މެމްބަރު ޔާމީނާއި ލަތީފްގެ ނިންމެވުން ބަދަލުކުރެއްވީތަ؟

ޕީޕީއެމްގެ ރައީސް މައުމޫން އަބްދުލްގައްޔޫމްގެ ފަޅިއަށް އެރުއްވުމަށް ދިއްދޫ ދާއިރާގެ މެމްބަރު އަބްދުއްލަތީފު މުހަންމަދު އަލުން ރައީސް އަބްދުﷲ ޔާމީންގެ ފަޅިޔަށް ވަޑައިގެންފި ކަމަށް ވިދާޅުވެ ބައެއް ބޭފުޅުން ޓްވީޓްކުރައްވައިފި އެވެ.

އޭގެ އިތުރުން ވެލިދޫ ދާއިރާގެ މެމްބަރު މެމްބަރު އަބްދުﷲ ޔާމީން ވެސް އަލުން ރައީސް ޔާމީންގެ ފެކްޝަނާ ގުޅިވަޑައިގެންނެވި ކަމަށް، އޭނާއާ ހަވާލާދީ، ބައެއް މީޑިއާތަކުން ވަނީ ހަބަރު ފަތުރައިފަ އެވެ.

ނަމަވެސް ޕީޕީއެމްގެ ޕާލިމެންޓަރީ ގްރޫޕްގެ ލީޑަރު އަހުމަދު ނިހާނާއި އަބްދުއްރަހީމް އަބްދުﷲގެ ޓްވީޓްތަކާ މެދު ލަތީފުގެ ބަހެއް ނުލިބެ އެވެ. އަދި ޔާމީނާ ގުޅޭ ގޮތެއް ވެސް ނުވި އެވެ. އެހެންކަމުން އެއީ ތެދެއް ކަމެއް ނުވަތަ ދޮގެއް ކަމެއް އަދި ކަށަވަރެއް ނުވެ އެވެ.

ނިހާނާއި އަބްދުއްރަހީމް ރޭ ކުރެއްވި ޓްވީޓްގައި ވިދާޅުވީ ލަތީފް ހުންނެވީ ރައީސް ޔާމީނާ އެކު ކަމަށެވެ. އަދި އަބްދުއްރަހީމާއި ޓޫރިޒަމް މިނިސްޓަރު މޫސާ ޒަމީރާ އެކު ލަތީފު އިންނެވި ފޮޓޯއެއް ވެސް ޓުވީޓު ކުރެއްވި އެވެ. ނަމަވެސް އެއީ ކޮން އިރަކު ނެގި ފޮޓޯއެއް ކަމެއް އެނގިފައެއް ނުވެ އެވެ.

ލަތީފް ވަނީ އިއްޔެ މައުމޫން ފަޅީގެ އިތުރު މެމްބަރުންނާ އެކު ޕްރެސް ކޮންފަރެންސެއްގައި ބައިވެރިވެވަޑައިގެންފަ އެވެ. އޭނާ އެ ބައްދަލުވުމުގައި ވިދާޅުވީ މައުމޫންގެ ވެރިކަމުގައި ގިނަ ތަރައްގީތަކެއް ގެންނެވި ކަމަށެވެ.

މައުމޫން ފަޅިން ބޭއްވި ކައުންސިލް ބައްދަލުވުމުގައި މީގެ ކުރިން ޔާމީން ބައިވެރިވެވަޑައިގަތެވެ. އެކަމަކު އިއްޔެގެ ޕްރެސް ކޮންފަރެންސްގައި އޭނާއެއް ނެތެވެ.

މައުމޫން ފެކްޝަނުން ބޭއްވި ނޫސްވެރިންގެ ބައްދަލުވުމުގައި ބައިވެރިވެވަޑައިގަތުމާ ގުޅިގެން ޕީޕީއެމް ވައިބާ ގްރޫޕުން ކަތީފު ބޭރު ވެސް ކުރި އެވެ. އެކަމަކު ފަހުން އޭނާ އެ ގްރޫޕަށް ވެއްދި ކަމެއް ނުވަތަ ނޫން ކަމެއް ނޭނގެ އެވެ.

ނިހާން ކުރެއްވި އެހެން ޓުވީޓެއްގައި ވިދާޅުވީ ޕީޕީއެމް ޕީޖީ ގްރޫޕްގެ މަދު މެމްބަރަކު ފިޔަވައި ހުރިހާ މެމްބަރުން ތިއްބެވީ ރައީސް ޔާމީނާ އެކު ކަމަށެވެ.

ރައީސް އަބްދުﷲ ޔާމީނާއި އެ މަނިކުފާނުގެ ސަރުކާރަށް ކުރެއްވި ތާއީދު މައުމޫން ވަނީ ރޭ އަނބުރާ ގެންދަވައިފަ އެވެ.

މައުމޫންގެ އެ ނިންމެވުމާ ގުޅިގެން، ރައީސް ޔާމީނަށް ތާއީދުކުރައްވާ ބައެއް މެމްބަރުން ވަނީ ރައީސްގެ ދިފާއުގައި ތިއްބެވިކަން ހާމަކުރައްވައިފަ އެވެ. އަދި ރައީސް ޔާމީނަކީ ގިނިކަންޏާ މަސައްކަތް ކުރައްވައިގެން ގައުމަށް ތަރައްގީ ގެންނަވާނެ ރައީސެއް ކަމަށް ވެސް އެ މެމްބަރުން ވިދާޅުވި އެވެ.

އަބްދުއްރަހީމް ވިދާޅުވި ގޮތުގައި ގައުމުގެ އެތެރެ އާއި ބޭރުން ކުރިމަތިކުރާ ހުރަސްތައް ގިރާކުރައްވާ ގައުމު އަމާން ބަނދަރަކަށް ގެންދިއުމުގެ ހުނަރާއި ގާބިލްކަން ރައީސް ޔާމީންގައި އެބަ ހުއްޓެވެ.

"ވަކި ބޭފުޅަކު ތާއީދު އަނބުރާ ގެންދެވުމަކުން ރައީސް ޔާމީން އިސްތިއުފާ ދެއްވާފައި ވަޑައެއް ނުގަންނަވާނެ. އެއަށް ވުރެ (ރައީސް ޔާމީންގެ) އަޒުމް ވަރުގަދަ ވާނެ،" އަބްދުއްރަހީމް ވިދާޅުވި އެވެ.

ނިލަންދޫ ދާއިރާގެ ޕީޕީއެމް މެމްބަރު އަދި ރައީސް ޔާމީން ފެކްޝަންގެ ސެކްރެޓަރީ ޖެނެރަލް އަބްދުﷲ ހަލީލް ކުރެއްވި ޓުވީޓެއްގައި ވިދާޅުވީ އެއްވެސް ގައުމެއްގައި ދެ ވަލީއުލް އަމުރެއް ނުހުންނަވާނެ ކަމަށެވެ.