ރާއްޖެއިން މިއަދު ކޮވިޑް-19 އަށް ޕޮޒިޓިވްވި 119 މީހުންގެ ތެރެއިން ފުރަތަމަ ޕޮޒިޓިވި 95 ބިދޭސީންނަކީ އެއް އެކޮމެޑޭޝަންއެއްގައި އުޅެމުން ދިޔަ ބައެއް ކަމަށް، ނެޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) އިން މިރޭ ބުނެފި އެވެ.
އެ 95 ބިދޭސީންގެ ތެރޭގައި ހިމެނެނީ ބަންގްލަދޭޝްގެ 61 މީހަކާއި އިންޑިއާގެ 32 މީހެއްގެ އިތުރުން ނޭޕާލްގެ ދެ މީހެކެވެ. މިއީ ނޭޕާލް މީހެއް އެ ބައްޔަށް ރާއްޖެއިން ޕޮޒިޓިވްވި ފުރަތަމަ ފަހަރެވެ.
މިރޭގެ ނޫސްވެރިންގެ ބައްދަލުވުމުގައި އެންއީއޯސީގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ އެ 95 ބިދޭސީންނަކީ މޮނީޓާ ކުރަމުންދިޔަ އެކޮމެޑޭޝަންއެއްގައި ދިރިއުޅުނު ބައެއް ކަމަށެވެ.
"އެއީ އައިސޮލޭޝަންގައި އޮތްތަނެއް. ކުރިން ވެސް އަޅުގަނޑުމެންނަށް ފާހަގަކުރެވިގެން އެ ތަނުން ހެދި ޓެސްޓްތަކުން 95 ކޭސްއެއް ޕޮޒިޓިވްވީ،" މަބްރޫކް ވިދާޅުވި އެވެ.
އޭނާ އިތުރަށް ވިދާޅުވީ ބިދޭސީން ދިރިއުޅޭ 23 ތަނެއް މިހާރު ވެސް ކަރަންޓީންކޮށްފައިވާ ކަމަށެވެ. އެތަންތަނުގައި 1،085 ބިދޭސީން ދިރިއުޅޭ ކަމަށް ވެސް މަބްރޫކް ވިދާޅުވި އެވެ. އަދި އެ ތަންތަނުގައި ދިރިއުޅޭ ބިދޭސީންގެ ކަންކަން ރެޑްކްރެސެންޓުން ބަލަހައްޓަމުން އަންނަ ކަމަށް ވެސް ވިދާޅުވި އެވެ.
ބިދޭސީނަކީ ކުދިކުދި ތަންތަންކޮޅުތަކުގައިި ތޮއްޖެހިގެން ދިރިއުޅޭ ބަޔަކަށްވާއިރު ކޮވިޑް-19 އެތަންތަނުގައި ފެތުރުމުގެ ބިރު އޮންނާތީ ކުރިން ވެސް ވަނީ ފިޔަވަޅުތަކެއް އަޅައިފަ އެވެ. އެގޮތުން ތޮއްޖެހިގެން އުޅޭ ބައެއް ބިދޭސީން އެހެން އެކޮމެޑޭޝަންތަކަށް ވަނީ ބަދަލުކޮށްފަ އެވެ.
ބިދޭސީން އެހެން ތަންތަނަށް ބަދަލުކުރުމާ ގުޅޭގޮތުން މަބުރޫކް މިރޭ ވިދާޅުވީ ކުރިއަށް އޮތް ދެ ތިން ދުވަހެއްގެ ތެރޭގައި ގިނަ މަސައްކަތްތަކެއް އެކަމަށް ކުރާނެ ކަމަށެވެ. އަދި ފަހުން އެކަމުގެ ތަފްސީލް ހާމަކުރައްވާނެ ކަމަށް ވެސް ވިދާޅުވި އެވެ.
އެޗްޕީއޭގެ އެޕިޑެމިއޮލޮޖިސްޓް ޑރ. އިބްރާހިމް އަފްޒަލް ވިދާޅުވީ ބިދޭސީން އުޅޭ އެކޮމެޑޭޝަންތަކަށް ޓާގެޓްކޮށް އަންނަނީ އެތަންތަން ބަލަހައްޓަމުން ކަމަށެވެ. އަދި ރެންޑަމްކޮށް ކޮވިޑް-19 އަށް ސާމްޕަލް ނަގާއިރު ވެސް ގިނައިން ބިދޭސީން ނުކުމެ އުޅޭ ތަންތަނަށް އިސްކަން ދޭ ކަމަށް ވިދާޅުވި އެވެ.
ތޮއްޖެހިގެން ބިދޭސީ ގިނަ ބަޔަކު ދިރިއުޅޭ ތަންތަން މި ދުވަސްވަރު ފުލުހުން އަންނަނީ ބަލަހައްޓަމުންނެވެ. އެ ތަންތަަނަށް މީހުން ވަދެ ނުކުމެ އުޅުން ފުލުހުން ވަނީ ވަރަށް ބޮޑަށް ހިފަހައްޓައިފަ އެވެ. ޒަރޫރީ ބޭނުމެއްގައި ނޫން ގޮތަކަށް ބޭރަކަށް އެ މީހުންނަކަށް ނުދެވޭނެ އެވެ. އޭގެ ބޭނުމަކީ ކޮވިޑް-19 ފެތުރުން ކޮންޓްރޯލް ކުރުމެވެ.
ޖުމުލަ 119 މީހުން މިއަދު ކޮވިޑް-19 އަށް ޕޮޒިޓިވް ވެފައިވާއިރު މިއީ އެއް ދުވަސްތެރޭ އެންމެ ގިނަ ބަޔަކު އެ ބައްޔަށް ރާއްޖެ އިން ޕޮޒިޓިވްވި ދުވަހެވެ.
