އަންނަ އޮކްޓޯބަރު/ނޮވެމްބަރު މަހު ބާއްވަން ހަމަޖައްސާފައިވާ މިއަހަރުގެ އޯ ލެވެލް އިމްތިހާނު މުއްދަތެއް ނެތް ގޮތަށް ފަސްކޮށްފި އެވެ.
އެޑިއުކޭޝަން މިނިސްޓްރީން މިރޭ ނެރުނު ސާކިއުލާއެއްގައި ބުނީ، ގްރޭޑު 10 ގައި ކިޔަވާ ދަރިވަރުންނަށް، ކޮވިޑް-19 ގެ ސަބަބުން ކުރިމަތިވެފައިވާ ހާލަތުގައި ސިލަބަސް ނިންމައި އިމްތިހާނަށް ތައްޔާރުވާން އެކަށީގެންވާ ވަގުތު ލިބޭނެކަމަށް ނުފެންނަ ކަމަށެވެ. އެހެންވެ ޖީސީއީ އޯލެވެލް، އައިޖީސީއެސްއީ އަދި އެސްއެސްސީ އިމްތިހާނު އެ ދުވަސްވަރު ނުބާއްވަން ހަމަޖެއްސީ ކަމަށް ބުންޏެވެ. އޭގެ އިތުރުން ބީޓެކް ކިޔަވާ ދަރިވަރުންގެ އެސައިމަންޓް ސުންގަޑިތައް ވެސް އަލުން މުރާޖައާކުރާނެ ކަމަށް ބުންޏެވެ.
"މި ނިންމުމާ ގުޅިގެން ދެން އިމްތިހާނު ބާއްވާނެ ދުވަސްވަރެއް ކަނޑައެޅުމުގެ މަސައްކަތް ކުރަމުންދާ ވާހަކަ ވެސް ދެންނެވީމެވެ. މި ބަދަލު ގެނައުމުގައި އެންމެ ބޮޑު އިސްކަމެއް ދޭނީ ދަރިވަރުންނަށް ލިބޭ ގެއްލުން ވީހާ ވެސް ކުޑަ ކުރުމަށެވެ،" އެޑިއުކޭޝަން މިނިސްޓަރު ޑރ. އައިޝަތު އަލީ ސޮއިކުރައްވައި، ރާއްޖޭގެ ހުރިހާ ސްކޫލަކަށް ފޮނުއްވި ސާކިއުލާގައިވެ އެވެ.
އަދި ފަރުވާއެއް ހޯދިފައިނުވާ ބަލިން ރައްކާތެރިވުމަށް އަޅާ ފިޔަވަޅެއްގެ ގޮތުން ސްކޫލުތަކުގައި ކިޔެވުން ބަންދުކުރިތާ މަހަކަށް ވުރެ ގިނަ ދުވަސްވެއްޖެ އެވެ. އޭގެ ފަހުން "ޓެލިކިލާސް" މެދުވެރިކޮށް ވެސް ސަރުކާރުން ކިޔަވައިދޭން ފެށި އެވެ. ނަމަވެސް ކުޑަ ދުވަސްކޮޅަކަށްފަހު ޓެލިކިލާސް އިން ކިޔަވައިދިނުން ވެސް ހުއްޓާލީ އެވެ.
މެއި އަދި ޖޫން މަހު ބާއްވަން ހަމަޖައްސާފައިވާ އޭ ލެވެލް އިމްތިހާނު ވެސް ވަނީ މީގެ ކުރިން، އޮކްޓޯބަރު/ނޮވެމްބަރަށް ފަސްކޮށްފަ އެވެ. ނަމަވެސް އެ ދަރިވަރުންގެ އިމްތިހާނު ބާއްވަން ހަމަޖައްސާފައިވާ ތާރީހަށް އިތުރު ބަދަލެއް ގެންނަން ހަމަޖައްސާފައިނުވާ ކަމަށް ބުންޏެވެ.
މުޅި ދުނިޔޭގައި ފެތުރިފައިވާ ކޮވިޑް-19 އާ ހެދި އެހެން ބައެއް ގައުމުތަކުގައި ވެސް ބައިނަލްއަގުވާމީ ބައެއް އިމްތިހާނުތައް ވަނީ ފަސްކޮށްފަ އެވެ. ރާއްޖޭގައި ވެސް މި ބަލި 277 މީހަކަށް ވަނީ ޖެހިފަ އެވެ. ބަލި ކޮންޓްރޯލްކުރަން މާލެ ސަރަހައްދާއި ބައެއް ރަށްރަށް ވަނީ ލޮކްޑައުންކޮށްފަ އެވެ.