ދޮޅުމަސް ދުވަހުގެ ބަންދަކަށް ފަހު ދިރާސީ އާ އަހަރުގެ ކިޔެވުން މިއަދު ފަށައިފި އެވެ.
ދިރާސީ އާ އަހަރުގެ ކިޔެވުން ފެށިއިރު ދަރިވަރުންނަށް މިދިޔަ އަހަރުގެ ބޮޑު ޗުއްޓީ ދިނީ ކުރިން އޮތް ގޮތަށް ޑިސެމްބަރު މަހު އެވެ.
ބެލެނިވެރިން އެދުމުގެ މަތިން ރައީސް ޑރ. މުހައްމަދު މުއިއްޒު އެ ބަދަލު ގެންނަވައި ޑިސެމްބަރުގައި ބޮޑު ޗުއްޓީ ލިބޭ ގޮތަށް ބަދަލު ކުރެއްވުމުން، އެއީ މި ފަހުން ޑިސެމްބަރުގައި ޗުއްޓީ ލިބުނު ފުރަތަމަ އަހަރެވެ.
މިދިޔަ ދިރާސީ އަހަރު ނިންމައި ރިޕޯޓު ފޮތް ދިނީ ޑިސެމްބަރު 25 ގަ އެވެ.
މިއަދު ފެށި ދިރާސީ އާ އަހަރުގެ ފުރަތަމަ ޓާމުގެ މިޑް ބްރޭކް ލިބޭނީ މެއި 24 އިން 30 އަށެވެ. ފުރަތަމަ ޓާމުގެ ކިޔެވުން ނިންމައި ދަރިވަރުންނަށް ޗުއްޓީ ލިބޭނީ ޖުލައި 17 އިން އޮގަސްޓު 1 އަށެވެ.
ދެވަނަ ޓާމުގެ ކިޔެވުން ފެށޭނީ އޮގަސްޓު 2 ގަ އެވެ. މި އަހަރުގެ ބޮޑު ޗުއްޓީ ލިބޭނީ ޑިސެމްބަރު 18 އިން 2027 ވަނަ އަހަރުގެ ޖެނުއަރީ މަހުގެ 12 ވަނަ ދުވަހާ ހަމައަށެވެ. އަދި 2027 ވަނަ އަހަރުގެ ކިޔެވުން ފެށޭނީ ޖެނުއަރީ 17 ގަ އެވެ.
ދިރާސީ އަހަރުގެ ކިޔެވުން ސަރުކާރު 219 ސްކޫލެއްގައި މިއަދު ފެށި އެވެ.
ޕްރީސްކޫލުން ފެށިގެން ގްރޭޑް 12 އާ ހަމައަށް، އެ ސްކޫލުތަކުގައި 80،715 ދަރިވަރުން މި އަހަރު ތައުލީމު ހާސިލް ކުރާނެ އެވެ. އެ ދަރިވަރުންނަށް ކިޔަވައިދޭން 9،952 ޓީޗަރުން ހަރަކާތްތެރިވާނެ ކަމަށް މިނިސްޓްރީގެ ތަފާސްހިސާބުން ދައްކަ އެވެ.
އެޑިއުކޭޝަން މިނިސްޓްރީން މިދިޔަ ހަފުތާގައި އާންމުކުރި ތަފާސްހިސާބުތަކަށް ބަލާއިރު ދިރާސީ އާ އަހަރު ސަރުކާރު ސްކޫލްތަކުގެ ގްރޭޑު އެކެއްގައި ކިޔެވުމަށް 4،790 ދަރިވަރުން އެދިފައިވެ އެވެ. އެއީ އަތޮޅުތަކުގެ ރަށްތަކުން ގްރޭޑު އެކަކަށް ވަނުމަށް އެދުނު 3،042 ދަރިވަރުންނާއި މާލެ ސަރަހައްދުގެ ސްކޫލްތަކުގައި ގްރޭޑު އެކަކުން ޖާގަ އަށް އެދުނު 1،748 ދަރިވަރުންނެވެ.
މި އަހަރު ވެސް އަތޮޅުތަކުން މާލެ އަށް 1،530 ދަރިވަރުން ބަދަލުވެފައިވާއިރު، މާލެ އިން ހުޅުމާލޭގެ ސްކޫލްތަކަށް ބަދަލުވުމަށް 836 ދަރިވަރުން އެދިފައިވެ އެވެ.
އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު "މިހާރު" އަށް އިއްޔެ ވިދާޅުވީ ސްކޫލުތަކުގެ ކިޔެވުން މި އަހަރަށް ފެށިއިރު ހުރިހާ ސްކޫލުތަކަށް ބޭނުންވާ ފޮތްތައް ފޮނުވައި، ނިންމާފައިވާ ކަމަށެވެ. އަދި ޓީޗަރުން ވެސް ސްކޫލުތަކަށް ހަމަވެ، ސްކޫލުތައް ދިރާސީ އާ އަހަރަށް ތައްޔާރު ވެފައިވާ ކަމަށް އޭނާ ވިދާޅުވި އެވެ.