ބ.ތުޅާދު އާއި ށ. ބިލެތްފައްސާއި މ. މުލީގައި އެއާޕޯޓް އަޅަން ސަރުކާރުން ނިންމާފައިވާ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ މިއަދު ވިދާޅުވެއްޖެ އެވެ.
ސަރުކާރަށް ދެ އަހަރު ފުރުމާ ދިމާކޮށް ދައުލަތުގެ މީޑިއާ، ޕީއެސްއެމްގައި ވާހަކަ ދައްކަވަމުން ނަހުލާ ވިދާޅުވީ ތިން ރަށެއްގައި އެއާޕޯޓް އަޅަން ޕްލޭންކޮށް، އަންނަ އަހަރު ދެ ރަށެއްގައި މަސައްކަތް ފަށާނެ ކަމަށެވެ. އެއީ ބިލެތްފައްސާއި މުލީގައި ކަމަށާއި ތުޅާދު އަށް ޕްލޭނެއް އެބައޮތް ކަމަށެވެ.
ތުޅާދޫ އެއާޕޯޓުގެ މަސައްކަތް ފަށާނެ ތާރީޚެއް ވިދާޅެއް ނުވެ އެވެ.
"އަޅުގަނޑުމެން ހަމަ ކުރިއަށް އޮތް ތަނުގައި ވެސް ޕްލޭންކޮށްފައި އެބަހުރި އެއާޕޯޓްތައް. މިސާލަކަށް ދަންނަވަންޏާ މުލީގެ އެއާޕޯޓެއް އެބައިން. ބިލެއްފަހީގައި ވެސް އެއާޕޯޓެއް އެޅުމަށް ވިސްނުންތަކެއް އެބަހުރި. އެހެންވީމާ މިކަންތައްތައް ފައިނަލްވެގެން އައިމާ އަޅުގަނޑު ގަބޫލުކުރާ ގޮތުގައި އެ އެއާޕޯޓްތައް ވެސްް އެޅިގެން ދާނެ،" ނަހުލާ ވިދާޅުވި އެވެ.
ރާއްޖޭގެ ކޮންމެ ރަށަކުން ވެސްް ވިއްސަކަށް މިނެޓް ތެރޭގައި ދެވޭ ހިސާބުގައި އެއާޕޯޓެއް ބާއްވަން ކުރީގެ ރައީސް އަބްދުﷲ ޔާމީންގެ ސަރުކާރުން ކަނޑައެޅި ސިޔާސަތު މިސަރުކާރުން ދަމަހައްޓާނެ ކަަމަށް އިކޮނޮމިކް މިނިސްޓަރު ފައްޔާޒް އިސްމާއީލް މިދިޔަ ހަފުތާގައި ރައްޔިތުންގެ މަޖިލީހުގެ ކޮމިޓިއެއްގައި ވަނީ ވިދާޅުވެފަ އެވެ.
އެ ސިޔާސަތާ ބެހޭ ގޮތުން ނަހުލާ ވިދާޅުވީ މުލީގައި އެއާޕޯޓް އަޅާފައި ހދ. މަކުނުދުއަށް ވައިގެ ދަތުރުކުރެވޭނެ އިންތިޒާމެއް ހަމަޖެއްސީމާ އެކަން ގާތްގަނޑަކަށް ހާސިލުވާނެ ކަމަށެވެ.
"މަކުނުދޫ އެއީ ތަންކޮޅެއް ވަކިން އޮންނަ ރަށެއްވީމާ އެރަށާ ތަންކޮޅެއް ދުރުވާނެ އެއާޕޯޓް. އެކަމަކު އަޅުގަނޑުމެންގެ ވިސްނުން އެބަހުރި މަކުނުދުއަށް ހަމަ ވައިގެ މަގުން ދަތުރުކުރެވޭނެ ކޮންމެވެސް ގޮތެއް ހަމަޖެއްސުމަށް،" ނަހުލާ ވިދާޅުވި އެވެ.
އޭނާ ވިދާޅުވި ގޮތުގައި ކުރިއަށް އޮތްތަނުގައި އެކަން ވެސް ހަމަޖެހިގެންދާނެ އެވެ.
ބަޖެޓް ދިރާސާކުރަން ބޭއްވި ކޮމިޓީ ބައްދަލުވުމެއްގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން ޕްލޭނިން މިނިސްޓަރު މުހައްމަދު އަސްލަމް ވިދާޅުވީ އެއާޕޯޓްތައް އެޅުމުން ޖުމްލަ ގޮތެއްގައި އިގުތިސާދަށް ފައިދާ ކުރާ ކަމަށެވެ. މިދިޔަ އަހަރުވެސް ރާއްޖޭގެ ރީޖަނަލް އެއާޕޯޓްތަކުން ފައިދާއެއް ވެފައި ނުވާއިރު ކެޕިޓަލް އިންވެސްޓްމެންޓްގެ ގޮތުގައި އެއާޕޯޓް ހިމެނީ ކީއްވެތޯ މެމްބަރަކުރި ސުވާލަކަށް ޖަވާބު ދެއްވަމުން އަސްލަމް ވިދާޅުވީ ބައެއް ކަހަލަ އިންވެސްޓްމެންޓްގެ އަގު ސީދާގޮތެއްގައި ނުލިބިދާނެ ކަމަށާއި ބަލަން ޖެހޭނީ މުޅި އިގުތިސާދަށް ކުރާ ފައިދާއަށް ކަމަށެވެ.
ހަމަ އެސުވާލަށް ޖަވާބު ދެއްވަމުން އިކޮނޮމިކް މިނިސްޓަރު ފައްޔާޒް ވިދާޅުވެފައި ވަނީ ރާއްޖޭގެ ކޮންމެ ދާއިރާއެއްގައި ވެސް ވިއްސަކަށް މިނެޓުން ދެވޭ އެއާޕޯޓެއް އޮތުމަކީ ކުރީގެ ސަރުކާރުގެ ސިޔާސަތުތަކުގެ ތެރެއިން މިސަަރުކާރުން ބަލައިގަނެފައިވާ ސިޔާސަތެކެވެ.
"ރައްޔިތުން އުޅޭ ކޮންމެ ރަށަކުން ވެސް ވިއްސަކަށް މިނެޓުން ދެވޭ އެއާޕޯޓެއް އޮތުން، އަޅުގަނޑުމެން ވެސް ހަމަ އެ ސިޔާސަތު ކުރިއަށް މިގެންދަނީ،" ފައްޔާޒް ވިދާޅުވި އެވެ.
އޭނާ ވިދާޅުވީ އެއާޕޯޓްތައް އަޅަން ރާވާފައި ވާނީ އެ މަގުސަދު ހާސިލުވާ ދުރުމިންތަކުގައި ކަމަަށެވެ. އެހިސާބަށް ދިއުމަށް ޓަކައި އަޅަން ޖެހެނީ އިތުރު ފަސް އެއާޕޯޓް ކަމަށާއި އެ މަސައްކަތް ކުރިއަށް އެބަދާ ކަމަށް ވެސް އޭނާ ވިދާޅުވި އެވެ.
