"ރޫޓް" ފިހާރަ އިން ބޭންކް އޮފް ސިލޯން (ބީއޯސީ) އަށް ފައިސާ ޖަމާކުރަން ގެންދަނިކޮށް ފޭރެން އުޅުނު މައްސަލައިގައި މީހަކު ހައްޔަރުކޮށްފި އެވެ.
ފުލުހުން ބުނީ މިދިޔަ އާދިއްތަ ދުވަހު ބީއޯސީ އަށް ފައިސާ ހިފައިގެން ގޮސް ވެހިކަލް މަޑުކުރި ވަގުތު ފޭރެން އުޅުނު މައްސަލާގައި ހައްޔަރުކުރީ 20 އަހަރުގެ ދިވެހި ފިރިހެނެއް ކަމަށެވެ. އޭނާ ހައްޔަރު ކުރީ ކޯޓު އަމުރަކަށް ކަމަށް ފުލުހުން ބުންޏެވެ.
ފޭރެން އުޅުނު މީހުންގެ މަސައްކަތް ނާކާމިޔާބުކޮށްލީ ބީއޯސީގެ ސެކިއުރިޓީ ގާޑާއި ރޫޓްގެ މުވައްޒަފުންގެ މަސައްކަތުންނެވެ.
ފޭރެން މަސައްކަތްކުރީ ދެ ސައިކަލެއްގައި އައި ހަތަރު މީހެކެވެ. އޭގެ ތެރެއިން ތިން މީހަކު ހެލްމެޓް އަަޅައިގެން ތިބި އިރު އެކަކު އިންނަނީ ހެލްމެޓް ނާޅައި ފޭސް މާސްކެއް އަޅައިގެންނެވެ.
