ރާއްޖެ އެތެރެކުރި 61 ކިލޯ މަސްތުވާތަކެތީގެ މައްސަލައެއްގައި ހައްޔަރުކޮށް ޝަރީއަތް ނިމެންދެން ބަންދުންކުރި މީހަކު ކްރިމިނަލް ކޯޓުން މިއަދު ދޫކޮށްލައިފި އެވެ.
ބަންދު ރިވިއުކުރަން ގެންގޮސް ކްރިމިނަލް ކޯޓުން ދޫކޮށްލާފައި ވަނީ ގ. ބޮއިލިން ފިޝް، އަހުމަދު ވިސާމެވެ. މި މައްސަލާގައި ހިމެނޭ އެހެން މީހަކު ވެސް ކުރިން ވަނީ ދޫކޮށްލައިފަ އެވެ.
އޭނާއަކީ މިދިޔަ އަހަރު މާޗް މަހު އަތުލައިގަތް 61 ކިލޯއަށް ވުރެ ގިނަ މަސްތުވާތަކެތީގެ މައްސަލާގައި، ފުޅާ ދާއިރާއެއްގައި މަސްތުވާތަކެތި ރާއްޖެއަށް އެތެރެކޮށް ޓްރެފިކްކުރަން އުޅުނު ކަމުގެ ތުހުމަތުގައި ހައްޔަރު ކުރި މީހެކެވެ. އޭނާއަކީ މީގެ ކުރިން ވެސް މަސްތުވާތަކެތި ބޭނުންކޮށް ގެންގުޅުމާއި މަސްތުވާތަކެތި ޓްރެފިކް ކުރުމުގެ ރެކޯޑް އޮންނަ މީހެއްކަން ފުލުހުން ވަނީ ބުނެފަ އެވެ.
އެ މައްސަލާގައި ކްރިމިނަލް ކޯޓުން މިއަދު ނެރުނު އަމުރެއްގައި ބުނެފައި ވަނީ ކަރެކްޝަނަލް ސާވިސްގެ ފަރާތުން އޭނާއަށް އެކަށީގެންވާ ގޮތެއްގައި ސިއްހީ ފަރުވާ ދީފައި ނުވާ ކަމަށެވެ. ވިސާމަކީ ކަކުލުގެ ބޮޑު އޮޕަރޭޝަނެއް ކުރަންޖެހޭ މީހެއްކަން ލިޔުންތަކުން އެނގެން އޮތް އިރު ވެސް އޭނާ ޑޮކްޓަރަށް ދައްކާފައި ނުވާ ކަމަށާއި އޭނާ ނަފްސާނީ ޑޮކްޓަރަކަށް ވެސް ދެއްކުމަށް ރިފާކޮށްފައިވާއިރު އެކަން ވެސް ކޮށްފައި ނުވުމަކީ ވިސާމް ދޫކޮށްލާ ސަބަބެއް ކަމަށް ގާޒީ އާދަމް މުހައްމަދުގެ އަމުރުގައިވެ އެވެ.
އެހެންވެ ވިސާމް ބަންދުގައި ބަހައްޓައިފި ނަމަ އޭނާގެ ސިއްހަތަށް ބޮޑެތި ގެއްލުން ލިބިދާނެ ކަމަށް ބުނެ ކްރިމިނަލް ކޯޓުން ވަނީ އޭނާ ދޫކޮށްލަން އަމުރުކޮށްފަ އެވެ.
ވިސާމާ އެކު މި މައްސަލާގައި 11 މީހަކު ހައްޔަރު ކުރި އެވެ. އޭގެ ތެރެއިން ހަތް މީހުންނަކީ މަސްތުވާތަކެތި ރާއްޖެއަށް އެތެރެކުރި ދޯނީގައި ދަތުރުކުރި މީހުންނެވެ. އަނެއް ހަތަރު މީހުންނަކީ މާލެއާއި ހުޅުމާލޭގެ ހަތަރު ގެއެއް ބަލައި ފާސްކޮށް ހައްޔަރުކުރި މީހުންނެވެ.