދާނުން އިވުނު ހަދާނެއްވޭ!
މުޙައްމަދު
13 October 2016
ނިހާނުއާއި ޔާމީނަކަށް ނޫން ސަޕޯޓްކުރަނީ މިގައުމުގެ ގިނަމީހުން އަދިވެސް ސަޕޯޓްކުރަނީ މައުމޫނަށް ނިހާނަކީ ކާކު
ޢަލިދީދީ
13 October 2016
ސަރުކާރު ހިންގާ ގޮތާމެދު މައުމޫނު ބެހިވަޑައެއް ނުގަންނަވާ. އެކަމަކު ޕާޓީގެ ކަންކަން ޕާޓީ އޮފީހަށް ނޭނގި އެތައްކަމެއް ކުރަމުންދާތީ އެކަމާ މައުމޫނު ބެހިވަޑައިގަންނަވަނީ. ޔާމީންގެ 2018 ގެ ކެމްޕޭން ފަށައިގެން ބޮޑެތި މަހާސިންތާތައް ކުރިޔަށް ގެންދަނީ ޕާޓީގެ އެއްވެސް ގުނަވަނަކުން ފާސްކޮށްގެނެއްނޫން. ތަފާތު ކޮމެޓީތައް ހަދާފަވަނީވެސް ފާސްކޮށްގެނެއްނޫން. މިއަދު ސުލްޙައިގެ ވާހަކަދައްކަން ޕާޓީން ބައިވެރިވާނެ ދެމަންދޫބަކު ކަނޑައެޅުމުންތޯ ފާސްކުރަން ޖެހޭކަން އެނގުނީ. ޕާޓީއަކީ ނިހާނޫ ކަލޭގެ އަމިއްލަ އެއްޗެއްނޫން. ކަލެޔަށް ވާއެއްޗެއް މަށަށްވެސް ވާނެ.
އިބްރާހީމް
13 October 2016
ޔާމީން މައުމޫނާމެދު ކަންކަން ކުރަމުންދާ ގޮތުން، ޔާމީންގެ ވެރިކަން ދަމަހައްޓަން މައުމޫނު އެއްވެސް މަސައްކަތެއް ކުރާކަށް މިހާރަކު ނުޖެހޭނެ. އަދި 2018 ގައިވެސް ޔާމީނަށް ތާއީދު ކުރާކަށް މައުމޫނަކަށް ނުޖެހޭނެ. އިތުބާރު ވަނީ ގެއްލިފަ. މައުމޫނު ވިދާޅުވެގެން އަހަރުމެންވެސް ޔާމީނަށް ވޯޓުދިނީ. ދެން ސޮރީ.
ދނ
13 October 2016
އެމަނިކުފާނު ޕާޓީއެއް ހައްދަވާއިރަށް ބަޔަކު ނިކުމެ ޕާޓީގެ ކައުންސިލް ޙިޞޯރު ކޮށްލައެވެ. އެހިސާބުން އެއުފެދުނީ ފެކްޝަނެވެ. ޑީއާރުޕީގެ ޒަމާނުގައި ފެނުނީ އެމަންޒަރެވެ. އެންމެފަހުން މިއަދު އެ ޕާޓީކޮބައިތޯއެވެ؟ އެއިރުވެސް މަމެން ބުނީމުއެވެ. ޑީއާރުޕީއަކީ މައުމޫނެވެ. މައުމޫނަކީ ޑީއާރުޕީއެވެ. މިޤައުމުގައިތިބީ ސިޔާސީ އެންމެ ދެ ލީޑަރުންނެވެ. އެއީ މައުމޫނާއި ނަޝީދުއެވެ. މިއަދު ޓޫޕީއެމްގެ ކައުންސިލް އެއޮތީ ޙިޞޯރު ވެފައެވެ. ހަމައެއާއިއެކު ޕާޓީގައި ވަނީ ދެ ފެކްޝަން އުފެދިފައެވެ. ދެން ފެނިގެންދާނީ މައުމޫނު ޕާޓީއިން ބޭރުކުރެވިގެންދާ މަންޒަރެވެ. ގަޓުހުރުމާއި ރައްޔިތުން ބިރުގެންނެވުމާއި ދާދާގިރީއާއި ވޯޓުން ވައްކަންކުރުމަކީވެސް އޮންނަކަމެކެވެ. މިއިން ކަމަކުން ރައްޔިތުންގެ ލޯއްބެއް ނުލިބޭނެއެވެ. ރައްޔިތުންގެ ލޯބިނުލިބި މިޒަމާނުގައި ވެރިކަންކުރެވޭނީ ދުވަސްކޮޅަކުއެވެ. މިއީކީ ޑާކްއޭޖެއްނޫނެވެ.