އައިޖީއެމްއެޗްގައި އަލަށް އުފަންވާ ކުދިން ފުރަތަމަ ބައިތިއްބާ ނިއޯ ނޭޓަލް އިންޓެންސިވް ކެއާ ޔުނިޓް (އެންއައިސީޔޫ) ގައި މަސައްކަތް ކުރާ ނަރުހަކުން ކޮވިޑް-19 އަށް ޕޮޒިޓިވްވެފައިވާތީ އެތަނުގައި މި ވަގުތު ތިބި ތުއްތު ކުދިން ޓެސްޓްކުރަން ފަށައިފި އެވެ.
އައިޖީއެމްއެޗްގެ އެންއައިސީޔޫގައި ތުއްތުކުއްޖަކު ބާއްވައިގެން ތިބި އާއިލާއަކުން "މިހާރު"އަށް ބުނި ގޮތުގައި އެންއައިސީޔޫ އިން މިއަދު ދޫކޮށްލަން ތިބި ކުދިން ވެސް ދޫނުކުރީ ޓެސްޓް ކުރަން ޖެހޭތީ އެވެ. ނަރުސް ޕޮޒިޓިވްވުުމުން ތުއްތުކުދިން ޑައިރެކްޓް ކޮންޓެކްޓްސް އަށް ވެފައި ވާތީ މައިންބަފައިންނަށް ވެސް މިހާރު ކުދިންގެ ގާތަށް ނުވަދެވޭ ކަމަށް މައުލޫމާތު ދިން އާއިލާ އިން ބުންޏެވެ.
މިކަމާ ބެހޭ ގޮތުން އައިޖީއެމްއެޗްގެ ބަހެއް އަދި ނެޝަނަލް އިމަޖެންސީ އޮޕަރޭޝަން ސެންޓަރުގެ ބަހެއް ވެސް ފޯނަށް ޖަވާބު ނުދޭތީ ނުލިބެ އެވެ.
މިހާރު ހަމަޖައްސާފައިވާ އުސޫލަކީ އައިޖީއެމްއެޗްގައި އެޑްމިޓްކޮށްފައިވާ އެއްވެސް މީހަކު ކޮވިޑަށް ޕޮޒިޓިވް ވެއްޖެ ނަމަ އެމީހަކު ޓްރީޓޮޕް ހޮސްޕިޓަލަށް ބަދަލުކުރުމެވެ. އެގޮތުން އެ ހޮސްޕިޓަލްގައި އެޑްމިޓްކޮށްފައި އޮތް މާބަނޑު އަންހެނަކު ވެސް ކޮވިޑަށް ޕޮޒިޓިވް ވުމުން ދާދި ފަަހުން ވަނީ ޓްރީޓޮޕަށް ބަދަލު ކޮށްފަ އެވެ.
ރާއްޖެއިން މިހައިތަނަށް 766 މީހަކު އެ ބައްޔަށް ޕޮޒިޓިވްވި އިރު މިހާތަނަށް ޕޮޒިޓިވް އިން އެންމެ ހަގު ކުއްޖާގެ އުމުރަކީ ހަތްމަހެވެ.
