އެކަޑަމިކް ކަލަންޑަރުގައި އޮތް ގޮތަށް މި މަހު 10 ގައި ސްކޫލްތައް ހުޅުވާނެ: އެޑިއުކޭޝަން

އެކަޑަމިކް ކަލަންޑަރުގައި އޮތް ގޮތަށް މި މަހު 10 ގައި ސްކޫލްތަކުގެ ކިޔެވުން އަލުން ފަށާނެ ކަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.

ކުރިން ވެސް ކަނޑައަޅާފައިވާ ދުވަހު، 2020-2021 ގެ ދިރާސީ އަހަރުގެ ދެ ވަނަ ޓާމުގެ ކިޔެވުން ފަށާނެ ފަށާނެކަން އެޑިއުކޭޝަނުން ބެލެނިވެރިންގެ ސަމާލުކަމަށް ގެނައީ އަލުން ސްކޫލް ހުޅުވުން އަނެއްކާވެސް ފަސްކުރާނެތޯ ސުވާލު އުފެދިފައި ވަނިކޮށެވެ.

ކޮވިޑް-19 ގެ ސަބަބުން ސްކޫލްތައް ބަންދުކުރަން ޖެހުނު ފަހުން، އާންމު ހާލަތުގައި ކިޔަވައިދެވޭ ގޮތެއް އަދި ނުވެ އެވެ. ބަލިމަޑުކަމާ ހެދި ކިޔެވުން ހުއްޓުމަކަށް އައުމުން ދިރާސާ އަހަރުގެ ތަރުތީބަށް ވެސް ބަދަލު ގެންނަން ޖެހި، މި އަހަރު މި ފަށަނީ މިދިޔަ އަހަރުގެ ދިރާސީ އަހަރުގެ ދެ ވަނަ ޓާމެވެ. މި އަހަރު ދިރާސީ އާ އަހަރު ފެށޭނީ އޯގަސްޓް 10 ގަ އެވެ.

ރައްކާތެރިކަމުގެ ފިޔަވަޅުތަކާ އެކު އަލުން ކިޔެވުން ފަށަން ނިންމާފައިވަނީ ކޮންމެ ދުވަހަކު 4-5 ގަޑިއިރު ކިޔަވައިދޭ ގޮތަށެވެ. ޕްރީ ސްކޫލު ނުވަތަ ފައުންޑޭޝަން ސްޓޭޖްގެ ދަރިވަރުންނަށް ހަފުތާގެ ފަސް ދުވަހު، ދެ ގަޑިއިރަށް ވުރެ މަދުނުވާނެ ވަރަށް ކިޔަވައިދޭން ވަނީ އަންގައިފަ އެވެ. އެ ގަޑިއިރުގެ ތެރެއިން މަދުވެގެން 60 މިނެޓް، ދަރިވަރުންގެ ހުން ބެލުމާއި އަތް ދޮވުމާއި ފިޒިކަލް ހަރަކާތްތައް ހިންގުމަށް ހާއްސަކުރަން ޖެހެ އެވެ.

ކީ ސްޓޭޖް 1 (ގްރޭޑު 1،2 އަދި 3) އާއި ކީ ސްޓޭޖް 2 (ގްރޭޑު 4،5 އަދި 6) އަދި ކީ ސްޓޭޖް 3 (ގްރޭޑު 7 އަދި 8) ގެ ދަރިވަރުންނަށް ހަފުތާއަކު 25 ޕީރިއަޑް ނަގައިދޭން ހަމަޖައްސާފައި ވެ އެވެ. ފައުންޑޭޝަން ސްޓޭޖުން ފެށިގެން ކީ ސްޓޭޖް ތިނަކާ ހަމައަށް އާ ސްކީމެއް ތައްޔާރުކޮށް، މި އަހަރުގެ ފުރަތަމަ ޓާމުގައި ކިޔަވައި ނުދެވި ހުރި ބައިތައް ފުރިހަމަކުރެވޭނެ ގޮތެއް ހަމަޖައްސަން ވެސް، ސާކިއުލާގައި ވަނީ އެދިފަ އެވެ.

ސްކޫލަށް ހާޒިރުވާން ނުޖެހޭ ކީސްޓޭޖް ދަރިވަރުންނަށް ޓެލިކިލާހާއި އޮންލައިން ކްލާސްތައް މަޖުބޫރުވާނެ އެވެ. ސްކޫލަށް ހާޒިރުވާ ދަރިވަރުން ވެސް އޮންލައިން ކްލާސްތައް ގެންދާ ނަމަ އޭގައި ބައިވެރިވާންޖެހޭނެ އެވެ.

މަސް ދުވަހުގެ ޗުއްޓީއަކަށް ފަހު ސްކޫލުތައް އަލުން ހުޅުވާނީ އެ ރަށެއްގެ ސިއްހީ ހާލަތު ހުރިގޮތަށް ރިއާޔަތްކުރުމަށްފަހުގަ އެވެ.

ސްކޫލްތައް ހުޅުވުމާ ބެހޭ ގޮތުން އެޑިއުކޭޝަނުން ސްކޫލުތަކަށް ފޮނުވި ސާކިއުލާގައި ވަނީ ލޮކްޑައުންގައި އޮންނަ ރަށްރަށުގެ ހުރިހާ ސްކޫލެއް ބަންދުވާއިރު، މޮނިޓަރިންގެ ހާލަތުގައި ކިޔަވައިދިނުން ގެންދާނީ ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ލަފާގެ މަތިން ކަމަށެވެ. ކޮވިޑު ނެތް ރަށްރަށުގައި ފައުންޑޭޝަނުން ފެށިގެން ގްރޭޑު 12 އާ ހަމައަށް ކިޔަވައިދޭނެ އެވެ. މިއީ، ކޮވިޑުން ރައްކާތެރިވުމަށް ސްކޫލުތައް ބަންދުކުރުމަށް ފަހު އަލުން ކިޔަވައިދޭން ފެށިއިރު ވެސް އަމަލުކުރި އުސޫލެވެ.