"ރޫޓް" ފިހާރަ އިން ބޭންކް އޮފް ސިލޯން (ބީއޯސީ) އަށް ޖަމާކުރަން އިއްޔެ ގެންދިޔަ ގިނަ އަދަދެއްގެ ފައިސާ ފޭރެން މަސައްކަތް ކުރި މީހުން އަދިވެސް ހައްޔަރު ނުކުރެވޭ ކަމަށް ފުލުހުން މިއަދު ބުނެފި އެވެ.
އިއްޔެ ހެނދުނު ޖަމާކުރަން ގެނދިޔަ ފައިސާ ފޭރެން އުޅުނު ނަމަވެސް ބީއޯސީގެ ސެކިއުރިޓީ ގާޑާއި ރޫޓްގެ މުވައްޒަފުންގެ މަސައްކަތުން އެކަން ކާމިޔާބެއް ނުވި އެވެ. ބީއޯސީގެ ސެކިއުރިޓީ ބަލަހައްޓަނީ "އެބްސުލޫޓް ސެކިއުރިޓީ އެންޑް އެޑްވާންސް ޕްރޮޓެކްޝަން" ގެ ގާޑުންނެވެ.
ފުލުހުން "މިހާރު" އަށް ބުނީ އެ ފޭރުމުގައި ހިމެނޭ މީހުން ދެނެގަތުމުގެ މަސައްކަތް މިހާރު ކުރަމުން އަންނަ ކަމަށެވެ. އެކަމަކު އެއްވެސް މީހަކު ހައްޔަރު ކޮށްފައި ނުވާ ކަމަށް ބުންޏެވެ.
ސޯޝަލް މީޑިއާގައި ބައެއް މީހުން އާންމުކޮށްފައިވާ އެ ހާދިސާގެ ވީޑިއޯއިން ފެންނަ ގޮތުގައި ފޭރެން މަސައްކަތްކުރީ ބީއޯސީ =ގެ ކުރިމައްޗަށް ދެ ސައިކަލުގައި ގޮސް ހުއްޓި ހަތަރު މީހެކެވެ. އެ ހަތަރު މީހުން ވެސް ތިބީ ހެލްމެޓު އަޅައި މޫނު ނިވާކޮށްގެނެވެ.
ރޫޓުގެ ވޭން ބީއޯސީ ކުރިމައްޗަށް މަޑުކުރިއިރު، އެ މީހުން ވެސް ވޭނުގެ ކުރިމައްޗަށް ވާ ގޮތަށް މަޑުކޮށް ވޭނުގެ ތެރެއިން ނެރުނު ފޮށިގަނޑެއް އަތުލައިގެން ދާން އުޅޭތަން ވީޑިއޯ އިން ފެނެ އެވެ. ނަމަވެސް ފޮށިގަނޑު ނެގި އެކަކު ވެއްޓި ބެންކުގެ ގާޑުން އެ މީހާ އަތުން ފޮށިގަނޑު އަތުލި މަންޒަރު ވެސް ފެނެ އެވެ. ވޭނުން އެ ބޭންކުގެ އަންހެން މުވައްޒަފަކު ވެސް ފައިބާ މަންޒަރު ވީޑިއޯތަކުން ފެނެ އެވެ.
ފުލުހުން ބުނިގޮތުގައި، މި ހާދިސާގެ ރިޕޯޓު ފުލުހުންނަށް ލިބިފައި ވަނީ އިއްޔެ ހެނދުނު 11:40ހާއިރު އެވެ.